* امس الكاردينال ظهر في حفل الترحيب بلاعبي الهلال الجدد ب (الكسكتة). * والكسكتة دي الكاردينال ما بلبسها ساكت. * لو ما جضم الشغل – الكاردينال اصلو ما بيلبس ليه (كسكتة). * عشان كدا الموضوع (ج) خلاص اتنجض. * بكون اكتمل. * الكسكتة دي ما بفتكر تكون في (الطابق الثالث). * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * (ليلي بنت توم القطر) قالت اشترت ليها (خروف) لا لقت فيه مرارة لا كبدة لا كلاوي لا ابودمام لا قلب. * اخوها الكبير قال ليها يبقى دا ما خروف – دا حلة عدس يا اختي. * كمان نحن ما بنعرف (الخروف). * هلالابي ما كان مقتنع ب (شيبوب). * هلالابي عندو رأي في اي حاجة. * الهلالابي شايل جرايدو بيقرأ فيها …اتلفت للزول الجنبو قال ليه تعرف انت شيبوب دا فعلا لاعب (صاعد). * صاعد بالجد جد. * الزول المعاهو قال ليه كيف يعني؟…الخلاك تقتنع اخيرا شنو؟. * الهلالابي قال ليه اعلام المريخ الليلة شابكنا ليك شيبوب (صعد) بالمواسير ونزل من قرفته الساعة 2 صباحا. * دا برد ينزلو فيه الساعة 2 صباحا. * عليكم الله في الاوضاع التى تمر بيها جوبا هذه الايام في زول بيصعد في (مواسير) الطابق الثالث. * يا زول ما تجازف. * يا زول ما تبالغ. * وفي (البرد) كمان. * يمين يملوك (نار) زي الما حصل حاجة. * ناس جوبا ديل ما عندهم حاجة زي دي. * يمين يلقوك طالعك ليك في ماسورة …لو بتنقط ..ما بخلوك. * كمان ديل لا بيعرفوا ليك (شيبوب) ولا بعرفوا ليك (ميسي). * كلهم عندهم واحد. * بلة جابر عندهم زي طه سليمان. * عليك الله (طه سليمان) الدخلو هنا شنو؟. * الجماعة ديل (سلفاكير) عندهم فوقو رأي – انتوا عاوزين تجوا تقولوا لي شيبوب (صاعد) بالمواسير. * لكن ناس بلة جابر وجيمس فعلا (مواسير). * ما شفنا ليهم اي كورة. * كورتهم عاوزين يتموها (سمسرة). * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * (التومة بنت ملح الشواب) – اختها جاها عريس …العريس قال العرس بعد رمضان. * (التومة بنت ملح الشواب) قالت للعريس يمين اختي دي لو شفتها بعد رمضان ما بتعرفها – بتبقي (ضعيفة) زي الزول الكان هنا قبل شوية وما معروف مشى وين؟. * الادبة التى عاشوها (المريخاب) هذه الايام – عجبتني ليهم. * مبسطوين نحن منها. * وبيني بينكم عاوزين مسلسل شيبوب دا يستمر شوية. * خلوه يحرق اعصابهم شوية. * المريخابي الايامات دي يلاقيك بدون مناسبة يقول ليك..والله خايفين جمال الوالي وقت يرجع في شهر مارس يلقى المريخ دا كلو ما فيه غير شجرتين وعلي جعفر. * كلهم يكونوا هجوا. * حالة (الزعزة) الفيها المريخاب الآن – تجعلنا نقول ان المريخاب دخلوا مدرسة في قضية اللاعب شيبوب. * مزمل ابوالقاسم بقى زي الزول السايق ليه (طيارة) بي رخصة (ركشة). * بابكر سلك تقول طالع من رمضان هسع دي. * ومعاوية الجاك – جيب ليه سيرة اي حاجة إلّا الكورة. * سينما. * مسرح. * اي شيء. * بس ما تجيب ليه سيرة الكورة. * بالمناسبة دي ..(البرد) دا ما برد تسجيلات. * عليك الله هسع علاقة التسجيلات بي البرد شنو؟. * في اخر يوم من التسجيلات ..جاني (شافع) مفقوش اتنين متل باقى البطيخة في التلاجة – قال لينا السيستم قفل. * قلنا ليه السيستم ما يقفل ان قفل …نحن بنسجل في (جوبا)..سيستم ناس اسامة عطا المنان دا خليناهو ليهم. * بالمناسبة – عشان ما تقولوا طلعت ليكم من الموضوع..متل الزول البخلي ليك (اللحمة) ويقعد يكد في (العضمة). * نحن في كل الاحوال ما خسرانة معانا في حاجة – لأننا بنافس ونصارع على لاعب هو اصلا ما (ولدنا). * بنصارع في ولدهم. * في زول في كشفهم. * ولاعبهم. * عاوزين نقعلو من (الكشف). * والمعركة بعيدة عن ارضنا – لذلك هي ما خسرانة معانا. * مرقنبو قرنبو برة. * عملنا ليكم النظرية. * لذلك يجب على الهلال ان يتعاملوا مع المرحلة بفرحة وغبطة في كل الاحوال. * اصلو ما تحرقوا اعصابكم ساكت. * اتمتعوا بالمشاهدة. * اتفرجوا بس. * من قبل كان جمال الوالي واعلام المريخ يستعمل مبدأ (سهر الجداد ولا نومه) وهو يحاول ان يقلق الهلال في كل لاعبيه. * اعلام المريخ اتخذ اسلوب غير شريف مع لاعبي الهلال عندما حاول التشكيك في اخلاصهم وذلك بان جعل اي لاعب مطلق السراح في التسجيلات القادمة يطلق عليه عبر كورال المريخ لقب (ولدنا). * في كل الفترات التى كانوا فيها نجوم الهلال وكباتنه مطلقي السراح كان مجلس المريخ واعلامه يدخل من اجل الزعزعة وهز استقرار الهلال. * فاوض مجلس المريخ المعز محجوب وعمر بخيت ومهند الطاهر ومدثر كاريكا وهم في قمتهم وجعل مقابل قيدهم في كشوفات الهلال يصل لارقام فلكية. * مجلس المريخ فاوض بكري المدينة بعد ان وقع الاخير عقدا مع الهلال واستلم مقدم عقده من الهلال. * مجلس المريخ دخل طرفا في مفاوضة اللاعب ليخطفه ويقيده في كشوفات من اجل احراج رئيس نادي الهلال بعد ان انتشرت صور توقيع اللاعب مع رئيس الهلال. * هذا العمل الذي قام به مجلس المريخ لم يكن (اخلاقيا) وهم يتعمد احراج رئيس الهلال. * الآن جاء الوقت الذي يدخل فيه الهلال مجلس المريخ واعلامه في مدرسة عندما استفاد مجلس الهلال من عقد شيبوب مع المريخ ليعمل على تحويل مسار اللاعب عبر طيران (جوبا). * رد الهلال كان قاسيا وهو يختار لاعب صاعد في المريخ صغير في السن ومقيد في كشوفات المريخ ليؤكد رئيس نادي الهلال ان ولدهم (هاوي) فعلا ليحدث كل هذه الزعزعة في مجتمع المريخ. * دا زول (هاوي) ساكت. * مجتمع المريخ الآن كله يقف على رجل واحدة ..وتتابع قلوبهم قبل عيونهم مجريات الاحداث المتصاعدة في الجنوب. * هذه الوضعية التى فيها المريخاب الآن هي من صنيع اعمالهم السابقة واساليبهم غير الكريمة مع الهلال في تسجيلات سابقة. * تستاهلوا. * الرد كان اكثر قسوة …لأن اللاعب صغير في السن و (هاوي) وذلك يبرر الحالة التى فيها اللاعب الآن. * اللاعب (هاوي) بالجد. * مرة يقفل التلفون. * ومرة يفتح التلفون. * ومرة يهرب بعد الساعة اتنين. * ومرة يصرح. * ومرة يختفي. * شغل بتاع زول (هاوي) فعلا. * انتوا يا ناس المريخ بتخلوا ولدكم (الهاوي) وبتقعدوا تفتشوا في اولاد الناس (المحترفة). * عندكم زول هاوي بالصورة دي ..بتمشوا على (الوك) ليه؟. * عجبنا ليكم. * عارفين (البهدلة) دي في البرد ما حلوة. * ما ظريفة. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * (كلتوم بنت خلف الجرة) قالت عندهم (كديسة) في البيت في البرد دا لو لقت (المروحة) شغالة بتقفلها. * …………… و * ناس المريخ لو عندهم قروش ..مفروض يحسموا موضوع المدرب. * شيبوب دا لو رجع ليهم ما بستفيدو منو. * يستفيدو شنو مع رباطه الصليبي دا. * في رباط صليبي بدفعو فيه 3 مليار جنيه. * غايتو في الكورة دي نطلع من مسلسل وندخل في مسلسل. * كورة ذاتها بقت ما في. * كورتنا بقت في القصص دي. * هي وينها الكورة. * و * (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). * (الحسن ود سقط البرد) – قال مشكلة النفط بنحلها مع الجنوب ..بس يحلوا لينا مشكلة شيبوب. * ……….. * السيدة (ل) – من الابرول طلع (برد). * وقرّط على كدا.
