دق الدلجة محمد عبد الماجد حالتها دي بدون (كسكتة) نحن قاعدين في (السقط) دا في الصقيعة. نتلفت متل الناس الراجيين ليهم (خبر). او راجيين (الفطور) لمن يتأخر بدون سبب منطقي كدا. منتظرين (الطابق الرابع). الكاردينال ظهر لينا ب (شيبون). قعدنا (نتشهق) ليك في ميدان المولد الكبير. بيوتنا ضاقت علينا. ما بتستحمل ليها (شهقة) كبيرة كدا. البلد ذاتها فيها ازمة شهقات حادة. كبينا ليك (خلعتنا) في اول (سطر) قابلنا. عشان اكون واضح معاكم بحسابات السيخ والطوب والاسمنت ، شيبون دا بساوي ليك (طابق عديل كدا). بحسابات المريخاب (شيبون) بساوي (130) بكري المدينة…(الكلام دا قبل الحادث). حسبنا ليكم بكري بالسعر (الجاري). قبل يقيف!!. بعد الحادث بعمل (610). شيبون بساوي (720) عطرون. وبي (خالد النعسان) اسكت كب. بدخل في المليون وكسر. انتوا لو عندكم رأس – قروشكم كلها تكبوها في (الوك) وتقعدوا تتفرجوا. قروشكم تاكلوها (سمك). تخلوا شيبون (هاوي) في البرد دا. دا برد يخلوا فيه شيبون (هاوي). والله يا ناس المريخ طلعتوا ناس (هاويين) ساكت. بتاعين (جرايد). ولجان استئنافات. القروش يكبوها في لاعب لن يتم الاستفادة منه بسبب مخالفاته القانونية ..وشيبون قاعد في كشفهم يبخلوا عليه ب (200) مليون. والباشا وبلة جابر. حرام والله. اخر قرش في المريخ طلعو عادل ابوجريشة في (صاج السمك). واتلفتوا بعد ذلك. قلنا ليكم. كلمناكم ….الطابق الرابع في (الجوهرة الزرقاء) خطير. أهو الطابق ظهر ليكم في (التشكيلة). في الكشف. في مايو. جماعتنا افتكروه (طوب احمر). ما عارفين الجماعة عندهم رأي تاني. طابق بيجري عديل كدا. بمسك الكورة. بيمرر. وبيقطع. وبعمل اي حاجة. وبمر من واحد واحد. وبجيب قون. طابق زي دا من الله خلقكم شفتوه. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (التومة بنت ست القزاز) جابت ليها (تؤام)…واحد سجلتو بي اسم (التاج ود شلخ اللبن) زوجها ، والتاني سجلتو باسم (المحلية). قالت ناس المحلية شالو منها رسوم تقيلة في (الولادة). سجلت ليهم واحد بي اسمهم. بقوا يشاركونا في (ولادنا). الجميل في (صفعة) شيبون انها تمت (سرية). في سرية تامة. والاكثر من ذلك (جمال). جمال الوالي طبعا – (اسامة ونسي) ما عندو ذنب. الاجمل من ذلك ان العملية تمت بعد (السيستم) قفل. ناس اسامة عطا المنان حارسين ليك (السيستم)..فاكرين ما في اي عملية بتتم بعيد عن (السيستم). اول (الملكية) جوبا عملوها لي شنو؟. تسجلوا في ولاد (الملكية) ساكت ..شغالين انتوا ومريخ كوستي في اولاد الجنوب على كيفكم. انتوا ما عارفين (الهلال) العظيم جاب حق (الامل). ورجعو ليك الممتاز بدون ما يشارك. الهلال برضو الحقارة البتعملوها في (الملكية) ما بتعجبو. الهلال العظيم جاب ليك حق (الملكية). ولا كلمة. عارفين روعة (الخبطة) في شنو؟. ليس في ان شيبون لاعب صغير السن بموهبة وخبرات كبيرة. طول ..وقوام يتناسب تماما مع نزار حامد والشغيل. الخبطة روعتها ما في الحاجات دي. الخبطة روعتها انها تمت ب (مخمخة) عالية. شغل بتاع عقل. لا لجنة الاستئنافات. ولا مجدي شمس الدين. الكاردينال سبق له ان انتصر في قضية اللاعب (جمعة جينارو) عندما ادخله كشف الهلال بطريقة (قانونية) ناس الاتحاد الى الآن قاعدين مستغربين فيه. عملية شيبون برضو فيها شغل عالي. شغل بي مزاج. ومخمخة صاح. عبدالتام نائب الامين العام لمجلس المريخ الذي جاء اول امس قال ان اللاعب لم يسجل في الهلال في مايو القادم. دا القدر عليها الزول الذي جاء اول امس دا. والله يا حليل ناس عبدالصمد. ومحمد سيد أحمد برضو قعد يحدثنا عن المادة 55. الجماعة ديل ما عارفين ان هناك الف طريقة ممكن ان يلعب فيها شيبون في الهلال في مايو القادم. شيبون ممكن يلعب في الهلال (اعارة) من الملكية جوبا – زي اعارة جمعة من كوبر. وبي القانون. دا مثال ساكت. ما في زول بقدر يقول اي حاجة. لا اسامة عطا المنان ولا لجنة الاستئنافات. نحن ما عندنا لف ودوران. حاجاتنا كلها بتتم بالقانون. زي شغل (شيبون) الآن. خلى ليك الجماعة اتفتحوا (جرسة). جرستكم دي لا عرفناها من (البرد) – لا عرفناها من (شيبون). في زول بضربوه ليك ضربة زي دي بعد (السيستم) ما يقفل. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (الجزولي ود حاج النوكيا) ..مشى (الدهب) يفتش ليه عن (بصل). قدر ما فهمناهو انو (البصل) ما عندو علاقة ب (الدهب) ما عاوز يقتنع لينا. قال لينا اول (الروس) دخلهم شنو بالدهب …تراهم دخلوهم لينا. عندما تتداولت المواقع الاسفيرية صور رئيس نادي الهلال اشرف الكاردينال مع شيبون لاعب المريخ (السابق) – حرصت على (التدقيق) على الصورة. الدنيا (برد) ..شيبون في الصورة شايفو ليك زي (رونالدو) …طول وعرض. قلت يا ربي المشكلة وين في الصورة وإلّا في البرد؟. والله انا لو سألتوني بقول ليكم المشكلة في ناس (الكهرباء) ديل. يقطعوا ليك الكهربة بدون مناسبة. عاينت سمح في (الصورة) – لقيت الكاردينال ما لابس (الكسكتة). قلت يمكن الصور دي تكون (فتوشوب) ساكت. قبلت كدا ليك جرسة المريخاب شغالة – كمان جرسة المريخاب في (القروبات) شينة شنة مبالغ فيها. قلت ما معقولة (الجرسة) دي كلها تكون في (فتوشوب). الجرسة دي جرسة زول (مفارق). مغادر المجموعة. الجماعة بقوا يخلوا ليك اي حاجة – ويقعدوا يجعروا ليك. حالتهم صعبة. فكوا (البرد) ومسكوا ليك (شيبون). ليه يفكوه؟. وليه هاوي؟. والعمل كدا منو؟. وابوجريشة وين؟. وجمال الوالي ذاتو غلطان. وعبدالتام دا بدل (الوك) كان يثبت لينا (شيبون) دا. نحن (الوك) نعمل بيه شنو؟. إلّا يضرب ليكم سمك ابوجريشة. ومزمل ابوالقاسم بس فالح لي في (طونق اتونغ). وشيبون (ولدهم) بفلت من قدام عيونهم. بطلع من وسطهم. حكاية شيبون دا زي (الشاكوش) الجديد. المريخاب قاعدين يغنوا في (في الليلة ديك). لكن الحاجة الغريبة – الكاردنيال ما لابس في الصورة (الكسكتة). الشيء دي ضاعفت لي مخاوف (الفتو شوب) عندي. بعدين اي مريخابي لو اشتكي في هذه الصور وقال الكاردينال بدون (كسكتة) ممكن يبطل ليك تسجيل شيبون في الهلال شهر مايو. ناس اسامة عطا المنان عاوزين ليهم سبب. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (السريرة بنت سر البحر) قالت الكاردنيال لو استمر بالطريقة دي ..ناس المريخ بيرجعو ناس ميرغني كنيد ورمضان حبني. الشغل دا ما بقدرو عليه. الشغل دا كبير شديد. ……….. و الممتاز يوم 21 يناير ..وناس المريخ الى الان مدربهم ما معروف. ومعسكرهم مجهجه. وحالتهم صعبة. والله بقيت خايف على نادي المريخ. خايف كهربتو تخلص. الناس ديل كهربتهم ح تقطع قريب. الموضوع واضح. ما عاوز ليه (سيستم). الضربة الاخطر ان الهلال حول بشه الصغير والصيني الى محترفين. ما عاوزين لينا (هاوي). دا الشغل. دي (المخمخة) الصاح. دا الشغال العال. و (ونحن عايشين والحمدلله (النفس) بينزل ويطلع إلى الآن..ولا ينقصنا شيء سوى رؤياكم الغالية). (الطيب ود الشلخة) جاتو نفسيات من (البصل). ………. السيدة (ل) – استنجد الشوق بالطناش. وقرّط على كدا.
