بالعربي الكسيح محمد الطيب الأمين لما تشوف (طيرك حاضنو غيرك) إلا تبكي بس !! * الليل غطي الجبال .. * وبما ان ذلك كذلك نحن نتمنى ان تُلعب مباراة الاياب بين الهلال والاهلي الليبي ليلا بدلا من العصر .. * الشركة الصينية تكون ما قصرت لو أكملت العمل في الأبراج خلال العشرة أيام المتبقية .. * الهلال عندو ذكريات صادقة وجميلة مع (المساء) .. * الأهلي المصري (إندفن ليلا) .. * ناصاروا (إندفن ليلا) .. * الزمالك (إندفن ليلا) .. * ونتمنى ان يندفن الأهلي الليبي ليلا .. * نور الشمس ما كعب لكن كمان (الضرب) تحت نور الكشافات عندو طعم خاص .. * في العام الماضي إعتمد غارزيتو علي (ضفر) كصانع ألعاب .. * وإعلام المريخ وجمهور المريخ صدق إنو ضفر ممكن يصنع اللعب .. * جماعتك صدقوا .. * هو يعني إنتو اي زول يشوت ليهو كورة تقع بالصدفة قدام المهاجم ده معناها صانع لعب ؟؟ * معقولة فهمكم يكون وصل للدرجة دي ؟؟ * معقولة تكونوا مقتنعين إنو ضفر بيصنع لعب؟؟ * عارفنكم (ما مُتوا لكن كمان أظنكم شقيتوا المقابر قبل كده) ؟؟ * ضفر لو بيصنع لعب الثعلب يكون بيصنع شنو يعني ؟؟ * غايتو جنس غايتو !! * من يملك (مكسيم) لا يخاف ، والهلال بحمدلله في كل خط من خطوطه التلاتة عندو مكسيم ده غير مكسيم سيد الأسم .. * مكسيم الدفاع هو (أبيكو) ومكسيم الوسط هو (موكورو) ومكسيم الهجوم (بشة) .. * هلالنا كلو مكسيم .. * وجمال سالم عمرو ما ببقى مكسيم .. * والله صحي .. * بمناسبة جمال سالم .. * في (الواتس) و(الفيس) بتلقي الزول عامل في البروفايل أو الحالة : (فلان يشعر بالمرض) .. * فلان يشعر ب(الزهج) .. * فلان يشعر ب(الفلس) .. * فلان يشعر ب(الفرح) .. * أنا أمبارح وبعد وصول بعثة الهلال إلي تونس شفت (حالة شيبوب في الواتس) لقيتو كاتب : (شيبوب يشعر بالراحة) .. * مرتااااح ومبسوط .. * علي فكرة .. شيبوب كان يفترض ان يستقبل بعثة الهلال في المطار ولكن نسبة لظروف وصول البعثة في مواعيد التدريب الصباحي لم يتمكن شيبوب من إستقبال (زملاء الغد) .. * ولكن بأذن الله سيكون شيبوب متابعا للمباراة من علي المقصورة وسيجلس (شمال الكاردينال) .. * وإحنا حقيقة نتمنى إنو الكاردينال يشيل معاهو (كسكتة زيادة) .. * ممكن يشيل كسكتتين .. * كسكتة ليهو هو وكسكتة للشيبوب .. * والله يا جماعة ده إحساس قاسي خلاص .. * لما تشوف (طيرك حاضنو غيرك) بالجد احساس صعب .. * شيبوب من (طيور المريخ وحاليا هو في حضن الهلال) .. * وكل ما نربي كتكوت يكبر ويلبس الكسكتة .. * وتبكُو بس .. عين قطرة وعين مس .. * غايتو جنس غايتو !! * منذ الآن بدأ الهلال التفكير في إستجلاب فريق أوروبي للتباري مع الفريق وديا علي شرف إفتتاح الجوهرة الزرقاء الشهر القادم .. * مانشيستر علي رادار الهلال .. * الأرسنال ضمن الخيارات .. * ملقة بره الخيارات .. * شيلسي ضمن الخيارات .. * شالكا (الإيطالي) زي ما قال عضو مجلس المريخ .. بره الخيارات .. * الوحدات الأردني من ضمن الخيارات .. * إحنا وأولاد حلتنا بنتمنى إنو الوحدات يشارك في إفتتاح الجوهرة الزرقاء .. * نجيب الوحدات يتبارى مع الهلال ونجيب (ساماتا) ضيف شرف .. * شرف ب(الجا) .. * أفضل لاعب بصفوف المريخ هذه الأيام هو عمر بخيت (38) سنة .. * وهذا يعني ان المريخ حاليا هو في مستوى الهلال سنة (2008) .. * يعني مريخ السنة دي هو هلال (2008) .. * والله صحي .. * نرجع ونقول .. * طول ما اللقيمات موجودة لا تحلموا بأن يجلس علي كرسي الإتحاد العام رئيس خلاف معتصم جعفر .. * معتصم جعفر لن يترك هذا (العز) ولكن علي الحكومة ان تقول كلمتها في إنتخابات الإتحاد .. * إتحاد معتصم جعفر في العام الماضي نسف الموسم بأكمله وكاد ان يلحق الكرة السودانية أمات طه .. * ونحن نراهن ان هذا الموسم ايضا لن يمر بسلام .. * من مصلحة الكرة السودانية ان يغادر إتحاد معتصم جعفر بلا رجعة .. * والسيد جمال الوالي الشهير ب(عزو) سيكون هو أكبر الداعمين لمعتصم جعفر لان المريخ المستفيد الوحيد من هذا الإتحاد .. * لابد ان يلعب الهلال دورا مؤثرا في الإنتخابات القادمة حتي يصحح مسار الكرة السودانية .. * ونسأل الله مثلما خلص العالم من بلاتر ان يخلصنا من (بلاتراتنا) أو كما قال عصام الحاج .. * والله في .. * تقارير صحفية عالمية كشفت ان مازيمبي والنجم الساحلي والهلال مرشحين فوق العادة للفوز بكأس الأبطال .. * التقارير إستبعدت الأهلي المصري والترجي التونسي والإتحاد الجزائري .. * وطبعا قطع شك المريخ ما محسوب .. * لما نتكلم عن المرشحين للابطال يفترض اي مريخابي (يدنقر رأسو) .. * الإصيفر ممكن يكون مرشح فوق العادة لسيكافا .. * المهم .. * الخبر يقول : (أوردت اللجنة الإعلامية لمشروع الدعم الجماهيري المريخي 2870 حقائق محبطة عن محصلة مشروع تحويل الرصيد عبر جميع الشبكات حيث بلغ المبلغ المحصل في أربعة اشهر 21 مليون جنيه بالقديم) .. * خلي بالك .. * واقرأ .. * قبل ما نفصل ونشرح حقو تاني تطلع تقرأ الخبر .. * أعد قراءة الخبر .. * أيوة (21) مليون بالقديم .. * في أربعة شهور (21) مليون علما بأن التحويل تم عبر كل الشبكات .. * عليك الله دي ما فضحية ؟؟ * مشروع خسارة إعلاناتو تضاعف عائده مية مرة .. * والله ال(21) مليون دي تراوري بكملها (كريمات شعر) بس .. * (21) مليون تمثل أقل من ربع مرتب تراوري الشهري .. * وين جمهوركم ؟؟ * وين الشفوت ؟؟ * وين الصفوة ؟؟ * وين (الإصيفر) ؟؟ * ال(21) مليون الكاردينال بيشتري بيها (كسكتات بس) .. * وبعد ده كلو يقول ليك جمهور المريخ كتير .. * كتير ب(الغا) .. * تحويل الرصيد ده لو إشتغل في الهلال جمهور الهلال ممكن يعمل ال(21) مليون دي في (45) دقيقة .. * نص ساعة بس بنعمل 21 مليون .. * الحمدلله إنو المشروع ده كشف حجم جمهور المريخ الحقيقي .. * قلنا ليكم الناس ديل هلالاب زعلانيين ما صدقتونا .. * قلنا ليكم المحرش ما بكاتل وما صدقتوا .. * معقولة (21) مليون في أربعة شنو ؟؟ * مالكم ؟؟ الشبكة كعبة ولا ما عندكم ثقة ؟؟ * ولا حولتوا رصيد غلط .. * غايتو جنس غايتو !! * و..و.. * ما قالوا ليك حنين نان بس وينا …(بطاقة الصراف الألي)
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
