أصل الحكاية حسن فاروق الكلام دخل الحووووووووش ياالطاهر (5) تقرير خطير عن تجاوزات في عدد من المؤسسات من ديوان المظالم العامة اودع في البرلمان، ونوقش في البرلمان، ومنع من النشر في الصحف بتلفون .. اتخيلوا الوضع الصحفي عندنا ماشي كيف؟ .. التقرير من الغلاف للغلاف مهم .. لكن بهمني الجزء الخاص بالنيل الاورق الشركة حسب التقرير ، فالقناة حققت ربحية مقدرة في العام 2014 قبل الشراكة، الكلام ده مكتوب رقم اربعة في بند الانجازات، يعني كل الكلام الفارغ التم الترويج ليهو بعد الشراكة الجديدة انه القناة خسرانة طلع كذب صرييييييييح ، ومن يكذب في تصديق القناة الجديدة علي انها اقتصادية وهي في الحقيقة منوعات (يعني غش الناس الصدفو ليهو ) ممكن يكذب عادي ويقول القناة خسرانة ومعروف انها ربحانة ، بالمناسبة التقرير ده في الفترة من 2015 والربع الاول من 2016 ( يعني البامية ياها ذاتها فترة الشراكة الجديدة بالضبط). ومن بدأ كاذبا يمكن ان يفعل اي شيء وقد اكد ذلك باب الاخفاقات البند (2) وجاء فيه : (التصرف في اسهم هيئة الاوقاف الاتحادية البالغة 20% من اسهم الشركة بدون مستندات دالة يعتبر مخالفة قانونية وفقا للقانون الجنائي لسنة 1991 يحاسب عليها مجلس الادارة. (وين عثمان فضل الله يارب بقدر يقول رايو ولا ح يكتفي بالتساؤلات المامفهومة). وجود مخالفات في الاجراءات المالية والمحاسبية، وعدم التقيد بقانون الشراء والتعاقد وطرح العطاءات ومخالفته لقانون الشراء والتعاقد، وعدم اظهار ارباح هيئة الاوقاف منذ تاسيس الشركة وحتي العام 2014 .. ونصل التوصيات بفتح بلاغ في نيابة المال العام اسهم هيئة الاوقاف في مواجهة المدير العام والشريك الجديد .. الكلام واضح والشريك الجديد ووووووو استراد الديون والتقيد والعمل بقانون الشراء والتعاقد في العطاءات واظهار ارباح هيئة الاوقاف … وماننسي عدم وجود هيكل وظيفي .. ده الوضع مع الشراكة الجديدة، ودي اجابة لاي واحد كان بفتكر انه طالما شيخ وجدي اصبح صاحب الاسهم الاعلي اصبح المالك وحقو وماف زول يسألوا .. والتفاصيل الخطيرة دي بتقول لا … ولا ولا ولاو انه الشراكة في سنة وربع ادخلت القناة في متاهات لا ليها اول ومامعروف آخرها .. انتظرت تلاتة يوم تقريبا منتظر الطاهر التوم الناطق الرسمي باسم الشيخ وجدي عشان يطلع ويرد علي التقرير الخطير، وعن التجاوزات والاسهم الاختفت والقناة الربحانة وقالوا خسرانة وعن الهيكل الوظيفي الغائب والتمييز في الرواتب، بدل مايكلمنا عن اموال شيخ وجدي الدفعها ومارجعها .. ولكنه صمت في مسلسل الصمت الذي يعيشه هذه الايام. كلمنا يا ابو الطا .. ماذا يحدث في القناة؟ وما انسي اسألك انت لسه السكرتيرة منتجة ولا المنتجة سكرتيرة؟ لسه ما انتهينا يالطاهر.. اواصل
