بالعربي الكسيح محمد الطيب الأمين فطور الجمعة… حظر النشاط الرياضي والثقافي في العشرة الأواخر من الشهر الكريم هو قرار صائب جدا .. وسيكون القرار أعمق إذا شمل (أغاني وأغاني ) أيضا .. لعب الكرة في العشرة الأخيرة من رمضان ربما يكون ( أوجه ) من الغناء في هذه الأيام العشرة .. كل القنوات السودانية تستعد لرمضان الأن ببرامج ( الغناء والرقيص ) .. هسه افرض إنو رمضان ده ما جاء ؟؟ ح تعملوا شنو يعنى ؟؟ نحن شعب يستعد لرمضان ب (الغناء ) .. سبحان الله .. حاجة تكسف .. الجزائر هى : بلد ( المليون شهيد ) والسودان هو : بلد ( المليون فنان ) !! ومليون لمليون يفرق يا مولانا .. في زمن (الأستماع بالكرعين ) اصبح داخل كل بيت ( فنان ) .. نقترح لاتحاد المهن الموسيقية ان يدرس فكرة إستجلاب (مستمعين أجانب ) على طريقة ( المحترفين ) في كرة القدم .. البلد كلها عايزة تغنى عشان كده ما ح تلقو ليكم زول بيسمع .. غايتو جنس غايتو !! حُدد السابع عشر من الشهر الجاري موعدا لجمعية المريخ العمومية .. حددوا التاريخ ولم تظهر قائمة الرؤساء المرشحين .. ولعل هذا يشبه الذي يعلن موعد زواجه قبل ان يختار العروس .. في المريخ توجد أزمة قيادات لا يعلم بها إلا الله .. كل الخيارات المتاحة في المريخ هي (جمال الوالى ) .. زي في ( النكتة ) قالوا في واحدة صوتها سمح إتصلت بالاذاعة وطلبت المشاركة في المسابقة فكان السؤال .. ما هي عاصمة نهر النيل ؟؟ قالت ليهم : ما في خيارات ؟؟ المذيع قال ليها : الدامر ، الدامر والدامر .. ولكنها قالت : (عطبرة ) ومع ذلك فازت بالمسابقة .. هسه جمال الوالى هو كل الخيارات .. عشان كده الوالى قدم شروط مقابل العودة .. وقد كان المشجع المريخي (أبو سوط ) ذكيا حينما أطلق تصريحا صحفيا بالأمس قال فيه : (أنا ممكن أبقي رئيس المريخ لو نفذوا لي شروط جمال الوالى التى طالب بها ) .. فعلا والله .. الشروط التى تقدم بها جمال الوالى لو تم تنفيذها أي مشجع ممكن يبقى رئيس المريخ .. انت يا جمال الوالى قايل الناس دي دايرنك لشنو ؟؟ دايرين قروشك ولما تجي تضع شروط عندها علاقة بالقروش بيكون إنتفى غرض حضورك .. ( خم الرماد ) بمفهوم الشارع هو : إستقبال الشهر الفضيل بالمعصية والعياذ بالله .. ورمضان هو مثل (معاينات الوظيفة ) ، والذى ينوى الدخول في ( معاينة ) يكثر من المذاكرة والاطلاع .. ولكن للأسف الذى ينوى صوم رمضان يكثر من المعاصى قبل رمضان لا تخم الرماد بالمفهوم (الشوارعى ) فقد تموت قبل رمضان بيوم ويكون ذلك بمثابة ( سوء خاتمه ) .. كلف مدرب الهلال بيلاتشي نفسه فوق طاقتها وهو يقوم بمشاهدة المريخ في شريط فيديو أمس الأول قبل مواجهته اواخر الشهر الجاري .. بيلاتشي أراد أن يعرف نقاط الضعف والقوة بالمريخ قبل مواجهته .. وتابع إحدي مباريات النجمة المسجلة .. مسكين بيلاتشي ما عارف إنو المريخ ده زي ( الدنيا ) كل يوم ب (وش جديد ) .. المريخ حاله لا يختلف كثيرا عن حال ( الجنيه السوداني ) فكلاهما يتراجع بشكل فظيع .. المريخ يا بيلاتشي ما بشاهدوهو في شريطك فيديو .. المريخ ده تقابلو في الملعب تغلبوا وتبقي مارق .. بحث بيلاتشي عن نقاط القوة والضعف بالمريخ فوجدها كلها نقاط ضعف .. المريخ في الدورة الأول إفتقد جهود ( اللقيمات ) فترنح كثيرا .. اسوأ ( خمسه ) حاجات في الدنيا دى ( تلاتة ) هى : ( الحب من طرف واحد ) و (قروب الواتساب ) .. في الواتس يدخلوك في قروب انت لا يدك ولا رجلك .. تكون قاعد في صمة خشمك يدخلوك في قروب ينزلوا ليك بطاريتك خمسين مرة في اليوم .. الواحد في القروب يتونس مع حبيبتو وانت ولا كتر خيرك تتابع الونسه .. غايتو جنس غايتو .. بعض الأماكن في شارع النيل بالليل تحتاج لرقابة ورقابة مشددة .. الذى يحدث في شارع النيل من بعض الناس يغضب الله ويجعل النيل نفسه ينام حزينا .. والله أنا خايف يوم تقوموا من النوم الصباح تلقو النيل فارقنا مفارقة الطريفى لجملو .. . ونركب صافنات ونجيبة ( بقارية ) وأصلو الزول بيموت والذكرى تفضل حية .. و ..و .. وأنا قلبي بدق
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
