بالعربي الكسيح محمد الطيب الأمين حتي (لا) بقولوها بالتلتلة !! *عندما كانت الدنيا بخيرها كان رمضان بيدخل العضم بعد 17 يوم من الصيام .. *وفي هذا العام رمضان دخل العضم منذ الساعة الثانية من ظهر اليوم الاول .. *وطبعا رمضان واحد والإختلاف في العضام .. *عضم لعضم بيفرق .. *ربنا يعظم الاعمال ويثبت الاجر ان شاء الله .. *ويا الله مطرة.. * في كل العالم الإنجازات تكون هي خير حملة إعلانية للاتحادات والهيئات قبل الانتخابات .. * وعندنا في السودان اتحادنا العام يعتمد علي الفشل كبرنامج انتخابي .. * والغريب في الامر انه يفوز !! * رغم الفشل بيفوز .. * وهذا يسمي بالفوز المدفوع .. * الناس بتقدم السبت عشان تلقي الاحد .. * وناس معتصم جعفر لا يقدمون السبت ومع ذلك ينتظرون الاحد والاثنين والثلاثاء .. * ينتظرون أيام الله السبعة ويقودون الكرة السودانية من العناية المكثفة الي الإنعاش .. * نسأل الله الذي بيده الملك ان ينزع الملك من معتصم جعفر واسامة ومجدي ومن معهم .. * الخلص العالم من بلاتر قادر ان يخلصنا من بلاترات اتحاد اللقيمات .. * ويالله بطيخة .. * بحسب المتابعين فأن مدرجات استاد الهلال تطرب هذه الايام بالمستوي المدهش الذي يقدمه الثعلب .. * في الوسط الفني أطلق الفنانين اسم ( فنان الفنانين) للراحل خليل اسماعيل .. * قالوا الفنانين لما يكونوا عايزين يسمعوا طرب اصيل بيطلبوا من خليل اسماعيل يغني ليهم .. * والزول لما يكون (فنان الفنانين) هذا يعني انه علي درجة عالية من الجمال الصوتي والتطريب العالي .. * الان صهيب الثعلب يلعب دور خليل اسماعيل في مجال المستديرة .. * الثعلب هو فنان اللاعبين فبعد الاشادة الكبيرة التي حصل عليها من سادومبا تغزل فيه قبل يومين النيجيري شيبولا .. * شيبولا قال ان الثعلب مؤهل للاحتراف في الدوريات الكبيرة .. * يبقي مهم جدا ان يتعامل صهيب مع هذه النعمة الكبيرة بما يلزم من احترام وتقدير واجتهاد فهو فلتة ونجم قادر علي صناعة تاريخ جديد مع الهلال بأذن الله .. * وناس المريخ لو دايرين يسجلوا الثعلب عليهم ان ينتظروا (19) سنة قادمة .. * انتو سجلتوا هيثم بعد (17) سنة وصهيب بيجيكم بعد (19) سنة اما بالنسبة للاخ شيبوب ممكن نشطبوا ليكم بعد عشرة سنوات بس .. * والما عندو ثعلب يشوف ليهو (أرنب).. * غايتو جنس غايتو !! * كانت فتاة شديدة الجمال ولكنها تعاني من (حب الشباب والنمش) بشكل كبير .. * وشها كلو حبوب .. * فسخت هذه الفتاة اكثر من 13 خطوبة بسبب هذه الحبوب الشبابية المنتشرة في وجهها .. * كلما اقتربت مواعيد زواجها تكاثرت الحبوب .. * وكلما تكاثرت الحبوب ازدادت نفسياتها سوء .. * طبعا حبوب الوش بتعمل نفسيات عند البنات .. * والله صحي .. * هذه الفتاة تجدها في كل مرة تطلب من العريس تأجيل موعد العرس بدواعي انها ما جاهزة .. * كل مرة تقول ليهو نأجل العرس انا ما جاهزة .. * تطلب التأجيل بعد ان تستلم الشيلة والمهر وباقي الطيبات .. * تخيل .. بسبب حبوب في وشها تطلب تأجيل العرس ولا تراعي لنفسيات العريس والترتيبات التي اعدها لزفافه وفق تاريخ معين وميزانية معينة .. * تجي ببساطة عشان حبتين تلاتة في وشها تطلب التأجيل .. * القصة دي بتشبه حال المريخ كثيرا .. * المريخ بسبب الحبوب المتناثرة في وجهه تجدة في حالة عدم جاهزية باستمرار .. * طوالي هم ما جاهزين .. * طوالي هم طالبين التأجيل .. * طوالي هم عندهم حب الشباب والنمش .. * وللأسف الاتحاد العام عامل كده زي العريس الضلو ميت .. * الاتحاد ما طلب منه المريخ التأجيل إلا ووافق دون تردد .. * لا يفرض طلب للمريخ .. * ما بعرفو يقولو (لا) للمريخ .. * وحتي (لا) لو قالوها بقولها بتلتلة . * او بالاصح هم لا يرفضون طلب لجمال الوالي .. * وذلك لان جمال الوالي لا يرفض لهم طلب خاصة اذا كان طلبهم له علاقة باللقيمات ومشتقاتها .. * الان كل المطلوب ان يكون هنالك رأي واضح وقرار صريح من قبل اندية الممتاز تجاه هذا الاتحاد الهزيل .. *القصة بقت واضحة الاتحاد يقوده جمال الوالي .. * وانا اجزم لو ان اسامة ونسي طلب التأجيل لما استجابوا له .. * ولكنه جمال الوالي .. * دوري اللقيمات يحتاج لعين حمرا من جميع الاندية وعلي راسها الهلال .. * ويا الله مطرة .. * في بعض ولايات السودان كان اول ايام رمضان باردا جدا .. * في واحد قال لي شدة ما اليوم حلو انا ما عرفت ده رمضان الا بعد ما شفت السر قدور .. * ديل من برودة الطقس رمضان بعرفو بالسر قدور .. * ايامكم والله .. * لا أعرف لماذا يرضي وليد علاء الدين ان يكون (تاني ناصية) مع ان امكانياته الفنية تؤهله ليكون (ناصية)? * وليد محتاج ان يصحصح الغيرة الحميدة في قلبه حتي يكون علي قدر امكانياته .. * يجب ان يستفيد وليد من شطارة أطهر الطاهر وأبوعاقلة وشيبوب فهؤلاء هم ابناء جيل وليد .. * بمناسبة وليد .. * الموهبة الوحيدة الموجودة في المريخ (برنس عطبرة) بينما الهلال كلو برنسات .. * وبرنساتنا دي لو اجلتو مباراة القمة ولا ما اجلتوها هم قاعدين .. * وفي الختام نعزي كل الرياضيين في وفاة الملاكم محمد علي كلاي ونخص بالتعزية الأخ حاتم محمد أحمد .. * ونركب صافنات ونجيبة (شايقية) وأصلو الزول بيموت والذكري تفضل حية .. * و..و.. * وفي بعدك يا غالي … (الحلو مر أصبح خالي من الحلو)..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
