بالعربي الكسيح محمد الطيب الأمين تشكيلة الهلال ضيقة !! * لكل إنسان مجموعة (حواس) .. * حاسة الشم وحاسة النظر والتذوق والسمع وغيرها .. * ولكل حاسة مهمة ودور تلعبه ، وهو دور بالضرورة يتباين بتباين الحواس نفسها .. * يعنى (النظر) ما ممكن يأكل ولا السمع ممكن (يشم) .. * والفم ما ممكن يسمع .. * وكل هذه الحواس تنشط عندما يكون (الأكل) أمامك .. * قبل ما تصل مرحلة تذوق الطعام فأن العين تشبع منه (نظريا) والآنف تشتم رائحته (حسيا) ، والآذن تسمع حركة الصحون (صوتيا) .. * في ناس الواحد لو ما عاين للبطيخة ربع ساعة ما بأكلها .. * المعاينة ترفع درجة الشهية .. * وكمان في ناس بستمتعوا جدا ب(الريحة) .. * يخت ليك صحن الشية ويستنشق رائحتها لمدة خمسة دقائق بعد داك يضرب .. * وناس القهوة برضو .. * ناس القهوة لو ما سمعوا صوت الملعقة بيلعب في بطن الفنجان ما بيشربوا .. * أنا أسف والله جبت ليكم السيرة دي في الوقت ده .. * قالوا الإستماع لأغنية (لون المنقة) في نهار رمضان ممكن يجرح الصيام .. * ومقدمة هذا العمود لا تجرح الصيام ولكنها تجعلك تحس بأن آذان المغرب تأخر عن موعده .. * المهم .. تعدد صنف الطعام في الغالب يسد النفس .. * لما يعزموكم عشاء (بوفيه مفتوح) ما بتقدر تأكل كتير .. * بتحس بنفسك مصدوم .. * قبل ما تصل البيت بيكون البوفيه المفتوح الأكلتو راح شمار في مرقة .. * عكس إنك لما تمشي محل ويعزموك (فتة فول) .. * تضرب فتة فول في العشاء لحدي فطور باكر بتكون شبعان .. * والله صحي .. * وحاليا تشكيلة الهلال هي مثل (البوفيه المفتوح) .. * فيها ما لذ وطاب .. * في تشكيلة الهلال بتلقي (المحشي) وبتلقي (سلطة الأسود) وبتلقي (الضلع) .. * طبعا في تشكيلة المريخ ممكن تلقى (المفروكة) .. * مفروكة في الهلال ما في .. * تعدد أصناف النجوم بفريق الهلال بالضرورة يجعل بيلاتشي مصدوما .. * لا أحد يحس بما يحسه بيلاتشي الآن .. * أحساس صعب جدا .. * إحساس إنو قدامك أكل سمح وانت ما قادر تأكل رغم إنك جيعان .. * ده إحساس بيلاتشي حاليا .. * بيلاتشي يحس بأن التشكيلة ضيقة .. * يريد أن تكون التشكيلة أوسع من (11) لاعبا .. * وهذا الأحساس سببه تعدد المواهب والمهارات والإمكانيات بالفريق .. * أنا أجزم بأن بيلاتشي على رأس كل ساعة يضع في رأسه تشكيلة مختلفة .. * مرة يقول : (يلعب الثعلب وشيبوب وشيبولا) .. * وبعد شوية يقول : (يلعب نزار والشغيل ووليد) .. * وبعد شويتين يقول : (يلعب أبو عاقلة وبشة وكاريكا) .. * رأسو ضرب .. * عشان كده لو بيلاتشي الليلة فشل في وضع التشكيلة المناسبة سنجد له العذر .. * لن نلومه .. * أي زول في حتة بيلاتشي رأسو ح يضرب .. * والعكس تماما في المريخ .. * التشكيلة في المريخ معروفة وثابتة وما دايرة ليها درس عصر .. * أمير كمال ، رمضان عجب ، على جعفر ، مصعب عمر وكده .. * ما دايرة إجتهاد .. * محسن سيد يلبس فانلتو ديك ويجى يدخل أى حداشر .. * كلهم مستواهم زي بعض .. * مستوى دون الوسط .. * تتطلع منهم أبراهومة الصغير والباقين زي بعض .. * وأبراهومة الصغير بحمدلله الكاردينال لقى ليهو عرض مميز جدا مع (سموحة المصري) .. * شهر أطناشر بأذن الله أبراهومة يمشي سموحة يلعب ستة شهور وشهر ستة يجي يعلب مع زميله شيبوب الذي عاد من رحلة احتراف أكثر من رائعة مع الأشقاء في شيبية القيروان .. * بالمناسبة .. * إحنا والله نتمى أن يؤدي الهلال مباراة ودية أمام شبيبة القيروان عقب عطلة العيد .. * شبيبة القيروان والكوكب المراكشي .. * مع الشبيبة نلعب حتى نشكرهم على تعاونهم الطيب معنا فيما يتعلق بصفقة النجم شيبوب .. * ونلعب مع الكوكب المراكشي حتى نعيد المياه لمجاريها بعد ان خربها الوصيف (أبو طبع كعب) .. * نرجع ونقول .. * مباراة اليوم هى من المباريات الصعبة فعلا .. * ولكن ثقتنا في الهلال لا حدود لها .. * إعداد الهلال لهذه المواجهة بلغ ذروته .. * سنوات طويلة ولم يتوفر للهلال إعداد بهذا الشكل .. * وأقصد الفترة الزمنية التى شارفت على ال(60) يوما .. * قد تكون فترة غير كافية بالنسبة لمدرب جديد ولكنها فترة تكفي لصناعة فريق محترم على أقل تقدير .. * ووفق معطيات هذا الإعداد النموذجي نبشر جمهور الهلال بفريق جديد وقادر على لعب الكرة كما يجب .. * وكل الأجواء بالهلال أصبحت مساعدة للعطاء بعد المبادرة التى أطلقها الكاردينال ورفع من خلالها قرار حظر الإعلام ودعوته لكبار الهلال للإقتراب والإلتفاف حول النادي .. * هذا عمل طيب من الكاردينال في أيام طيبه نرجو له التوفيق والسداد .. * فقط تبقت مشكلة محمد عبد الرحمن وبأذن الله الكاردينال قادر على حلها لان أبوحميد (زول ما ساهل) .. * فريق الخرطوم الوطنى من الفرق المحترمة ولذلك إحترامه واجب حتى نحقق ما نريد .. * لا نقول مباراة اليوم إعداد للقمة لان الخرطوم أفضل من المريخ .. * الزول بيستعد بالساهل (تدريجيا) عشان يقابل الصعب .. * والهلال الليلة ح يلعب مع الصعب عشان الأسبوع الجاي يلعب مع الساهل .. * يبقى تعاملنا مع مباراة اليوم يجب ان لا يتجاوز حدود اللقاء .. * لا نفكر إلا في الخرطوم الوطنى .. * ونسأل الله ان يجعل مباراة اليوم هي بداية لمشوار هلالى حافل بالنجاحات والتفوق .. * نريدها أن تكون نقطة إنطلاقة حقيقة لمسيرة تستهدف ألقاب كبيرة ومهمة على كافة الأصعدة .. * وجمهور الهلال العظيم أصلا لا يحتاج لدعوة فهو يعرف واجبه .. * والكل في شوق للهلال ولذلك هى سهرة رمضانية لا تقبل التأخير .. * أما بالنسبة لأهلى شندي فيمكنه أن ينجز مهمته بقليل من التركيز .. * المريخ الآن في أضعف حالاته والفوز عليه أسهل من ساهل .. * نعتذر اليوم عن مواصلة مسلسل جمال الوالى الشهير ب(عزو) وقصصه المثيرة للضحك ، على أن نواصل إعتبارا من الغد والايام التالية .. * ويا الله مطرة .. * ونركب صافنات ونجيبة (بطحانية) وأصلو الزول بيموت والذكرى تفضل حية .. * و..و.. * وجيت أهنيك وأصافحك وجيت أقول …(أول الشهادة السودانية هلالابية كالعادة ياسادة)
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
