في السلك بابكر سلك عشان فطومه عيانه * في شندي كان الاداء بروح فيها ريحة المريخ * ولكن ما سمعنا به من احداث وما شاهدناه امر يفرض علي نفوسنا الدهشه * لماذا مثل هكذا تصرفات في معظم مباريات المريخ بالولايات * وفي مدن بعينها * ايها الناس * الرياضه قبل كل شئ محبه واحترام * ولو فقدت تلك الصفات اخير عدمها * المريخ مامقطوع من شجره * وجماهيره لا يوجد بينها اولاد ميكي * نستطيع ان نحمي لاعبينا وجماهيرنا بقوة وشراسه * ونستطيع ان نحتل اي بقعه في الارض ونرفع عليها علمنا عاليا خغاقا * ولكن لانميل لذلك لاننا نحترم كياننا وانفسنا * ونحترم الرياضه والرياضيين * ولاننا نؤمن بان بلدنا ماناقصه * ايها الناس * انها دعوه نقدمها للوسط الرياضي ان يسمو باخلاقه ويحترم الروح الرياضيه كي نتفرغ لما يقدم مستوياتنا في اللعبه * لان التهاتر والتراشق واختلاق الاختناقات لا يقودنا الا لحرب ضروس لا اظن ان الكاسب فيها فائزا باي حال من الاحوال * دعوه للجماهير كي تعود لرشدها وتردع المتفلتين لتعيد للوسط الرياضي روحه الرياضيه * ايها الناس * جماهير المريخ في اي مدينه تمثل غالبية اهل المدينه * وفي امكانها حماية المريخ وجماهيره التي لاتدعه يسير وحيدا * مهما كلفها الامر ومهما كان التمن * امنياتنا ان لا تضطر جماهير المريخ في المدن المعنيه وماحولها لاستعمال القوة حماية للكيان * ونلفت نظر السلطات بالتشدد في حفظ الامن * والتشدد مع من يتفلت * ونسأل السلطات القضائيه ان تردع كل من يثبت تفلته امامها * وبرضو نتمني ان لا تضطر السلطات الامنيه ولا القضائيه للتعامل بذلك التشدد مع منسوبي الوسط الرياضي * ولسه نحنا بنغني * نحنا في الوسط الرياضي لابنخاصم لا بنعادي * أأمل ان يقف كل فرد في الوسط الرياضي مع نفسه في هذه النقطه بالذات حتي لا نجبر علي ماعدا ذلك * المهم *الاداء في شندي كان فيه بادرة اشراق كبيره * وبعد تحليلنا للمباراه وبالرجوع للمعطيات * نتفاءل جدا بالنصر الكبير تحت اشعة الرتاين * بالمناسبه *كورة الخرطوم الوطني برضو شفناها * الروماني ده اظنو شايل اصبعو بحجر النار * ماظهرت ليهو ولابصمه * ولم نشاهد مايقرأه الناس في صحف ناس روشا واعمدة ناس رمضان ومحمد عبد الماجد * لا خطط ولا انسجام ولا فريق يرهب * الحال ياهو نفس،الحال * فداسي يقبل يمين ويميل شمال ذكرنا رقيص العروس * الشغيل في تقلتو ونزار ابو القدح بس * والدمازين لسه بستفيد من اخطاء الحكام الغير مقصوده في التساهل معه ووأد البطاقات الملونه امامه * اما الحاج كاريكا فحدث ولا حرج * بشه نفعو حظو في الهدف اليتيم *اما ساسا فده غزال بزوزي بيكم ساااي يا روشا * الفريق الشفناهوا امام الخرطوم الوطني ده لو ماغلبناهوا اقل شي تلاته يبقي برهان ماشايف شغلو * ايها الناس * اعلام الهلال خدع الاهله الشرفاء * فحضروا ولم يجدوا الفريق ولا بصمات المدرب ولا تشكيلة من التشكيلتين الحيرن المدرب * فايقن الاهله الشرفاء بان اعلام كردنه قد خدع جماهير الهلال * وطلعوا زعلانين وخجلانين * اجمل مافي المباراه انو العمال كانوا شغالين اثناء الكورة واللاعبين ماشغالين اثناء الكورة * كردنه كب اسمنت صاح * وشتت السيخ فيهو بالطريقه الصاح * ويحضرني سؤال لروشا قبل سنين لما قال جمال جاب القروش من وين * نسأل ياروشا نفس سؤالك * كردنه ده قروشو دي قروش نصاح ولا قروش مانصاح?? * ووقتها طالب روشا البرلمان بالتحقيق مع جمال * فهل نطالب نحن كذلك ياروشا ولانخلي طابقكم الجديد مستور * ايها الاهله الشرفاء * ماتزعلوا * يمكن الهلال لعب كعب كده عشان فطومه اختي عيانه * باقي فطومه هي الكل في الكل * يتعافي،الهلال بعافيتها * ويمرض ابو الهل بي شنبو الكبير ده لمرضها * واليومين دي فطومه عامله عمليه * الله يستر الهلال مايعمل برضو عمليه * عجوبه ياخ * ايها الشفوت * النفرة ثم النفره ثم الدعم * الدعم ثم الدعم ثم الاستثمار * ويوم عشرين الفرحه فرحتين * لانو الشفناهوا بعد الكورة بين الاهله الشرفاء * هو اعلان لفوز عريض للمريخ *ايها الناس * سيحاول الضعفاء استمالة الظروف والحروف لتنقذهم من الخساره امامنا * لكن لن ندعها تنجح هذه المره * ونحذر التحكيم والتنجيم والحروف * ايها الناس * ان تنصروا الله ينصركم * اها * نجي لي شمارات والي الخرتوم * والينا * المويه دي قدرت عليكم وعلينا??? * العيب في النيل ولافي الترحيل ولافي الماسوره?? * ولا في الماسورة المشغله الماسوره * ولافي الماسورة المسؤله عن الماسوره المشغله الماسوره * ولا في الماسوره البتصدق كلام الماسوره المسؤله عن الماسوره البتشغل الماسوره وراجيه المويه تكب من الماسوره?? سلك كهربا ننساك كيف والكلب قال بلد زي اللديتر كلها مواسير... فوق ماسوره وتحت ماسوره وفي النص ماسوره وقافلات كم ماسوره عشان كده اللديتر فاير والي لقاء سلك