في الصمت كلام محمد عثمان بلل هي بقت علي الطبيب الهلالابي عارفين ناس الوصيف ديل ظريفين خالص .. قاموا بتعيين طبيب شاب ضمن الجهاز الطبي للفريق قبل مباراة الامير الاخيرة في الدوري الممتاز ..كدا تمام .. بعد شوية في واحد اكتشف الذرة وقال ليهم انا ادخلت حسابو في الفيسبوك ولقيتو بشجع الهلال ومنزل كم منشور كلو عن الهلال .. طوالي ما صدقوا وقرروا اقالته بعد ساعات من تعيينه .. بعدين تعالوا هنا هي بقت علي الطبيب بس .. مش كانت في اشاعات قوية انو كم رئيس حكم الوصيف هلالابي .. وتاني كم لاعب ارتدي شعار الوصيف برضو هلالابي .. ويعني شنو الموضوع عندكم اكثر من عادي .. عشان ابناء الهلال هم قادوا الوصيف لتحقيق النجاح .. ومن غير الهلال اصلا خلاكم تحققوا النجاح ولولا ابناء الهلال ما كان الوصيف صعد حتي اليوم لدور الثمانية في دوري ابطال افريقيا .. عشان الفترة ديك كان كشف الوصيف ما شاء الله مليان بأبناء الهلال الكان سجلهم بعد ما تم شطبهم من الهلال .. وبعد دا نجحوا في قيادة الوصيف للصعود لدور الثمانية .. حكاية غريبة لكن … وبالمناسبة لو ما عرفتوا من حسابو في الفيسبوك انو هلالابي ما كان المجلس اقالوا من العمل في الجهاز الطبي .. يعني لو المجلس عرف الكلام دا انو الطبيب الجديد هلالابي ومافي زول تاني عرف بالحاصل كان ح يكون مبسوط لانو نسبة نجاحوا مضمونة مية في المية عشان هو واحد من ابناء الهلال .. بعد الشلاقة خلت الناس كلها تعرف الحاصل شنو .. اسي عليكم الله كدي براكم احسبوا لينا عدد الهلالاب القاعدين في مجلس الادارة وتاني احسبوا لينا عدد الهلالاب الموجودين في كشف الفريق طبعا ديل اي زول عارفهم ما محتاجين تورونا ليها. (صمت اخير) .. هي بقت علي الطبيب الهلالابي.
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore