في الصمت كلام محمد عثمان بلل (اها بعد دا كلو كان الوالي ما رجع) دخل اهل الوصيف في فرح عارم وسعادة غامرة بعد شائعات قوية بعودة جمال الوالي رئيس النادي السابق الي منصبه من جديد .. هللوا وكبروا لعودة رئيسهم المحبوب واقاموا الاحتفالات ونحروا الذبائح ووزعوا الحلوي وتبادلوا التهاني فيما بينهم وارتفعت معنويات اللاعبين .. والجميع اصبح يحلم من جديد بعد اعلان عودة الوالي لرئاسة المريخ .. وقد ظهرت بعض الوجوه التي اختفت بعد ابتعاد الوالي والتي تتأهب للاحاطة بالرئيس المحبوب مرة اخري كالسابق. (بس المشكلة) حتي اللحظة لم يؤكد جمال الوالي شخصيا امر عودتة للمريخ بعد كل هذه السعادة في ديار الوصيف (افتكر الجماعة ديل رايحه ليهم فرحة ساكت ولو ما كانت رايحة ليهم ما كان عملوا كدا) .. (يااخ ديل كل ما تلاقي فيهم زول في الشارع وهو غرقان في السعادة تحلف تقول المريخ جاب كأس افريقيا) .. (جد والله الوالي ما قال انو جاي يا جماعة الخير) .. (انتو تفرحوا ساكت كدا). فعلا مشكلة كبيرة اذا خرج الوالي ونفي كل ما تم تداوله (يا ربي موقف الناس ديل ح يكون شنو) .. (غايتو النشر الاشاعة دا شكلوا هلالابي) .. حالي كل الانظار اتجهت الي باب منزل الوالي في حي الصفا بالخرطوم في انتظار خروجه واعلان ذلك بصورة رسمية .. ولا نستبعد ان يقيم البعض هناك امام منزل الوالي في انتظار خروجه من اجل اعادة ايام زمان. كل ما نخشاه ان ينفي الوالي كل ذلك بعد نحر الذبائح ورسم الاحلام العريضة من جانب البعض .. (الله يستر) ان يصاب البعض ببعض الامراض المزمنة في حال نفي الوالي امر عودتة للمريخ من جديد .. (والله دا يخلي الما بشمت يشمت) والما عايز يشتري يتفرج. (عارفين الوالي كان ما رجع ح يقول ناس الوصيف ديل الهلالاب عملوا كدا). انتو يا اهل الوصيف لجنة التسيير دي ما عاجباكم. ديل (شالو الشيلة) بالرغم من عدم توفر المال. (والله انتو ناس طيبين خالص). (صمت اخير) .. الهلال مفخرة داخل وخارج الجوهرة. (اها بعد دا كلو كان الوالي ما رجع).
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
