بالعربي الكسيح محمد الطيب الأمين (لمبة) المطبخ ما شغالة !! * (9) شهور منحها سعادة الوزير للاتحاد العام في قرار مفاجئ ومُحبط .. * ولكن هذه الشهور التسعة لن تُغطى (عوارت) سنوات طويلة إختلط فيها الفساد بالظلم حتى أصبح نصير الاتحاد بالأمس هو عدو اليوم .. * من حق قادة الاتحاد العام أن يمدون لسان السخرية لان ما قرره سعادة الوزير فاجأ به حتى أسامة عطا المنان .. * معتصم جعفر لو صدق مع نفسه سيخرج بتصريح يقول فيه : (فاجأني الوزير) .. * حاجة تكسف والله .. * قبل أربعة سنوات وبعد الفحص تأكد ان (تربة) إستاد المريخ فيها (ديدان) .. * وخبر (الديدان) إتنشر في الصحف ووجد حظه من التداول وقتها .. * الآن يبدو أن نجيلة إستاد الحكومة تعانى هذه الأيام من (جرثومة المعدة) .. * شكلو الديدان إتحولت لجرثومة معدة .. * غايتو نجيلتكم دى يا عندها جرثومة معدة ويا كمان عندها مصران عصبي .. * حيرتونا والله .. مرة ديدان ومرة أهمال ومرة التربة مالحة ومرة الأرض ما ثابتة .. * غايتو الأنا متأكد منو (البامية ما ياها) .. * لما تزرع نجيلة في (حفرة) تأكد إنو النجيلة بتبقى (برسيم) .. * حفرتكم دى إلا تزرعوا فيها (صباح الخير وجهنمية وسيسبان ونيم) .. * لكن أصلا ما في نجيلة بتقوم ليها في حفرة .. * الكورة عرفناها ما عندكم .. فهم ساكت ما في ؟ * من الله خلقك سمعت ليك بنجيلة أكلها ديدان ؟؟ * لكن أقول ليكم حاجة .. * أرموها في أسامة ونسي .. * قال ديدان قال !! * ديدان ب(الثاء) ؟؟ * كلما أشوف مهند الطاهر بره كشف الهلال ومعاوية فداسي جوة كشف الهلال بردد رائعة الطيب عبد الله : (مسكينة المحبة البتمشي لناس ما بتقدر) .. * الإستغناء عن الغزال والتجديد لمعاوية فداسي يؤكد أن إدارة الكرة عندنا تتم بالمزاج والعلاقات الشخصية .. * والله يجازي الكان سبب .. * أكتر (5) سعداء بقرار الوزير الخاص بالتمديد (3) هم : قادة الاتحاد وأهل المريخ .. * يعنى الفرحانين بالقرار هم : (البعمل اللقيمات والبأكل اللقيمات) .. * وهذا فرح سيعقبه حزن طال الزمن أو قصر .. * الحق سيعود لان الباطل زهوق .. * بمعنويات عالية عاد نجم المستقبل ولاء الدين من رحلة المنتخب الموفقة .. * إستثمار معنويات ولاء الدين ستجعله يفجر إمكانياته في المباريات القادمة فقط المطلوب أن يتيح له بيلاتشي فرصة المشاركة .. * ولاء الدين لو لعب خمس مباريات ورا بعض لن يجلس في الكنبة مطلقا .. * الزول ده محتاج ثقة وإستمرارية في المشاركة وبس .. * فهل يوفر له بيلاتشي هذه العوامل الميسورة ؟؟ * نأمل في ذلك .. * من الغباء أن تشتري عمارة من أربعة طوابق ثم (تنط من البيعة) لأن (لمبة المطبخ ما شغالة) .. * من يفعل ذلك يذكرني بإعلام المريخ الذي ترك كل شئ ومسك في (جائزة نجومية المباراة) التى مُنحت لبلة جابر .. * تشوف كتابات إعلام المريخ تظن أن كل مشاكل (الإصيفر) تنحصر في الجائزة .. * قالوا بلة جابر ما بيستاهل الجائزة .. * طيب بيستاهلها صلاح نمر الشهير ب(النفق) ولا شنو ؟؟ * هنالك وجه شبه كبير بين صلاح نمر و(نفق) جامعة السودان .. * غايتو جنس غايتو !! * ورد في الأخبار أن نادى المريخ قد قام بطرد طبيب الفريق مجذوب التيجاني بعد أن إكتشفوا أنه هلالابي .. * يعنى خلاص إكتشفتوا الذرة ..؟ * ما لازم يكون هلالابي ..؟؟ * البلد دى غير الهلالاب فيها منو ؟؟ * بعدين يا أخ خلاص هى بقت على الطبيب ؟؟ * يعنى خلاص الطبيب هو الهلالابي الوحيد الموجود في المريخ ؟؟ * الناس ديل مالهم بقوا كده ؟؟ * ناس المريخ ديل زمان ما كانوا كده .. * كانوا شوية أحسن من كده .. * قالوا الطبيب هلالابي .. * علما بأن دور الطبيب ينحصر في علاج المصاب وليس إصابة النصيح .. * يعنى ما عندو تأثير قدر تأثير بكرى المدينة والمعز وعمر بخيت وعبد جابر وعلاء يوسف .. * شنو يعنى لو هلالابي ؟؟ خايفين يكون مدسوس مثلا ؟؟ * هسه إنتو مستواكم ده بحتاج يدسو ليكم زول ؟؟ * ولا خايفين صلاح نمر يتعرض لإصابة ويقوم الطبيب يشخص الحالة غلط عشان يضر المريخ ؟؟ * بصراحة انا ما عارف الطبيب ده طردوا ليه ؟؟ * كونو هلالابي ده ما سبب لأنو الهلالالاب داخل المريخ على قفا من يشيل .. * شوف ليكم سبب تانى .. * ريتشارد والبلدوزر وطمبل ومجاهد وطارق مختار وهيثم مصطفى وعبده جابر وبكري المدينة والمعز محجوب وبرنس عطبرة وعمر بخيت .. ديل شنو ؟ هلالاب ولا صينيين ؟؟ * يقول ليك الطبيب هلالابي !! * وهو المريخ حاليا ماشي بفضل الهلال .. * هسه أسألكم سؤال .. * ممكن ؟؟ * إنتو ال(28) عضو الفي المجلس ديل هل كلهم مريخاب ؟؟ * جاوبوا ؟؟ * ما تسكتوا .. * أنا عندي إحساس إنو ال(28) ديل فيهم (19) هلالابي .. * إحساسي كده .. * وأى زول طبعا حر في (محاسيسو) .. * فعليكم الله بطلوا الفشخرة البتعملوا فيها دى .. * لما جبتوا ريكاردو قلنا ما مشكلة ده زول برازيلي .. * مشيتوا جبتوا المترجم الهلالابي (خالد أمبدة) .. * لما جبتوا مترجم ريكاردو الهلالابي ليه ما خفتوا إنو يترجم ليهو غلط ؟؟ * حركاتكم دى ما كويسة والله .. * البتعملوا فيهو ده غلط .. * لكن ما مشكلة بنعذركم .. * بنعذركم لانو فريقكم تعبان ونجيلتكم فيها ديدان .. * الغريبة إنو المريخ إستند في قرار طرد الطبيب على (ونسة واتساب وفيسبوك) .. * والله صحي .. * خبر إنو الطبيب ده هلالابي ظهر في قروبات الواتساب .. * وناس المريخ عشان عندهم إحساس إنو كل الناس هلالاب طوالى طردوهو دون التأكد من معلومة الواتس .. * هسه أنا أديكم النجيضة الما بتعرفوها ..(رمضان عجب هلالابي بيضارب) .. * والأيام ح تثبت ليكم كلامي ده .. * رمضان عجب لن يلعب للمريخ بعد إنتهاء فترته الحالية .. * وإنتو في وإحنا في .. * ونركب صافنات ونجيبة (موردابية) وأصلو الزول بيموت والذكرى تفضل حية .. * و..و.. * والعارف عزو مستريح ..
حمل تطبيق كورة سودانية لتصفح اسهل لزوارنا من السودان على متجر 1موبايل http://www.1mobile.com/net.koorasudan.app-2451076.html لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app لزوارنا من الصين الشعبية http://www.androidappstore.mobi/EN/displayproduct/112531/playstore
