بابكر سلك أكتب بين شوطي مباراتنا ضد أهلي شندي شغلنا في بدايات سلم النجومية الظاهر مغظمهم لم يتحمل تلك النجومية بالذات التكت عالة كبيرة علي الفريق لا قيام بواجبات دفاعية ولا تنفيذ مهام هجومية ونسي التكت أن بينه وبين النجومية الكبيرة مسافة كبيرة جداً وإذا إستمر بهذا المستوي قطعاً سيخرج من القلوب قبل الكشف أما رمضان عجب فعجب عندما يستلم زميله الكرة يقفل الملعب ويضايق زميلو ولا يتحرك في الفاضي يتحرك بعد لعب الباص ويفقد الباص معناهو رمضان مجهود وافر بدون تفكير بالعضل يفعل المستحيل ثم يجمد الفهم ليمرر في المكان الوحيد الغلط هنات كبيرة أمير كمال لا زال يؤخر الكرة دون مبررات لتفقد خطورتها أما محمد عبدالرحمن فحيرنا عديل كده عموماً الأداء كان فيه شئ من الطاؤوسية المقرفة في الشوط الأول فتحمل النجومية صعب بالذات لي زول بفتكر إنو النجومية هي حلاقة غريبة وسيستم وتغيير مشية القصة دايرة مزيد من الجدية يا صديقي محمد موسي فالجماهير يا دوبك بدت تعود للمدرجات لا تعيدوها للسكنات المهم قروب الصفوة العالمي حقق السبق بتقديمه لجائزة شهرية لنجم الشهر من المريخ وكانت الروعة في تسمية الجائزة بإسم إيداهور يعني التفاني والإخلاص للشعار وإحترام الكيان والجمهور شكراً قروب الصفوة العالمي وفي إنتظار بقية القروبات لتدلوا بدلوها بالذات القروبات التي تنتمي للكيان في المقام الأول المهم ستبدأ حرب لتصفية التش من قبل الخصوم تحت راية يخطئ ولا يظلم لكن ليعلم الجميع أن التش ثورة قومية يجب الحفاظ عليها وأن المساس بها هو خيانة وطنية من الدرجة الأولي وأن جماهير المريخ تستطيع أن تحمي نجمها في كل الأحوال وأن الحسادة لا داعي لها وأن التش ما زي شلش وأن التاج كورتو قدييييييمة أيها الناس رسالة للعقرب راجع نفسك يا كابتن مستواك حساي والجمهور نساي لكن المحيرني إصرار محمد موسي علي بقاء المدعو هاشم التكت فالتكت لاعب مهول الإمكانات وحوام ودقيق في التمرير ولكنه بالأمس ما كان في يومه أيها الناس أكتب الآن بعد نهاية المباراة دي موش كورة دي مزيكا فعلاً كانت سهرة رائعة وها هو التكت الذي إنتقدناه في هذا العمود يصنع هدفان للتش وبإحترافية عالية وبرغم كل ذلك لم يكن في يومه لأنو التكت لو كان في يومو كان أهلي شندي أخذ مازمبية زايد ثلاثية أيها الناس التش ده جنسو شنو ؟ إنسان ولا جان ولا شيطان ولا ملاك ؟؟ التش ظاهرة كونية ربنا يحفظو ولا حلول مع هذا المحلول كلب بوليسي ما بيقدر يحرسو شايل أمر التفتيش العام ده ويفتش من طرف شد حيلك يا الدمازين حا تتفتش كتييييير التش ما بتقبض بأمر قبض ما بتقبض قدرك وحده هو الذي يضعك أمام التش والكورة في رجلو بفتشك بفتشك يا أبوعاقله أيها الناس تم إعلان تتويج نمر بجائزة إيداهور الأولي لشهر إكتوبر المقدمة من ملتقي الصفوة العالمي نمر إستحق الجائزة لمستواه المتطور ويا ناس ملتقي الصفوة جهزوا جوائز كتيييييرة المواهب الحمد لله بالكوم أيها الناس ده حالتو السماني مافي لكن التش كشة مرور في شارع مافيهو تقاطع ما بتقدر توقفو الله يحفظو أيها الناس ما هي علاقة الإبداع في المريخ بكرنة ؟؟؟ العقرب والغربال هدية مباشرة من كردنة السماني التش محمد آدم هدايا غير مباشرة من كردنة وأكبر هدية قدمها كردنة للمريخ هي تسجيل أب سته وجابسون وإبراهومة السواها كردنة في الهلال زي السواها ديك العدة في العدة يهشوهوا من صحن طلص عادي يقع في أكبر سرويس صيني يكسروا حتة حتة يخلوهوا في العدة يكسرها يهشوهوا من العدة يلحقها أمات طه لكن يا محمد موسي مامادو ما بقعد بره أيها الناس بالأمس عاد لينا مريخنا البنعرفو مريخ زماااااااااان لو دايرو يهيج فيك جيب فيهو قون لو جبت قون في مريخ زمان في الدقيقة التانية من الوقت بدل الضائع المريخ بدرن وبغلبك في الدقيقة الفضلت إنها روح المريخ التي ظننا أنها قد فارقت جسد الإنجاز ولكن بحمد الله كانت القصة مجرد غيبوبة الروح لسه قاعدة نمسك فيها قوي يا روح ما بعدك روح لكن التش مبالغة أيها الناس بعد الكورة قاعدين في محل فولة مستمتعين بسهرة الزعيم نعدد في مواهبنا جمبنا هلالاب منططين عيونهم ومتابعين كلامنا حسبنا لينا زي تسعطاشر موهبة ومهارة جماعتنا غارو واحد فيهم قال لي يعني الهلال ما فيهو مواهب ؟ قلت ليهو فيهو مواهب قال لي زي منو ؟ قلت ليهو أديني أسبوع أفتش واجي أكلمك قال مواهب قال مواهب فاروق ؟؟؟ أيها الناس كردنة لم يخدع الأهلة ما قال ليهم سجلت ليكم مواهب قال ليهم سجلنا جابسون عشان نقعدوا في الكنبة ونتفرج في ركبتو أها يا روشا إتفرجتوا في ركب جابسون ؟ إتفرجوا علي ركب جابسون الشمال معطوبة أكتر من اليمين أقصد إتفرجوا في ركبة جابسون الشمال موهوبة أكتر من اليمين أيها الناس عادت الجماهير للمدرجات فلا تبعدوها مجدداً بالتراخي والطنقعة ومامادو ما بقعد بره يا موسيس أيها الناس إن تنصروا الله ينصركم أها نجي لي مارات والي الخرتوم في شمار مغربل إسمو التش يا والينا دخل البلد جِد لينا سلك كهربا ننساك كيف والكلب قال انا لو بعد العمر ده بقيت كلب بوليسي البقدرني علي جنس ده شنو؟؟؟!!! والى لقاء سلك
