محمد الطيب الأمين أرأيتَ عيناً للبكا تعارُ ؟؟ * من الجهل الشديد أن تنتظر (الأقدار) حتى تكون بمثابة مبرر لإخفاقاتك .. * ومن السيئات الكبيرة أن تعتمد على سياسة (الإطفاء) المؤقت لحلحلة مشاكل هي في الأصل تحتاج لحل من الجذور .. * نسعد عندما يتعثر المريخ في نيالا ونفرح بذلك ولكن هل تعادل المريخ أو خسارته فيها (حل) لمشاكل الهلال ؟؟ * تغطية فشل الهلال بسقوط المريخ هي من السياسات العرجاء التي يطبقها الكاردينال ويجيدها .. * وإذا نظرت لفترة الكاردينال خلال السنوات الأربع الماضية تجده يستخدم سياسة الإطفاء المؤقت ويظن أنه وصل للحل .. * وهذا ما جعل عدد المدربين الذين أشرفوا على الهلال إبان فترة الكاردينال (19) مدرب.. * (19) مدرب لأنه يلجأ للحل المؤقت ويطفئ الفشل بالإقالة .. * المدربون الذين أشرفوا على الهلال في عهد الكاردينال هم أكثر من عدد المدربين الذين أشرفوا على الهلال في كل فترات (الحكيم والأرباب والكيماوي وشيخ العرب والحاج عطا المنان) .. * عدد مدربي الكاردينال يعادل عدد خمسة رؤساء جلسوا على كرسي رئاسة الهلال .. * وطبعا (الشماعة) يقول ليك : (لو مصلحة الهلال تطلبت سأقيل المدرب على رأس كل ساعة) .. * ده المنطق عند مجلس الكاردينال .. * وهو منطق إختفى حتى عند أندية الروابط والحواري البعيدة .. * طيب انت شايف إنو لما تقيل مدرب بتقيلو عشان مصلحة الهلال صاح ؟؟ طيب مالو غير سياستك عشان مصلحة الهلال برضو .. * صعبة يعني ؟؟ * جيب محترفين زي الناس عشان مصلحة الهلال .. * ولا انت يا ريس شايف إنو مصلحة الهلال في الإقالة بس ؟؟ * والغريبة بعد ده كلو، المدربين ديل هو ذاتو فتشهم وجابهم .. * ما جابوهم ليهو هدية .. * أكثر ما يحتاجه مجلس الهلال هو (الخجل) .. * الخجل والإحساس بالجمهور والمحبين .. * الناس بقت تبكي على حال الهلال .. * الناس الكان ببكيها الهلال فرحاً بقت تبكي حزناً على الهلال وحزناً على القيم والمبادئ .. * لماذا لا يبكي الكاردينال ؟؟ * هل يرضيه الهلال من حيث (الشكل والمضمون) ؟؟ * قديماً قال الشاعر أبو الفضل الأحنف: يا أيها الرجلُ المعذّبُ قلبهُ أقصِر فإنّ شِفاءكَ الإقصارُ نزَفَ البُكاءُ دموعَ عينكَ فاستعر عيناً لغيركَ دمعُها مِدرارُ من ذَا يُعِيرُكَ عَيْنَهُ تبكي بها؟ أرأيتَ عيناً للبكا تعارُ * مجلس الهلال الذي يقوده الكاردينال يحتاج لعين عن طريق (الإعارة) حتى يرى بها الهلال .. * يحتاج لإحساس عن طريق (الإعارة) حتى يحس به وجع الناس .. * زي ما الشغيل طلع إعارة إنتو محتاجين لعيون إعارة عشان تشوفوا بيها الهلال زي ما نحن شايفنو.. * الآن يتعاقد الهلال مع مدرب برازيلي جديد سيتولى المهام إعتباراً من الموسم الجديد.. * ومن الآن نقولها ان هذا المدرب لن يكمل الدورة الأولى من الموسم القادم .. * رأس مالو شهرين بس .. * عشان كده بنقول للكاردينال: خلي العقد مع المدرب ده يكون ل(45) يوم .. * ما توقع معاهو لسنة أو سنتين .. * خلي التوقيع يكون لشهر واحد عشان لما تجي (تقيلو) تلقى أصلاً عقدو إنتهى .. * نراهن منذ الآن على أن عدد المدربين في الموسم الجديد سيتراوح ما بين ستة إلي سبعة مدربين .. * ويجي يقول ليك مصلحة الهلال فرضت ذلك .. * مصلحة الهلال يا ريس بتفرض إنك ما تجيب مدرب (نص كم) عشان ما تقيلو بعد شهر .. * مصلحة الهلال يا ريس بتفرض إنك ما تجيب لاعب زي بخاري وأحمد يحيى .. * مصلحة الهلال يا ريس بتفرض إنك توقف العمل في الجوهرة وتشتغل في الكورة لأنو وضح إنك ما بتقدر تشتغل (جوهرة وفريق) في وقت واحد .. * مصلحة الهلال يا ريس بتفرض إنك تجيب محترفين أخطر من ساماتا (زي ما قلت) لأن الهلال أكبر من مازيمبي .. * وأنا حقيقة ما خايف من حاجة إلا يقوموا يجيبوا لينا سادومبا راجع تاني زي ما قال لي جعفر السقيد .. * إحتمال كبير في التسجيلات القادمة يجيبوا سادومبا راجع .. * ما تستبعد .. * المهم .. * أنا عايز أقول إنو الهلال اليوم سيفوز على حي العرب بأكثر من ثلاثة أهداف .. * وسيقدم مباراة جيدة .. * ولكن هذا لا يخرج من جلباب سياسة الإطفاء العرجاء التي لن تحل مشاكل الهلال .. * معروف لما يمشي مدرب ويستلم مدرب تاني الفريق بيظهر بشكل جيد في أول مباراة .. * لكن هل هذا هو الحل ؟؟ * اليوم إتوقع إنو كاريكا يتألق ويسجل ويكون نجم المباراة لأن المباراة أصلاً ساهلة وكاريكا لاعب لا يعرف التألق إلا في المباريات الساهلة والباردة .. * كاريكا ده موضوع براهو وسنعود له لاحقاً .. * فوز الهلال اليوم وشكله اليوم يجب أن لا يعمي جمهور الهلال من (المشكلة الأساسية) .. * المشكلة الإدارية التى إنعكست على فريق الكرة وجعلته يقبل التعادل في ثلاث مباريات على التوالى اثنين منها داخل المقبرة .. * الناس لازم تفكر بشكل أعمق عشان الهلال يتقدم .. * يفوز الهلال اليوم ويتألق ويواصل التألق في المباراة القادمة ثم يعود للتواضع والبشتنة بعد ثلاث مباريات .. * ولو لاحظتوا .. خالد بخيت لما إستلم الهلال قدم الفريق مباريات ونتائج باهرة في أول ثلاث مباريات بعد إستلام خالد .. * ثم عادت الساقية .. * طيب الساقية عادت ليه ؟؟ * عادت لأنو المشكلة أصلاً ما مشكلة فنية .. * مشكلة فريق يضم نخبة من النجوم ولكنه يعاني من عجز غريب في الثقة بسبب سياسة عرجاء تميل للتخويف والتهديد والوعيد .. * نحن لا نتعامل مع الهلال ب(القطاعي) .. * يعني ما الهلال كويس أمام حي العرب معناها الهلال ما فيهو مشاكل .. * ليه الهلال ما يكون كويس السنة كلها ؟؟ * مش الهلال هو الأفضل والأول في السودان ؟؟ * طيب ليه ما يكون كويس في أي مباراة ؟؟ * يكون كويس من حيث الشكل على الأقل بإعتبار أن التعادل والخسارة واردة ولكن الشكل مهم .. * ما في مشكلة يخسر ويتعادل لكن خلونا نكون مقتنعين إنو ده هلال .. * و..و.. * ونواصل ..
