محمد عثمان بلل عايزين نفرة ضروري المفوضية قالت كلمتها. أبعدت سوداكال. الوصيف في خطر. ولم يظهر حتي اللحظة في التسجيلات. سيدالبلد سيطر على الساحة. خطف كل النجوم. وحتي البقية أكمل إتفاقه النهائي معهم. الوصيف وينو. سوداكال قال ما بدفع. دا كلامو كدا. قال ما بدفع إلا بعد سحب الطعون. طيب الطعون قالت كملتها. بتدفع كيف تاني. ناس الوصيف كانوا منتظرين سوداكال. والطعون عملتها فيكم. ما عندكم حل تاني غير النفرة. مش زمان كان في حاجة إسمها مليار لإعمار الدار. حاولوا رجعوا المشروع دا. لكن بصورة عاجلة. الوقت مافي صالحكم. التسجيلات لن تنتظركم. الفريق محتاج للدعم في جميع الخطوط. أولاد الهلال كشفوا حقيقة مستواكم في آخر الموسم. ما عايزين نحبطم ونقول أنتو عايزين فريق كامل. إنتوا براكم شوفوا عايزين شنو. بس كدا كلمونا .. نمر وعلي جعفر وأمير كمال قاعدين ولا ماشين. دا مجرد إطمئنان على مستواكم بس. معقولة تاني الهلال ينافس نفسو. سيطرة مطلقة على الساحة. كردنة في دبي. براحه على الجماعة ديل. عارفين الزول دا مشي هناك ليه. للتعاقد مع محترفين من العيار الثقيل. ما تخافوا. ديل ما عشان الممتاز. نحن بنخطط للأفريقية. الممتاز دا محسوم. شبعنا منو لكن برضو ما بنخليهو ليكم. الممتاز ماركة مسجلة بإسم الهلال. يا كردنة كفاية على الناس ديل. نحن الهلال ديل طماعين. حسموا التسجيلات المحلية. سجلوا أفضل نجوم الممتاز. ولسه هناك العديد من المفاجآت في الطريق. برضو أسماء محلية. سيحدث التعاقد معها ضجة كبري. وكمان ملف الأجانب. فيهو أسماء مرعبة. دا كلو عشان خاطر الأميرة السمراء. يعني ما تشيلوا هم. شوفوا ليكم حل مع ناس المفوضية. أقول ليكم حاجه. أضربوا لي جيمي. جيمي وبس (صمت اخير) .. عايزين نفرة ضروري.