محمد الطيب الأمين هل كاردينال الجوهرة هو كاردينال فريق الكرة ..؟ * أكثر ما كان يدهش (بنات حلتنا) هو المقدرة الكبيرة عند (بنات الحلة التانية) في التحكم والتلاعب بأوزانهن ما بين الزيادة والنقصان بواقع ثلاث مرات في العام .. * كان ذلك مدهشا بالفعل .. * هن ثلاث بنات يتلاعبن باوزانهن دون عقاقير طبية .. * ثلاث بنات تشاهدهن بداية العام والواحدة فيهن يتجاوز وزنها الثمانين كيلو، وآخر العام تشاهد الواحدة منهن وقد اصبح وزنها اقل من (65) .. * هؤلاء البنات كانن مشتركات ومشاركات في صالة (جيم) و(زومبا) فضلا عن استعانتهن ببرنامج غذائي معين وخالي من (النجمة وأخواتها الخمسة) .. * يفعلن ذلك في وجود مدرب متخصص وتدفع كل واحدة (180) جنيه في الشهر .. * فقط (180) جنيه لا غير .. * يحدث هذا في وقت أرجع فيه الكاردينال شطب مكسيم لاسباب منها زيادة وزنه .. * بنات يتحكمن في اوزانهن ويتلاعبن بها بينما الكاردينال الذي هو رئيس الهلال يدعي أن مكسيم وزنه زاد وغير قادر علي الإضافة .. * زيادة وزن مكسيم كانت تتطلب من الكاردينال أن يستدعي الجهاز الفني والوحدة الطبية لمعرفة أسباب زيادة وزن مكسيم وهل اللاعب أصبح يتناول (مديدة حلبة) أم أن هنالك سوء في التدريبات البدنية .. * الكاردينال للأسف كله تخلص من أفضل محترف جاء في فترته بسبب المال .. * والمال نفسه هو سبب رفض الكاردينال تجديد عقد شيبولا الذي لا يقل قيمة عن مكسيم .. * الكاردينال يظن أن طلبه للسلطات بسحب جنسية الثنائي هو إنجاز .. * يظن ذلك .. * شنو يعني سحبت الجنسية ؟ * نحن لما نجي نقيم شيبولا لا ننظر لايامه الاخيرة مع الفريق وإنما ننظر لايامه الاولى قبل أن يفسده الكاردينال بسياسته العرجاء وهو يريد محترفاً رخيصاً لا يطالب بحقوقه .. * ولعل أكثر ما أضر الكاردينال هو مقدرته وموهبته الرفيعة في الوعود والتخدير والهاشمية التي ما كتلت باعوضة .. * الكاردينال وبوعوده الكثيرة هو الذي وضع نفسه في خانة (حشاش بدقنو) .. * بتكلم وما بعمل .. * كلام كتير والعمل بدأ وتوقف مع الجوهرة .. * والله مرات بجيني إحساس إنو الكاردينال العمل الجوهرة ما عندو علاقة بالكاردينال بتاع فريق الكرة .. * اختلاف كبير.. * اختلاف ما بين كاردينال (يبني) وكاردينال (يهدم) بشراهة .. * شكلها الجوهرة دي وراها سر والله أعلم .. * فرحنا بالجوهرة وقلنا زول عمل جوهرة بيعمل لينا فريق أشرس من مازيمبي وأقوى من الترجي وافضل من الأهلي المصري .. * ومع الأيام فريق الكرة ماشي يضعف وماشي يضعف حتى اصبح (بقايا هلال).. * فهل كاردينال الجوهرة هو نفسه كاردينال فريق الكرة وألا في الهلال كاردينالين اتنين ؟ * عندما قال الكاردينال 2017 الهلال خالي من المحترفين قلنا الزول ده خطير ولكن جاءت 2017 واكتشفنا الموضوع كاميرا خفية .. * ولما الهواء ضربو وقال ح اجيب ليكم الأخطر من ساماتا نحن شلنا هم لجمال سالم واكرم الهادي ويس يوسف وكل حراس الدوري ولكن اكتشفنا أن الموضوع كاميرا خفية .. * ولما جاء وقال تاني محترف ما جابو في التلفزيون ما بخش كشف الهلال سرحنا في جيان وموبوتو وعموري والسوما وفي النهاية اكتشفنا الموضوع كاميرا خفية .. * وجاء تاني وقال السنة دي الهلال لو ما جاب كأس افريقيا تاني ما بجيبو وأنا بستقيل، لما قال كده نحن سرحنا وشلنا هم للاحتفالات وللدولاب الذي سنضع فيه الكأس وفي النهاية الموضوع طلع (ربيع طه) .. * لو شارك الكاردينال مع ربيع طه في إعداد وتقديم الكاميرا الخفية لاصاب نجاحا معقولا .. * خيال الكاردينال أخصب من خيال ربيع طه وجمال حسن سعيد .. * سرح بينا أربع سنين .. * الآن إذا جاء الكاردينال بساماتا فنحن سنشك في أن ذلك ساماتا .. * ح نشك وح نقول ده أخو ساماتا أو ود عمتو أو (ساكت شبه زيك ما لقيتو في دنيا الناس) .. * والشك هذا سببه الكاردينال الذي اجتهد في (هز) صورته الاولى في اذهاننا .. * معقولة زول يشطب حارس مرمى مجنس عشان مرتبو كتير ويتعاقد مع ساماتا الذي راتبه يضاعف راتب شيبولا ومكسيم واوتارا ومعاهم الثعلب والدمازين وبشة ؟؟ * دي تجي كيف ؟ * بعدين ساماتا ده بقى لينا زي قصة الغول وفاطمة السمحة، ثمانية فترات من التسجيلات والكاردينال ماسك لينا في ساماتا .. * ياخ ساماتا ده لو ما اعتزل السنة دي ح يعتزل السنة الجاية .. * انت قايل ساماتا ده مخزن ولا مقرش عشان تجي تسجلو بعد خمس سنين ؟ * فكنا من ساماتا وفكنا من الأجانب نطلب منك فقط معاملة بشة والثعلب واخوانهما بشكل افضل . * ابعد بطانتك من فريق الكرة واحفظ لنا السمعة .. * السمعة رأس مال يا الكاردينال وأنت الآن دخلت في سمعة الهلال بهذه التصرفات البايخة مع الأجانب وكل ابناء الهلال .. * الهلال سمعة وهذا ما نرجو المحافظة عليه حتى لو كان ذلك بالحد الأدنى .. * كل المطلوب منك ما تسجل أجانب فقط أحسن معاملة الوطنيين وخلينا نعوس عواستنا البنعوسها كل سنة .. * المحترف بتجيبو لينا الليلة وبكرة الدولار بيزيد بتقوم تلفق وتقول وزنو زاد وبسافر كتير وما بنوم بدري .. * أجعل الهلال خالياً من الأجانب فهذا سيريح جيبك وسيحفظ سمعة الهلال .. * قال الهلال طالب مكسيم قروش !! * وطيب مكسيم توقف ليه ؟ * ما في محترف أجنبي بيتوقف من شغلو وفريقه مشارك في بطولة افريقية تعتبر سوقاً بالنسبة له .. * نحن لو ما متنا شقينا المقابر يا كاردينال .. * أسوأ حاجة في الدنيا دي تلفق في زول عشان تتخلص منو .. * قروشو بقت ليك كتيرة ما في مشكلة قول أصلاً البلد ظرفها صعب .. * لكن ما بنقبل تشويه صورة من سكب العرق والدم في خدمة الهلال حتى ولو كان ذلك يوسف أبو ستة أو جابسون صاحب (ركبة صباح الخير) .. * و..و.. * والله في ..
تطبيق كورة سودانية لتصفح أسرع وأسهل لزوارنا حمل من السودان متجر موبايل1 http://www.1mobile.com/net.koorasudan.app-2451076.html 2,456حملو التطبيق لزوارنا من جميع انحاء العالم من متجر قوقل https://play.google.com/store/apps/details?id=net.koorasudan.app 17756 حملو التطبيق على متجر apkpure https://apkpure.com/ar/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9/net.koorasudan.app على متجر facequizz http://www.facequizz.com/android/apk/1995361/ على متجر mobogenie https://www.mobogenie.com/download-net.koorasudan.app-3573651.html على متجر apk-dl http://apk-dl.com/%D8%B5%D8%AD%D9%8A%D9%81%D8%A9-%D9%83%D9%88%D8%B1%D8%A9-%D8%B3%D9%88%D8%AF%D8%A7%D9%86%D9%8A%D8%A9 على متجر apkname https://apkname.com/ar/net.koorasudan.app
