سودارس : نغمة (حمد والديبة) تعود في ثوب (صهيب الثعلب وبشة الصغير)

كامل ادريس يلتقي نائب الأمين العام للأمم المتحدة بنيويورك شاهد بالفيديو.. شباب سودانيون ينقلون معهم عاداتهم في الأعراس إلى مصر.. عريس سوداني يقوم بجلد أصدقائه على أنغام أغنيات فنانة الحفل ميادة قمر الدين محرز يسجل أسرع هدف في كأس أفريقيا شاهد بالفيديو.. جنود بالدعم السريع قاموا بقتل زوجة قائد ميداني يتبع لهم و"شفشفوا" أثاث منزله الذي قام بسرقته قبل أن يهلك شاهد بالصور.. أسطورة ريال مدريد يتابع مباراة المنتخبين السوداني والجزائري.. تعرف على الأسباب!! شاهد بالفيديو.. الطالب صاحب المقطع الضجة يقدم اعتذاره للشعب السوداني: (ما قمت به يحدث في الكثير من المدارس.. تجمعني علاقة صداقة بأستاذي ولم أقصد إهانته وإدارة المدرسة اتخذت القرار الصحيح بفصلي) السودان يردّ على جامعة الدول العربية وزير الداخلية التركي يكشف تفاصيل اختفاء طائرة رئيس أركان الجيش الليبي البرهان يزور تركيا بدعوة من أردوغان المريخ يحقق الرمونتادا أمام موسانزي ويتقدم في الترتيب سر عن حياته كشفه لامين يامال.. لماذا يستيقظ ليلاً؟ "سر صحي" في حبات التمر لا يظهر سريعا.. تعرف عليه تقارير: الميليشيا تحشد مقاتلين في تخوم بلدتين جنوب إفريقيا ومصر يحققان الفوز مجلس التسيير يجتمع أمس ويصدر عددا من القرارات شاهد بالصورة.. الناشط محمد "تروس" يعود لإثارة الجدل ويستعرض "لباسه" الذي ظهر به في الحفل الضجة شاهد بالصورة والفيديو.. المذيعة تسابيح خاطر تستعرض جمالها بالفستان الأحمر والجمهور يتغزل ويسخر: (أجمل جنجويدية) سيدة الأعمال رانيا الخضر تجبر بخاطر المعلم الذي تعرض للإهانة من طالبه وتقدم له "عُمرة" هدية شاملة التكاليف (امتناناً لدورك المشهود واعتذارا نيابة عنا جميعا) شاهد بالصورة والفيديو.. المذيعة تسابيح خاطر تستعرض جمالها بالفستان الأحمر والجمهور يتغزل ويسخر: (أجمل جنجويدية) والي الخرطوم: عودة المؤسسات الاتحادية خطوة مهمة تعكس تحسن الأوضاع الأمنية والخدمية بالعاصمة فيديو يثير الجدل في السودان إسحق أحمد فضل الله يكتب: كسلا 2 ولاية الجزيرة تبحث تمليك الجمعيات التعاونية الزراعية طلمبات ري تعمل بنظام الطاقة الشمسية شرطة ولاية نهر النيل تضبط كمية من المخدرات في عمليتين نوعيتين الكابلي ووردي.. نفس الزول!! حسين خوجلي يكتب: الكاميرا الجارحة احذر من الاستحمام بالماء البارد.. فقد يرفع ضغط الدم لديك فجأة في افتتاح منافسات كأس الأمم الإفريقية.. المغرب يدشّن مشواره بهدفي جزر القمر استقالة مدير بنك شهير في السودان بعد أيام من تعيينه مكافحة التهريب بكسلا تضبط 13 ألف حبة مخدرات وذخيرة وسلاح كلاشنكوف كيف تكيف مستهلكو القهوة بالعالم مع موجة الغلاء؟ 4 فواكه مجففة تقوي المناعة في الشتاء اكتشاف هجوم احتيالي يخترق حسابك على "واتسآب" دون أن تشعر ريال مدريد يزيد الضغط على برشلونة.. ومبابي يعادل رقم رونالدو رحيل الفنانة المصرية سمية الألفي عن 72 عاما قبور مرعبة وخطيرة! شاهد بالصورة.. "كنت بضاريهم من الناس خائفة عليهم من العين".. وزيرة القراية السودانية وحسناء الإعلام "تغريد الخواض" تفاجئ متابعيها ببناتها والجمهور: (أول مرة نعرف إنك كنتي متزوجة) حملة مشتركة ببحري الكبرى تسفر عن توقيف (216) أجنبي وتسليمهم لإدارة مراقبة الأجانب عزمي عبد الرازق يكتب: عودة لنظام (ACD).. محاولة اختراق السودان مستمرة! انخفاض أسعار السلع الغذائية بسوق أبو حمامة للبيع المخفض تونس.. سعيد يصدر عفوا رئاسيا عن 2014 سجينا ضبط أخطر تجار الحشيش وبحوزته كمية كبيرة من البنقو البرهان يصل الرياض ترامب يعلن: الجيش الأمريكي سيبدأ بشن غارات على الأراضي الفنزويلية قوات الجمارك بكسلا تحبط تهريب (10) آلاف حبة كبتاجون مسيّرتان انتحاريتان للميليشيا في الخرطوم والقبض على المتّهمين إسحق أحمد فضل الله يكتب: (حديث نفس...) حريق سوق شهير يسفر عن خسائر كبيرة للتجار السودانيين مياه الخرطوم تكشف تفاصيل بشأن محطة سوبا وتنويه للمواطنين محافظ بنك السودان المركزي تزور ولاية الجزيرة وتؤكد دعم البنك لجهود التعافي الاقتصادي الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا مقترح برلماني بريطاني: توفير مسار آمن لدخول السودانيين إلى بريطانيا بسهولة الشتاء واكتئاب حواء الموسمي عثمان ميرغني يكتب: تصريحات ترامب المفاجئة .. "كرتي والكلاب".. ومأساة شعب! ما الحكم الشرعى فى زوجة قالت لزوجها: "من اليوم أنا حرام عليك"؟ حسين خوجلي: (إن أردت أن تنظر لرجل من أهل النار فأنظر لعبد الرحيم دقلو) حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!

شكرا على الإبلاغ!

سيتم حجب هذه الصورة تلقائيا عندما يتم الإبلاغ عنها من طرف عدة أشخاص.

نغمة (حمد والديبة) تعود في ثوب (صهيب الثعلب وبشة الصغير)

وان طال السفر نشر في كورة سودانية يوم 01 - 06 - 2018

محمد عبدالماجد
الذي تابع مباراة الهلال والأهلي مروي أمس الاول بيكون لاحظ (الكباري) الكتيرة التي ظهرت في المباراة.
الناس ديل ما شاءالله عليهم تقول قاعدين يلعبوا بي (ملاعق).
يغرفوا في الكورة متل (الرز).
مباراة الهلال الاخيرة شهدت كمية من الكباري الارضية والطائرة – ما ليها عدد.
بدأت تظهر علامات (شقاوة) في وسط الهلال.
واضحة ما عاوزة ليها محلل فني.
أي زول بيشعر بي ذلك.
ظهرت (علبة هندسة) جديدة في الوسط.
عادي في وسط الهلال الايامات دي يجيك (برجل) طائر.
عادي جدا تعتر ليك (منقلة).
ويخنقك (مثلث).
العولمة خشت على الهلال.
الحوسبة.
التكنلوجيا.
الكلام البقولوا ليكم دا – عاوز ليه زول عندو انجليزي رابط.
زول انجليزيه مرخرخ ما بقدر على الكلام دا.
انجليزي التاج يعقوب والتاج ابراهيم (سنجل تو) ما بجيبو ليكم.
الكلام دا صعب شديد.
ناس شيبوب يمررو في (الكورة) ب 99 طريقة.
مرة س + 1.
ومرة ص – 2.
ومرة بالجذر التربيعي.
ومرة بالعامل المشترك الأعلي.
شيء لوغريثمات.
وشيء حساب مثلثات.
وشيء مكعبات.
وشيء تفاضل.
وشيء تكامل.
وشيء (نضمي) ساكت.
الرياضيات نحن في المدرسة كنا قاعدين نكجنها، كمان عاوزين تجيبوها لينا في مباريات الهلال.
ناس المريخ بي طريقتكم دي بيجلو.
بفوّتو عديل.
الدرب راح ليهم.
يبلعوا في ريقهم متل (نقاع الزير) الساعة 12 ظهرا.
تعاين ليه لمن تحوص.
سمعت قالوا ناس المريخ عاوزين يجنسوا ليهم 3 لاعبين.
عشان شنو؟.
والله مع ناس هارونا وبشة الصغير ديل لو جنستوا ليكم (جالية) هندية او برازيلية ما بتمرقوا مننا.
أحسن ما تضيعوا قروشكم ساكت.
لموا قروشكم، وانتظروا قدركم ساكت.
روقوا.
أمسكوا أعصابكم.
ما تنفعلوا ساكت.
فارس عبدالله في شندي جاب قون في المريخ من (الصلاعاب).
الزول دا وقت يجي الهلال بيعمل شنو؟.
فارس وكولا بحصل ليكم اللخبطة.
فارس في الهلال شكلو ح يجيب ليه قون في المريخ من (حجر العسل).
شيلوا شيلتكم.
واركزوا.
ابقوا راكزين.
الكلام الكتير نحن ما بندورو.
ناس احمد آدم والتش قاعدين يهبشوا في الكورة.
ينقدوا فيها (نقيد).
الكلام دا في الهلال ما بنفع.
اتيقنوا واتفنوا وانتظروا قدركم ساكت.
فريقكم دا – أحسن الفيفا تجمدوا ليكم.
لو جمدوكم أرحم ليكم.
ناس المريخ بيلعبوا عشان (التجميد).
انتوا ما شفتوا ناس الهلال بعد الجوهرة قاعدين يعملوا في شنو؟.
بعملوا في حاجات غريبة.
صهيب الثعلب يفوّت في (الكباري) فوق وتحت.
وبشة الصغير أفضل من يلعب (الون تو).
في حركة (شفتنة) بدأت تظهر بوضوح في وسط الهلال.
شقاوة واضحة.
ثلاثي وسط الهلال شيبوب وبشة الصغير وصهيب الثعلب يمتلكون مهارات عالية وبيلعبوا الكورة زي ما بقول الكتاب.
مجانين كورة.
الكورة بنقطوها.
وبقطعوها للزول في رأسه.
ديل (شفوت) كورة.
ثعالب.
شيبوب بنط من الطابق الرابع ، يعني غالبو يعمل ليه (كبري) في مروي.
الزول دا أصلا جاء الهلال عن طريق (كبري).
غايتو التمريرة التى لعبها شيبوب لاطهر الطاهر في مروي – ما قابلتني قبل كدا.
شاروخان في فيلم هندي ما بعملها.
ناس المريخ وقت يجيبوا ليهم سيرة شيبوب لغاية الآن قاعدين يتشهقوا.
يفتحوا في خشومهم زي الفرن الما فيه رغيف.
الفراني تلقاه قاعد برة وماسك الموبايل.
أعرف طوالي ما في رغيف.
الشفتنة في خط الوسط مطلوبة.
يمكن خط الدفاع ما عاوز ليه شفتنة ..أمسك لي واقطع ليك.
وخط الهجوم ما عاوز فلسفة كتيرة.
لكن الوسط يبقى منطقة مناورة ومحاورة وعمليات.
صهيب الثعلب وبشة الصغير بالشقاوة القاعدين يعملوا فيها الايامات دي ذكروني بي حمد والديبة.
الناس ديل عاوزين يرجعوا لينا نغمة حمد والديبة حاجة عجيبة.
ناس شفوت.
والحرفنة كاتلاهم كتل.
بطلعوا في الكورة.
وبعملوا أي شيء في الكورة.
نحن على موعد جديد مع (حمد والديبة).
وفوق حمد الديبة كمان معاهم شيبوب.
الناقصة تمت.
تاني عاوزين شنو؟.
الجماعة ديل يجيهم نزار حامد تتخيلوا يحصل شنو؟.
وهناك ابوعاقلة والشغيل.
لا حول.
دي حاجة ما بتتقابل.
قدامهم يكون في بشة الكبير.
يا زول الحكاية شنو؟.
أي مريخابي عندو قلب ننصحو من الآن يبعد من المنطقة.
كورة فيها الهلال يبعد منها بعيد.
هلال مريخ ممنوع منها رسمي.
يمين مع ناس هارونا وجيوفاني ، قلبك لو بقى حديد تدخل العناية المركزة.
يا زول مالك ومال الجهجهة.
أحسن من هسع تشوفوا ليكم (سلة).
كورة طائرة.
سباحة.
مسرح.
أي حاجة.
ابعدوا من كورة القدم دي.
الموضوع دا صعب عليكم.
بس عشان الحكاية دي تنزل في أرض الواقع.
وتصبح واقع ملموس.
عاوزين انضباط وإلتزام من صهيب الثعلب وبشة الصغير.
ما تسمعوا كلام الجرايد.
انتوا لسه في بداية الطريق.
أوعكم تفتكروا انكم وصلتوا.
المشوار طويل.
وكورة بدون التزام وانضباط عمرها قصير.
الالتزام بالتمارين والمعسكرات والاستفادة من الكبار في الهلال هو ما سوف يوصلكم للقمة.
اتعلموا من بشة الكبير.
من الشغيل.
من مدثر كاريكا.
من بويا.
الجماعة ديل مدارس.
استفيدوا منهم.
كورة بدون (احترام) ما عندها قيمة.
عشان تصلوا وتقدموا الكتير للهلال اتعلموا من غيركم.
واجتهدوا زيادة.
لاعب الكورة عمره قصير.
ما تضيعوا عمركم في السهر والحوامة.
ابنوا مجدكم في الكورة.
دي فرصتكم.
الفرصة في الهلال ما بتتكرر كتير.
حققوا ما عجزوا فيه غيركم.
جيبوا ليكم بطولة خارجية.
وحافظوا على الارقام المحلية القياسية التي يحققها الهلال.
اعملوا ليكم تاريخ في الهلال.
خلوا الجماهير ترجع تاني للكورة.
رجعوا لينا الصفوف.
صف الكورة.
ما صف البنزين.
صف الغاز فترنا منو.
عاوزين الناس تتمتع بالكورة.
عاوزين نتائج.
عاوزين بطولات.
والحاجات دي كلها ما بتتحقق إلّا بالعمل والاجتهاد والانضباط.
الفرصة أمامكم.
والمستقبل يمد ايده ليكم.
ان شاءالله بس مجلس الادارة يساعدكم بالاستقرار الفني.
مجلس الادارة مطلوب منه ان يوفر الاجواء الملائمة.
عاوزين جهاز فني قدير.
عاوزين المرتبات والحوافز تكون حاضرة.
عاوزين المجلس يوفر للفريق كل المعينات.
وبعد ذلك البطولات سوف تكون حاضرة.
ما في حاجة صعبة.
بتملكوا أهم عنصر لتحقيق البطولات.
بتملكوا جمهور لا نظير له.
تاني عاوزين شنو؟.
عاوزين التركيز بس.
والاجتهاد.
عشان الموهبة براها ما بتعمل شيء.
المهارات من غير انضباط والتزام ممكن ان تكون خصم على الفريق.
ننتظر اضافات بسيطة في التسجيلات القادمة ويكتمل الهلال بدرا.
ما في حاجة ناقصة.
كملوا جميلكم.
وتموا الناقصة.
خلاص وصلنا.
وبقينا على بعد خطوات.
………………….
ملحوظة : القطر ما يفوتكم.
هوامش
أمام الهلال مباراة أخيرة في هذه المرحلة أمام كوبر البحراوي.
كوبر مع فاروق جبرة وأحمد السيد اصبج بقدم في مستويات كبيرة.
الفريق كان قريباً من التأهل.
كوبر لو بدأ صاح – كان سوف يحجز موقعه في مع الثمانية الكبار.
لذلك على الهلال احترام كبير.
عاوزين الهلال يحافظ على سجله.
وعاوزين نشوف كورة.
وعاوزين الهلال يرفع رصيده في النقاط وفي الاهداف.
الافضل دائماً – الهلال.
رمضان كابو مستواه اتقدم كثيراً.
ومحمود أم بدة هو الاخر لاعب ممتاز.
وهناك عبداللطيف بويا.
فارس سوف يرفع التنافس في الطرف الشمال.
الطرف الشمال في الهلال سوف يعود له رونقه.
فارس أيضاً يمكن ان يستفاد منه في خط الوسط.
عشان يتجدع مع ناس نزار حامد وشيبوب.
تسجيل حارس مرمى في التسجيلات الحالية أمر مهم للغاية.
وحتى لو لم يسجل الحارس الجديد في الكشف الافريقي فان الهلال سوف يكون محتاجا له في دوري النخبة عشان جمعة ويونس يرتاحوا شوية من ضغط المباريات.
دوري النخبة الهلال سوف يلعب مباريات صعبة امام اندية وصلت لهذه المرحلة بمستواها وامكانياتها.
ومعظم هذه الأندية سوف تحدث اضافات لكشوفاته في هذه التسجيلات.
لذلك لا يعقل ان يلعب الهلال الكونفدرالية ودوري النخبة وكأس السودان بحارسين فقط.
وان كان هناك حارس الشباب ابوجا.
ابوجا ما سائل في زول.
نتمنى ان تمنح الفرصة للحارس ابوجا فهو حارس صاحب امكانيات كبيرة.
لكن مع ذلك الهلال يحتاج لحارس ثالث.
خليكم في السليم.
الهلال لن يضيف حارس لكشوفاته الافريقية ، لذلك لا جدوى من تسجيل اكرم الهادي سليم طالما لن يستفيد منه الهلال افريقياً.
جمعة ويونس ممكن يكملوا افريقياً.
كثيراً – كتبنا في هذه المساحة وحذرنا من ان يرفع الهلال للكشف الافريقي 27 لاعبا.
كان يمكن ان يكون امام الهلال خيارات عديدة وفرص كثيرة لو رفع 24 لاعبا فقط لكشفه الافريقي.
الهلال فقد شيبولا ومكسيم ومحمد موسى وهم في الكشف الافريقي.
أي تعامل مع كاريكا بدون احترام او تقدير سوف يكون غير مقبول.
كاريكا يجب ان يعامل في الهلال معاملة كريمة.
لا نريد ان يكرر مع كاريكا ما حدث لهيثم مصطفى وعمر بخيت والمعز محجوب وقبلهم ريتشارد جاستين.
كابتن الهلال يجب ان يجد المعاملة التى تليق به.
أي شيء غير ذلك سوف يكون محسوب على مجلس ادارة الهلال.
وعلى اشرف الكاردينال تحديداً.
وابقوا على سفر.
……….
عاجل : يا دوب صدقت ان شيبوب نط من الطابق الرابع – شيبوب الشفتو أمام الأهلي مروي بيعملها.

انقر هنا لقراءة الخبر من مصدره.