بابكر سلك الخروج علي الحاكم *في ناس حاولوا قبل حداشر ابريل يقنعونا بانو الخروج علي الحاكم حرام *ما اقتنعنا ليهم لي يوم حداشر ابريل الصباح *حداشر ابريل الضهر اقتنعنا *هم خلوا قناعتهم *يعني نجيهم يكوركوا *نكورك ليهم مايجوا *بعد حداشر ابريل *وبعد ما اقتنعنا نحنا بانو الخروج علي الحاكم حرام *رجعوا هم وقالوا *نعم حرام الا اذا رأيتم منهم كفرا بواحا *الا دي قبل حداشر ابريل ماقالوها لينا *لكن قبلناها منهم *وطالما الحاكم موحد *وبصلي *تبقي الا كاداة استثناء قاعدة ساكت *مافي كفرا بواحا *يبقي الا ما عالجت العله *علي العموم *نحنا اقتنعنا بانو الخروج علي الحاكم حرااااااام والقبر قدام *ايها الناس *سمحنا بسرقة دولتنا تلتين سنة *حقو مانسمح بسرقة ثورتنا *وحرامي الثورة ظاهر *زي حرامي القلوب *حرامي الثورة بفكر في ذاتو وينسي ذات الوطن واهداف الثورة *الفنان لطفي بو شناق قال *خدوا المناصب والمكاسب *بس خلولي الوطن *ياوطن وانت حبيبي *انت عزي وتاج راسي *انت يافخر المواطن والمناضل والسياسي *ايها الناس *ثورتنا هي اعظم ثورة في تاريخ الشعوب *ثورة سلمية امتدت اكتر من اربعة اشهر *كانت جموع الشباب فيها تزحف نحو تاتشرات الكجر وبكاسي الكلاب الملثمة زحفا تحت وطأة الرصاص *ثورة تستنشق البمبان كما الريحان وتزحف *ثورة تقدم الشهيد تلو الشهيد قربانا للوطن *الشباب يفتح صدورو للرصاص *ويقدم الرأس ليجرتق بالدم فداية للوطن *لتمضي مسيرة الثورة ظافرة *لان الشعار كان *بتمرد علي الواقع علي التاريخ *ونطلع بره للشارع في وش الريح *في وش الريح بنتحدي *نقيف للطلقة نتمدي *وعن اهدافنا وعن المبدأ *ابدا ما حانرتدي *نجحت الثورة وانتشرت *المرأة في اسرائيل اعجبت بثورتنا ودعت للتعلم من كنداكة الثورة السودانية *مجلات امريكا تطالب ترمب بالتعلم من ثورة السودان والاتعاظ *الكاميرون *مصر *الجزائر *تشاد *كلها تهتف تسقط بس *والسعودية في الطريق *وكذا الامارات *كل الشعوب اخدت الدرس وتعلمته من ثورتنا *حقتنا *صنعناها برانا *رعيناها برانا *نشرناها اعلاميا برانا *فاجهزة الاعلام الداخلية الرسمية زاغت *بل تفننت في تبخيس الثورة *ودونكم قناة حسين وقناة 24 *والاعلام الخارجي عمل حميل *برغم كل ذلك *انتصرت دولتنا *وانتشرت ثورتنا *ووجدت ماتستحقه من مساحات *بل اوجدته بايدها وشديدها *حتي صارت ثورتنا *ايقونة لكل الشعوب الثائرة *قال صديقي اكرم زكي *عشان وطني البعزو علي *ترابو الغالي في عيني *اقدم روحي ليك ساهلة *اموت بحداك وتفخر بي *كل الفخر سوداني *بقدم نفسي للدنيا *احقق رغبة انسان *اعلي هتافي في غنية *وزيك تبدا الآلاف *تمزحق صورة الاجحاف *باسمك تبدا حرية *يفوح منك عبير ريحان *لافغاني ولزنجية *وللثوار في كل مكان *ايها الناس *لذا كانت ثورتنا ايقونة ثورات العالم *فلا تفرطوا فيها لتسرق *نحن عانينا من السرقات ازمان وازمان *صابنها كي لاتسرق *صابنها لنخافظ علي اهدافها *صابنها وفاءا لارواح الشرفاء والشهداء *صابنها لنحافظ عليها كي لاتسرق *اها *ابو الهل عندو كورة ضد النجم التونسي *البتأهل بقابل الزمالك *الاتحاد الافريقي اختار حكام مباراة النجم والزمالك الاولي والتانية *ده اسي يسموهوا شنو ده ياروشا؟؟ *ايها الناس *اتمني ان يعود كردنة لارض الوطن في اليومين دي *عسي يقع عليه الاختيار لقيادة هذا البلد في هذه المرحلة *المانعو شنو مايجي ياربي؟ *الشعب يريد عودة الكاردينال *بجي يافطومة؟ *لازم يجي *لانو ناس علي اسد مشغولين بالمريخ *بالذات بعد تلاشي امانة الشباب وفلسعة الوزير *غايتو يا اسد *الزارعكم غير الصناديق اليجي يقلعكم *وقالوا تحت تحت ناس اسد متلخبطين في الحساب *وحايبدوا الاربعة سنين من جديد *ايها الناس *ان تنصروا الله ينصركم *اها *نجي لي شمارات والي الخرتوم *انت ياوالينا *فاتحين المطار ضلفتين للناس ديل يفحطوا فينا؟ *الجوة جوة والبره جوه لمن نحسبها ياوالينا *دايرين نساهر بيهم زي ماساهروا بينا *ماينوم يا والينا سلك كهربا ننساك كيف والكلب قال ودوني المطار انبح ليكم في الحرامية والي لقاء سلك