بابكر سلك كوليرا ما تحلكم *مجموعات أفريقيا جاءت وكأنها تقول عند الله ما بروح شئ *جماعتنا تأهلوا بمجهودات الكورونا *يعني تأهل بالاستعانة بصديق *ذلك الصديق كان الحبيب كورونا *وبالنظر إلى تلك المجموعة نستطيع القول إنو الدور ده ما بتنفع الكورونا *الكوليرا مابتحلكم *والغريبة (رز) المجموعات ظااااااهر *نحن مجموعتنا لا ينافسنا على صدارتها إلا الأهلي القاهري *ده إذا شد حيلو واستعان كعادته بالتحكيم الأفريقي *لكن *صن داونز الجنوب أفريقي من جنوب أفريقيا طبعا *وبلدنا تمنع دخول الناس القادمين من جنوب أفريقيا *يبقى ناس صن داونز يا ياخدوها موزة للخرطوم *يا ينسحبوا وتطير نقاط الكورونا من أصدقائنا *وكان أخدوها موزة للخرطوم *كورتهم ضد الجماعة يودوها ميدان عقرب زمبابوي *وصن داونز معروف عنو إنو أي كورة يلعبها في ميدان عقرب زمبابوي بغلب فيها تسعة *صن داونز *مازيمبي *الفريق الجزائري *علي الطلاق مجموعة زي دي لو كنت هلالابي كان خاطبت الكاف وقلت ليهو نتيجة فحص كورونا الأشانتي طلعت سلبية *نتيجة الفحص العند الحكم جات بالغلط *المهم *على السوباط أن يخرج على جماهيرو مصرحا *أعدكم بالأميرة السمراء في العام 2022 *مع كاس العالم *بس ياسوباط ما تجيب سيرة الصفر *باقي كلمة صفر بتجيب الكورونا لناسك ديل *أيها الناس *انيمبا الذي تخطيناه بجدارة لا يقل مستو ولا طموحا عن فرق مجموعتنا إن لم يكن أفضل من بعضها *تبقى قصة تأهلنا من هذه المجموعة قصة مؤكدة تقبع بين أقدام رفاق المناضل تيري *تحتاج فقط لجهد وجدية وتوحيد للجهود *ومن المطلوبات طبعا البعد بمشكلاتنا وخلافاتنا عن الملعب *فنحن قوم نقتات خلاف *هكذا غيرنا وجبتنا الشهية التي أعدها الماهر عمر محمود خالد *اختلاف الرأي فينا يجعل المريخ أقوى *خلونا نختلف لنمارس أدب الاختلاف وفقه المحبة والإحترام *خلونا من الشتائم والشو تايم *وتعالوا نختلف بأدب ومحبة *أيها الناس *إذا ناس الهلال احتجوا على منهج القرعة *وقالوا شامين ريحة آدم في القرعة *وسيرة آدم بتذكرنا بلوحة مايكل بتاعت خلق آدم *القصة دي ما بتغير ليهم المنهج ؟ أقصد المجموعة ؟؟؟؟ *إن تنصروا الله ينصركم *أها *نجي لي شمارات والي الخرتوم *والينا *قالوا المدارس حا تفتحوها جزئيا لينا *كان كدي اسمحوا لينا نغني يا والينا *يلا يا أولاد المدارس *مواصلات ماحتلقوا *يلا شخبتوا في الكراريس *لما ناس المناهج يتفقوا *مسكينة بليدنا ولسه في إخوان *سوداني بليدنا مسكين يا مان *وبنعتذر للشاعر ولعقد الجلاد وللبلد يا أخينا سلك كهربا ننساك كيف والكلب قال دي مجموعة زنقة كلب في جزارة وإلى لقاء