بابكر سلك يوم أربعة واحدة أربعة *تقول الأنباء أن يوم أربعة تسعة هو يوم الجمعية الإنتخابية لنادي المريخ . *طبعاً جمعيتين. *في نفس اليوم. *واحدة بالموردة. *والتانية بالاستاد حسبما سمعت. *طبعاً يستحيل الجمعيتين يكونن صاح. *أكيد واحدة صاح وواحدة ماصاح. *أكيد واحدة مجضماها . *والتانية أربعة. *كيشة ساي. *لكن يوم أربعة البوري الجمعية الأربعة سيكون يوماً مشهوداً في تاريخ المريخ. *لأنو حاينهي جدل منو الصاح ومنو المفتكر نفسو صاح. *وحايخلي المريخاب يضعوا سلاح الشتات ويعملوا لأجل مريخهم مع الجمعية الصاح . *سنين والمريخاب يضيعون مجهوداتهم في الخلاف والإختلاف وإدارة المعارك . *ما أدوا مريخهم شيء من مجهوداتهم المقدرة. *طبعاً المقلب الكبير إذا طلعن الجمعيتين أربعة. *ولكنه المستحيل بعينه . *الله يحضرنا يوم أربعة عشان نعرف الجمعية الصاح من الجمعية الأربعة. *ووقتها حانسمع كتير في مجتمع المريخ قولة يا أربعة. *المهم. *يقولون أن دكتور برقو في إحتفالية تكريم حازم لنجوم المنتخب. *مدح حازم وقال عيب حازم الوحيد أنو مريخابي. *إذا صح الكلام. *يبقى واحد من أتنين. *أما السيد مسؤول المنتخبات لايعرف قيمة القومية. *وماعارف أنو شعار المنتخب نحنا بنلعب للسودان . *لا لجماعة ولا لكيان. *وأما يكون حاول يخفف دمو عماها . *وفي الحالتين الكلام شين لايرقى لمرتبة قيادة منتخب يمثل دولة تسعى جاهدة للم الشمل في كل مناحيها وتكجن العنصرة. *فعندما تتعامل مع المنصب القومي بلونك الخاص. *دي تبقى العنصرة بعينها. *إن حدث ذلك برقو مطالب بإعتذار كبير للاعبي المريخ بالمنتخب قبل الإعتذار لكيان ولجماهير المريخ. *وإذا ماصح الكلام . *يعني إذا برقو نكرو حطب وقال ماقلت. *تبقي الحرب على الرجل قد دخلت مرحلة المابدورك في الضلام يحدر ليك. *هنا علي الذين صدقوا الكلام وعلقوا عليه إعتذار واجب لبرقو . *والمهم في الموضوع السودان يحصل على نتيجة إيجابية أمام (أسود الأطلس) *المهم. *لاننظر للجزء الفارغ من الكوب. *فالجزء الفارغ تظهر به دستة أهداف أخواتنا في الله التونسيات في شباك أخواتنا في الرقم الوطني. *ولكن ننظر للجزء المليان من الكوب. *والذي يظهر فيه هدفنا النبيل الجميل والوحيد في البطولة حتى الآن. *بالرغم من إن من شاهد مباراة حدياتنا أمام زيتونات تونس. *كان تعليقهم أن آداء الحديات فيه تطور كبير عن مباراتهن أمام حفيدات كيليوباترا. *ومسؤول يصرح. *بأن المشاركة ليست لأجل الظفر باللقب. *ولكنها لأجل التأريخ. *فالتاريخ يسجل مشاركة كنداكاتنا. *ولايهتم بالنتائج . *وأنا أسأل. *الشرتيت كيف؟. *ألم يكن دعم (الفيفا) الخرافي للمشاركة واحد من الأهداف التاريخية يا هذا؟؟؟. *ولابرضو التاريخ مابسجل قبضنا دعم كم؟؟؟؟. *أيها الناس. *إن تنصروا الله ينصركم. *أها. *نجي لي شمارات والي الخرتوم . *والينا . *برغم الفينا . *المدارس مصرين تفتحوها لينا؟. سلك كهربا. ننساك كيف والكلب قال يوم أربعة ما أروعة فيهو واحدة أربعة. وإلى لقاء. سلك