++++++++++ ودالشريف ************** ** مازالت الملاريا اللعينة تنقر في جسمي وتسيطر علي دماغي وتمنعني التلاقي ولكن لابد من الكتابة لان الاحداث ساخنة في المريخ وانتخابات الاتحاد العام علي الابواب ** ساعود للاخ طه علي البشير رئيس نادي الهلال السابق بمقالة اخري قريبا جدا باذن الله. ** حتي الان لم يصدر اي قرار رسمي من الاتحاد العام ولا من الحكومة ولا من فيفا ولا من اي جهة باعتماد مجلس القنصل حازم لادارة نادي المريخ وهذه نقطة مهمة جدا ارجو ان تعيها جماهير المريخ…. والسيطرة علي فريق كرة القدم لا يعني السيطرة علي النادي وعلي مجلس حازم ممارسة فضيلة الصبر حتي يصدر القرار الرسمي ** القنصل حازم وقبل ان يتسلم مهامه رسميا بدأ أسوأ بداية ولا نود القول ان تسجيله الصوتي كان فضيحة.. لكنه لم يكن موفقا في حديثه واكد علي خضعوه الكامل للاعبين…. يعني بصراحة العبارة المريخ يديره الان امير كمال ورمضان عجب وعدد اخر من اللاعبين بدليل ان كابتن امير فرض صديقه الحميم انس نصرالدين مديرا للكرة وتمسك باستمرار الفاشل العجوز غارزيتو ورفض عودة الانجليزي كلارك ** امير كمال الامر الناهي في المريخ والسيد حازم رئيس النادي مع وقف التنفيذ يخضع له بدلا من اتخاذ قرار حاسم بذهاب غارزيتو وانس نصرالدبن وكل بقايا سوداكال وما فيش حاجة اسمها عقد غارزيتو وما عارفين بنتهي متين… واذا المريخ اتغلب امام زناكو حيقولو حازم سمح باستمرار غارزيتو…واللاعبين قالو داييرين انس… . ده كلام فارغ يا حازم مع احترامي لك وكنت اتمني ان تبدأ بداية قوية وتؤكد جدارتك بقيادة واحد من اكبر الاندية الافريقية…… بعدين يا حازم انت شفت ضغوط.. لسه يا حبيبي ومجتمع المريخ مجتمع عريض، فيهو الجاهل وفيهو العاقل والفاهم ولو باريت القروبات ما حتقدر تعمل اي حاجة…. ناس جمال الوالي اتحملوا الضغوط 13 سنة.. وشتائم واساءات من البسوي والمابسوي…. وشداد بكل تاريخه بشتم كل يوم ** اذا لم تفرض شخصيتك حتتعب يا حازم ** ما فيش رئيس نادي بعمل تسجيل صوتي يا اخ حازم ** بدايتك الصحيحة يا حازم كانت في شطب امير كمال ومن لف لفه ويريد ان يفرض قراره….000 اللاعب مجرد موظف في النادي ولا يملك سلطة اتخاذ اي قرار ** تسجيلات المريخ في يد مجلس حازم وحتي امس لم تتسلم لجنة التسجيلات التي لا نعرف من تضم.. لم تتسلم مليم واحد والهلال يتحرك في كل الاتجاهات ** الهلال هو الهلال لو سجل ميسي ورونالدو ولن يغادر المحطة القديمة….. كل سنة الهلال بسجل محترفين ويقولوا ليك من العيار التقيل والنتائج صفر ** في الاخبار ان المريخ سيلعب مباراته الاولي امام زناكو باستاد السويس بجمهورية مصر العربية… والله شخصيا لا اعرف من اختار استاد السويس. جناح حازم ام جناح سوداكال… القصة هايصة… وعموما استاد السويس واحد من افضل الاستادات في مصر وعيبه واحد تحدث عنه. المصري مدرب حراس مرمي المريخ السابق ونصح مجلس المريخ ** نؤيد بشده الاتجاه الرامي لتسجيل حارس المرمي اكرم الهادي في المريخ ** والله ما عارف الاتحاد العام والحكومة منتظرين شنو وما عايزين يضعو حد لازمة المريخ الذي يواجه تحديات كبيرة ** صاحب هذا القلم ظل في حالة دفاع عن بروف كمال شداد والسلطان حسن برقو طيلة السنوات الماضية وما زلت وتحملت الكثير من الاذي وللحق كان معي الزميل الاستاذ معتصم محمود والاخ الصديق الاستاذ اسماعيل حسن وتفاجأت امس الاول بصدور صحيفة الكترونية تحمل اسم النهضة اسبورت تتبع لمجموعة النهضة المسيطرون عليها مجموعة من الكتاب ظهروا قبل اسبوعين ثلاثة مع الاخ برقو باستثناء معتصم محمود وعصام طمل والاخير مدير عام.. ونحن اسياد الجلد والراس لم يخطرونا مجرد اخطار… تخيلوا…. وهذا لن يثنينا عن موقفنا الثابت من شداد وبرقو ومساندتنا لمجموعة النهضة. 0000من اين اتي هؤلاء ** اتحاد الخرطوم الاتحاد الرائد والقائد كان في مستوي المسئولية وهو يعلن انحيازه الكامل لمجموعة النهضة ويستقبل بروف شداد وبرقو ذاك الاستقبال الخرافي والتحية للاخ الشاذلي عبد المجيد رئيس الاتحاد وقد كان مرتبا وقويا وهو يخاطب الحشود الجماهيرية. وكان وفيا لشداد وبكي كمان وقال لشداد ( عشان ماتبكي ببكي انا) ** كثير من الاتحادات تحولت مع مجموعة النهضة ولو ترشح القانوني الضليع الاستاذ محمد الشيخ لرئاسة لجنة المسابقات ستكتمل اللوحة. هذا مع امنياتي للاخ جمال احمد عمر الكيماوي بالتوفيق وهو جدير بعضوية الاتحاد العام. ** قريبا جدا سترفع مجموعة التغيير الراية البيضاء وتستسلم ** مجموعة التغيير اطاحت بالفاتح باني ورشحت طارق عطا رئيسا للجنة المسابقات كما اطاحت بنصرالدين حميدتي 00ومحمد جلال من المناصب القيادية ورشحت اسامة عطا المنان لمنصب نائب الرئيس وفي تقديري ان اسامة لسة بدري عليهو وما وصل الحتة دي ** معتصم جعفر واسامة عطا المنان كانا قد اكدا عدم عودتهما للاتحاد العام وهسي جارين جري.. وكلام الليل يمحوه النهار ** التحية للاستاذ مجدي شمس الدين وقد تمسك بكلمته وموقفه ولم يفكر في العودة للاتحاد العام رغم نظافة سجله… وكسب احترام الجميع ** لينا يومين ثلاثة ما طالعنا اي بيان لسوداكال ** محمد سيداحمد الجكََومي يقاتل في كل الجبهات.. ما شاء الله.. المريخ والاتحاد الديمقراطي، وكيان الشمال… وطبعا يا جاكومي نحن اتحاديين ابناء الزعيم الازهري مش ناس قريعتي راحت ** ماذا يفعل المريخ بلاعب الهلال ابو عاقلة ** واحد من البعام ما عندو علاقة بالكورة طالب بشطب عزام من كشف المريخ…… يعني المريخ يشطب عزام الحريف الفنان ويسجل العتالي ** غارزيتو يحارب الثنائي النيجري ادلي وتوني لشيئ في نفسه ** نكرر اذا تسلم مجلس حازم المربخ رسميا فليذهب كل بقايا سوداكال ** الذين تجمعوا في قاعة الصداقة امس الاول جابوهم بالبصات واللواري والدفارات. ما عارفين اي حاجة ** سندعو في كل يوم… اللهم احفظ السودان ** وطنا الباسمك كتبنا ورطنا… احبك مكانك صميم الفؤاد ** اخر دبوس ** اطلقوا عليك حازم الحازم.. فخليك حازم.