الصحة العالمية ..1600 قتيل في هجمات علي مراكز صحية سودانية    مسيرات مليشيا الدعم السريع تستهدف محولات محطة المقرن التحويلية بعطبره    "فيفا" يطلق تذاكر ب60 دولارا لكل مباراة في "مونديال 2026"    استمرار اللجان.. وهزيمة "هلال الجان"..!!    مدرب رديف المريخ يثمن جهود الإدارة..محسن سيد: لدينا مواهب مميزة وواعدة في الرديف    تعادل مثير بأجمل مباريات الدوري الانجليزي    وزير سوداني سابق يعلن عودته للمشهد بخطاب من رئيس الوزراء    مسيرات انتحارية تستهدف عطبرة    عزمي عبد الرازق يكتب: عودة لنظام (ACD).. محاولة اختراق السودان مستمرة!    وزير الداخلية يدشن العمل بإستخراج البطاقة الشخصية وبطاقة الأجانب من أصول سودانية    مبارك أردول: قصف مدفعي مكثف يستهدف الدلنج ونذر المواجهة المسلحة تقترب بشدة    شاهد بالصورة والفيديو.. "نهلة" تخرج في مقطع ترد فيه على زوجها "ميسرة" بعد أن اتهمها بشرب "البيرة" وإقامة علاقة غير شرعية مع شاب ببريطانيا    رئيس مجلس السيادة : عدم حرمان أي سوداني من استخراج الأوراق الثبوتية حتى وإن كان لديه بلاغات جنائية فهذه حقوق مشروعة    انخفاض أسعار السلع الغذائية بسوق أبو حمامة للبيع المخفض    مكتول هواك يترجّل    شاهد بالفيديو.. الفنان أحمد أمين وعروسه الحسناء يرقصان في "جرتق" زواجهما على أنغام أغنية (يا سلام سلم)    هل استحق الأردن والمغرب التأهل لنهائي كأس العرب؟    توجيه بصرف اجور العاملين قبل 29 ديسمبر الجاري    شاهد بالصور.. المودل هديل إسماعيل تعود لإثارة الجدل على مواقع التواصل بعد ظهورها بأزياء ضيقة ومحذقة ومثيرة    "ونسة وشمار".. زوجة مسؤول بالدولة تتفوه بعبارات غاضبة وتعبر عن كراهيتها للإعلامية داليا الياس بعد إرسال الأخيرة رسالة "واتساب" لزوجها    تونس.. سعيد يصدر عفوا رئاسيا عن 2014 سجينا    مستشار ترامب يصل إلى الرياض    هل يمكن أن يؤدي الحرمان من النوم إلى الوفاة؟    بنك السودان يتأهب لإطلاق المقاصة الإلكترونية    الأردن يفوز على السعودية برأس رشدان ويتأهل لنهائي كأس العرب    والي الخرطوم يوجه بالالتزام بأسعار الغاز حسب التخفيض الجديد    البرهان يصل الرياض    ضبط أخطر تجار الحشيش وبحوزته كمية كبيرة من البنقو    تعرف على جوائز كأس العرب 2025    النوم أقل من 7 ساعات ثاني أكبر قاتل بعد التدخين    ريال مدريد ينجو من فخ ألافيس ويلاحق برشلونة    بعد غياب طويل.. أول ظهور للفنانة المصرية عبلة كامل بعد قرار السيسي    منع نقل البضائع يرفع أسعار السلع في دارفور    ترامب يعلن: الجيش الأمريكي سيبدأ بشن غارات على الأراضي الفنزويلية    كارثة إنسانية قبالة اليونان وغالبية الضحايا من مصر والسودان    ترامب يلغي وضع الحماية المؤقتة للإثيوبيين    الإعلامية والشاعرة داليا الياس ترد على إتهام الجمهور لها بالتسبب في فصل المذيع الراحل محمد محمود حسكا من قناة النيل الأزرق    إليك 7 أطعمة تساعدك في تقليل دهون الكرش طبيعياً    قوات الجمارك بكسلا تحبط تهريب (10) آلاف حبة كبتاجون    وفاة إعلامي سوداني    مسيّرتان انتحاريتان للميليشيا في الخرطوم والقبض على المتّهمين    إسحق أحمد فضل الله يكتب: (حديث نفس...)    تصريحات ترامب المسيئة للصومال تثير غضبا واسعا في مقديشو    حريق سوق شهير يسفر عن خسائر كبيرة للتجار السودانيين    مياه الخرطوم تكشف تفاصيل بشأن محطة سوبا وتنويه للمواطنين    إدارة التعدين بولاية كسلا تضبط (588) جرام و (8) حبات ذهب معدة للبيع خارج القنوات الرسمية    محافظ بنك السودان المركزي تزور ولاية الجزيرة وتؤكد دعم البنك لجهود التعافي الاقتصادي    إحباط تهريب كميات كبيرة من المخدرات والمواد الخطرة بنهر النيل    الصحة الاتحادية تُشدد الرقابة بمطار بورتسودان لمواجهة خطر ماربورغ القادم من إثيوبيا    مقترح برلماني بريطاني: توفير مسار آمن لدخول السودانيين إلى بريطانيا بسهولة    إحباط تهريب أكثر من (18) كيلوجرامًا من الذهب في عملية نوعية    وصول 260 ألف جوال من الأسمدة لزراعة محاصيل العروة الشتوية بالجزيرة    الشتاء واكتئاب حواء الموسمي    عثمان ميرغني يكتب: تصريحات ترامب المفاجئة ..    "كرتي والكلاب".. ومأساة شعب!    ما الحكم الشرعى فى زوجة قالت لزوجها: "من اليوم أنا حرام عليك"؟    حسين خوجلي: (إن أردت أن تنظر لرجل من أهل النار فأنظر لعبد الرحيم دقلو)    حسين خوجلي يكتب: عبد الرجيم دقلو.. إن أردت أن تنظر لرجل من أهل النار!!    







شكرا على الإبلاغ!
سيتم حجب هذه الصورة تلقائيا عندما يتم الإبلاغ عنها من طرف عدة أشخاص.



جيرالد قرب يقول اللي شفته قبل ما تشوفك عنيه عمر ضايع
صابنها نشر في كورة سودانية يوم 12 - 12 - 2021


محمد عبد الماجد
جيرالد قرب يقول اللي شفته قبل ما تشوفك عنيه عمر ضايع
ونحن في طريق العودة من ملعب السكة الحديد للعجوزة بعد زيارة استاذنا الرشيد بدوي عبيد برفقة الاخوان هيثم فيصل ووائل سنادة في مدينة نصر– كنا الوحيدون الذين نشدو مع عبدالله محمد بكلمات عوض جبريل (ما بنقدر نغير في الايام سجية..محسوبات علينا المرة وهنية .. لا ..عمر العام تملي يبتدي بالدقيقة..نبدا السكة خطوة مهما طال طريقا..مهما الشك تجمع من حول الحقيقة..ولازم تبدو ظاهرة للعينين جلية .. لا ..القمري بطبايعو دايما يبني عشو.. والفي قلبو ريدة احلامو بتغشو..والريدة الاكيدة تفضل هي هي .. لا ). ونحن على مشارف كبرى اكتوبر ..الوقت كان زي الساعة خمسة مساء ..او خمسة إلّا مع شوية برد – والقاهرة حينها متل شوال الدقيق.
طبعا ما في مقارنة بين شوال الدقيق والقاهرة.
بقول ليكم كدا لزوم التمويه.
يمكن (البرد) خلاني ألخبط في الشبه.
المهم الاغنية دي في القاهرة عاملة شغل.
والله السودانيين ديل في أي حتة في الدنيا (جباهم عالية ..جباهم عالية)..الله يديكم العافية وين ما كنتوا.
عمنا ود الشفع – زول صعب كان بقول لينا (الوضوح) الايامات دي بقى زي (برطمانية) السكر وقت تفتحها وتلقاها فاضية.
احساس محبط..احساس شنيع.
احساس مؤلم تفتح برطمانية السكر وتلقاها فاضية.
وبرضو ما عارف علاقة الوضوح ببرطمانية السكر الفاضية شنو؟
يمكن (البرد) خلاني اتخيل لي علاقات ما عندها علاقة مع بعض.
ما تسألوني – خلوني اكمل ليكم العمود.
ما شي عليكم.
الدنيا برد.
في اغنية عوض جبريل (ما بنقدر نغير في الايام سجية) كمية مهولة من الحكم.
غايتو عوض جبريل داع ندو حاجات ..ممكن تعلقها في الصالون.
ممكن تكتبها في (الرقم الوطني).
عوض جبريل د ازول عجيب…الله يحمه ويغفر ليه.
حكاية (والفي قلبو ريدة احلامو بتغشو) روشتة مكتوبة بالمقاس..الناس ديل كلهم اتغشوا ..رغم انهم عارفين (والفي قلبو ريدة احلامو بتغشو).
ما عاوز اعمل ليكم الموضوع كله (عوض جبريل)..ح اعرج ليكم على ام كلثوم.
انتوا لو بتصبروا ما بتجيكم عوجة.
ما بحب (الاستعجال)..الدنيا ما طائرة.
اصبروا عليكم الله.
انا عارفكم انتم عاوزين نكتب ليكم عن مباراة الهلال وألو اجيبت المصري.
المباراة مع فريق درجة رابعة ..يعني ما بتصلح للمعيار.
لكن اللبيب بالاشارة يفهم.
والما بشوف من الغربال يبقى ايه؟
برضو الجزار الحريف ما بطلّع اللحمة مع الجلد.
زمان نحن جبنا لينا (جزّار) طلع لينا اللحمة مع الجلد.
وشال معاه في النهاية الجلد.
نحن طلعنا ساكت.
فطرنا بي فول ..رغم اننا ضابحين لينا خروف.
المهم أنا ح اكتب ليكم عن انطباعاتي لمباراة الهلال وعن مستوى المحترفين ..لأن الحكم عليهم من خلال هذه التجربة لن يعطينا للنتيجة الصحيحة.
الانطباعات يمكن تصدق ويمكن ما تصدق ..احسن تكونوا عارفين …بنكتب عن (انطباعات) ساي.
خلونا نتحاور بس.
والله في جنس برد.
في القاهرة لو عاوز تكتل ليك زول افتح ليه المروحة.
نمشي على المباراة …المراوح ملحوقة.
اول حاجة سرني الظهور الاول للمحترف الملاوي جيرالد …زول عندو هيبة في الملعب …وظاهر عليه عندو شخصية.
قبل ما اتحدث عن جيرالد ..عجبني شكل الهلال …ظهر الهلال في المباراة الاولى بأجسام قوية وقوام طويلة.
اوتارا وحسين النور وجيرالد وابراهيم مصطفى – لاعبون بقوام ممتاز ..اشكالهم كدا زي شكل الهلال سنة 1987 ..ايام اسامة الثغر والريح مصطفى وصبحي ومنقستو.
ارجع ليكم لي جيرالد.
الملاوي جيرالد اول حاجة عمل (7) تمريرات من النوع ابو كديس ..على الاقل مفروض تلاتة منهن يكونن اهداف.
التمريرة السحرية للهلال رجعت تاني ..حضروا (مساطبكم) وقهوتكم من بدري.
والعندو جلابية عاجباه ..يخليها لي مباريات الهلال.
الجميل ان جيرالد ظهر وهو يرتدي الفانلة رقم (10).
10 رجعت تاتي.
جيرالد وهو في الهلال كأنه بيلعب ليه سنين …الازرق يليق به ..وهو كدا في اول ظهور له في القاهرة زي العاوز يقول لينا : (اللي شفته قبل ما تشوفك عنيه..عمر ضايع يحسبوه إزاي عليّ..انت عمري اللي ابتدي بنورك صباحه).
نحن الهلالاب طبعا عندنا تقدير خاص للرقم (10).
وممكن نرد التحية لجيرالد بما هو احسن منها ونقول ليه : (الليالي الحلوه والشوق والمحبة..من زمان والقلب شايلهم عشانك..دوق معايا الحب دوق حبه بحبه..من حنان قلبي اللي طال شوقه لحنانك).
ام كلثوم في مصر طبعا ممكن تشرب بيها الشاي …وتركب بيها المترو …وتدفع بيها حق المواصلات والتاكسي.
ام كلثوم في مصر لو مشيت بيها الصرّاف ..بغيروا ليك باغنياتها عملة مصرية.
عشان كدا قلت ادخل اليكم الليلة بام كلثوم.
بكرة يمكن امشى ليكم على فاتن حمامة.
معاكم انا لغاية الاهرامات.
ما اطلع ليكم من الموضوع.
جيرالد ..انطباعي عنه ..انو سوف يضع بصمة في الهلال ..وهو لاعب عندو شكل..ولمساته ساحرة.
زول هادي ورايق وبيشبه الهلال.
ما عاوز اقول ليكم اكتر من كدا.
افهموها براكم.
جبت ليكم ام كلثوم عديل كدا وانا اتحدث عن جيرالد.
اعمل ليكم اكتر من كدا شنو؟
بعد كدا إلّا اجيب ليكم (خوفو) في العمود دا ..واجي شايل ليكم كبري قصر النيل.
اعمل ليكم شنو؟
ما عاوزين تفهموني.
لكن بعيدا عن جيرالد ..في تلاتة في مباراة الامس سروني ..وخلوني اطلع من الملعب وأنا مبسوط.
رغم ان الاداء العام للهلال قد لا يكون عجب الكثيرين ..خاصة ان الهلال يلعب امام فريق درجة رابعة.
في ناس طلعوا ما راضيين من الاداء ..لكن أنا لا..طلعت مبسوط.
ح اقيف ليكم شوية في ثلاثة لاعبين …طلعت بيهم من المباراة وانا شايف فيهم حاجة تانية..
تلاتة عندهم رأي تاني.
اول هؤلاء اللاعبين …هو اللاعب حسين النور ..الذي لعب في مباراة الامس كلاعب ارتكاز.
حسين النور دا لو اجتهد شوية ومشت معاه ممكن يكون النور والموية في الهلال.
قوام ..وصغير في السن ..ولاعب فنان وعنده مهارات.
اصبروا عليه بس.
انتظروا حسين النور.
اللاعب الثاني الذي لم اتفاجأ به هو اللاعب حسن متوكل ميسي الذي لعب امس ايضا في خانة ما خانتو …وهو يلعب محور ثاني الى جانب حسين النور.
حسن متوكل عندو الكثير.
في حاجة بتجمعو مع عمر بخيت ..اتمنى ان يستفيد منها الهلال.
حسن متوكل عندو نفس عقلية عمر بخيت ..لاعب بتشعر انه لاعب كبير ..وبتصرف صاح.
من اجمل لقطات المباراة تسديدة قوية لحسن متوكل في المرمى المصرى ..كاد ان يأتي منها هدف للهلال.
اوتارا برضو لعب كرة لالوبية في المرمى كادت ان تكون هدفا.
اللاعب الثالث ..قبل ما يطير من رأسي ..هو المهاجم النيجيري ابراهيم مصطفى.
اقول ليكم مميزات هذا اللاعب.
اول حاجة هو لاعب بضغط على الدفاع ..ما في مدافع برتاح معاه ..بعمل ليهم قلق شديد.
كلمو صلاح نمر يشيل شيلتو.
صلاح نمر وعادل ابوجريشة.
ابوجريشة ذنبو شنو؟
الحاجة التانية ..يمتاز ابراهيم مصطفى بالضربات الرأسية ..عندو ثلاثة ضربات من عكسيات وصلته ..ما عارف طلعت كيف؟
ابراهيم مصطفى ..لاعب مجموعات جاهز.
بدهس المدافعين ..وبهرسهم هرس صاح.
اسمعو مني الكلام دا..وشوفوا واحكمو براكم.
طبعا ما اتكلمت ليكم عن التنزاني ريتشارد …..هذا اللاعب سريع …وجريء ..في حركتو زي شوبيلا ..واضح ان مدرب الهلال يضع عليه امال كبيرة.
ومن هسع اقول ليكم حسين النور وحسن متوكل وريتشارد ..سوف يجدوا اهتمام خاص من مدرب الهلال البرتغالي.
الزول دا بيبني عليهم شغلو.
ارجع ليكم للملاوي جيرالد ..واقول ليكم سوف تستمتعوا بأداء هذا اللاعب.
مع هذا – اكتب من خلال انطباعات ..وإحساس الوهلة الاولى.
والاحساس في كتير من الاحيان ما بخيب.
عشان بعدين ما تقعدوا تتغالطوا لي.
……
متاريس
بكرة في تمرين الساعة 4 مساء.
والهلال سوف يلعب في ملعب العباسية يوم الثلاثاء.
اصبروا لي بس.
في حاجات تانية.
انتوا لو بتصبروا ما بتجيكم عوجة.
استاذنا الرشيد بدوي عبيد بخير وعافية.
السودان كله عند الرشيد في القاهرة.
بكرة يوم تاني.
….
ترس اخير : قربت اقول ليكم لاحق الكهرباء.

انقر هنا لقراءة الخبر من مصدره.