بابكر سلك بدينا اللولوة *منذ انطلاق صافرة نهاية العك الذي مارسناه في مستهل مشوار المجموعات *بدينا اللولوة *لو غلبنا الهلال الكورتين *وتعادلنا مع صن داونز في بلدو *وخسرنا من الأهلي الكورتين *بنصعد *حتى في لولوتنا ما بنلولو للفرق الأخرى معانا *قول غلبنا الهلال كورتين *وتعادلنا مع صن في بلدو *بنعمل تمنية *صن داونز ده ماعندو لولوة؟؟؟ *ما صن داونز لو تعادلنا معاهو في بلدو بعمل خمسة *وقول صن داونز لولو هو ذاتو وغلب الهلال في أم درمان *هو أصلو الهلال ده يتغلب لينا مرتين ما يتغلب لصن داونز هنا؟؟؟ *كده عمل تمنية *واتلولو في الأهلي وطلع بنقطة من ستة *البصعد منو يا ربي؟؟؟؟ *والهلال ذاتو الحاميهو اللولوة شنو؟؟؟ *مش وارد يغلبنا في الكورتين؟؟؟؟ *بعمل سبعة *يتلولو في الأهلي بمصر يدرن *عمل تمنية *يتلولو في صن بأم درمان *يبقى صن ومنو في التونسية؟؟؟؟ *اللولوة ما حبابها *كنا نمني النفس بانتصار يفتح الشهية نعقبه بانتصار يليه مباشرة *وعندها ما كنا بنحتاج للولوة *اللهم لا تخوزقنا لا تعولقنا لا تلولونا *أقول قولي هذا واستغفر الله لي ولكم *قوموا لممتازكم يرحمكم الله *أيها الناس *معجزة نحتاجها *ففرق المجموعة كلها تجيد اللولوة *وما كان في داعي نتلولو معاهم *لكنها إرادة الله *هو يعني نحن بنفهم أحسن من المجلس؟؟؟ *المجلس قال مباريات مصر التجريبية كافية يبقي كافية ولو خسرنا ناهيك أن نتعادل *المجلس قال المعسكر يطول أحسن *يبقى المعسكر الطويل أحسن ولو بقى أربعة شهور وعشرة يوم *وبعدها نطلع من الحبس ونطلع من المجموعات *المهم المجلس كلامو صاح *المجلس قال الطرف اليمين يقعد لمن تفوتو أربعة تمارين وما يشارك *كلام المجلس صاح *هو نحن بنعرف أحسن من المجلس؟ *والمجلس ده ما بحب الدغوتات *يبقى نقفل قداديمنا دي ونهتف *هشتكنا وبشتكنا يا مجلس *أيها الناس *إن كنا فعلا نريد تأهلا *يجب علينا أن نعمل لذلك بجدية *يجب أن نوفر الثقة في نفوس اللاعبين (برغم عدم وجود معد نفسي على ما أعتقد) *ويجب أن نصر على انتزاع تلات نقاط من الأهلي في واحدة من مباراتي بلدو *لاحظتوا قبيل في اللولوة دي لم ترد أي لولوة في نقاط الأهلي في كل مبارياته بالمجموعة؟؟؟ *لأن الأهلي كبير فعلا لا مجازا *أيها الناس *إن تنصروا الله ينصركم *أها *نجي لي شمارات والي الخرتوم *والينا المكلف بينا *ارفع الأكف وادعو لينا *حلايب وشلاتين والمريخ ربنا من مصر يرجعهم لينا سلك كهربا ننساك كيف والكلب قال بالتنظيم لا باللولوة تلعب المجموعات وإلى لقاء