* تسونامي جنوب افريقية عاصفة هبت بالأمس بأم درمان داخل ستاد الهلال واجتاحت فريق الهلال بلا رحمة . * بدأت المباراة وقبل ما نستفتح كويس هجمة منظمة لصن داونز تناقل سلس للكرة بين لاعبي الهلال واحد واتنين وبينية امامية استلم المهاجم وبيسراه مباشرة ارضية زاحفة تمشي الهوينا كما يمشي الوجي الوحل لحدي ما لبست الشبكة ، صراحة انا فتشت الحارس الامين ابوجا ، لا لا الامين ما اسمه الامين دي صفة للحارس الذي يذود عن مرماه بأمانة وقوة ، فتشت ابوجا لقيته مرتمي على الارض بلقطة تلفزيونية رائعة ، تابعت الاعادة وقت التسديد لقيت ابوجا قاااعد في الزاوية القريبة بس صراحة بعاين وين ما عرفت . * المهم قلت يمكن دي حمى البدايات الشابكنا بيها رمضان احمد السيد ، لكن حمى شديدة لو فعلا هي ، حمى تخلي الحارس يرجف من اول ثانية والدفاع سرحان ، شوية والكرت الاحمر ظهر لمدافع صن داونز بعد عشرة دقائق بالضبط من بداية المباراة ، كده المهمة بقت أسهل الهلال مكتمل بدراً وصن داونز منقوص بلاعب مدافع قوي غادر الملعب مبكراً قلنا تتحسن امور الهلال لكن صن داونز برضو ما مقتنع ، بهاجم بضراوة وبصنع فرص وبتغلغل في دفاعات الهلال بسهولة ، جات مخالفة بعد منتصف الملعب ضد الهلال ، عاينت لابوجا لقيتو راكز ، عاينت للاعب صن داونز لقيتو يكشف على ابوجا ، ابوجا كان ذكي ، ونبيه ، وقف ليه في الزاوية الضيقة القريبة ، وفتح ليه الزاوية البعيدة عشان يطير في الكورة يطلعها ، الحكم صفر توووف الكورة جوة الشبكة ، حبوبتي قاعدة بعيد وما بتشوف اسمعها ليك تقول أجي يا اخواني ، جبت الاعادة سريع عشان اشوف ابوجا ده عمل شنو ، اصلاً الزاوية ضيقة يعني خطوة وتشيل الكورة بيدك ، لقيتو اخد خطوة فعلا لكن ما اتجاه الكورة ، والله صحي ، اتجاه القائم الايسر ، ابوجا مسك القائم عديل ، كورة من سقط لقط عشان تمسكها تقوم تكتل ليها ملف ، يعني بمنطق الرياضيات المسافة ما بين ضربة المخالفة والمرمى وما بين ابوجا والقائم الايسر ، والا بلاش حسابات ومنطق ، دي ما عاوزة ليها منطق ابداً ، الغريبة ابوجا كمل المباراة عادي ، واضح من الهدفين الاول والتاني انو الكورة في ام درمان والحارس في ابوجا ، اتفاقية سلام ما بترجع الهلال للمباراة ، الواضح الاكتر انو صن داونز ما عاوز يقيف وابوجا ذاتو ما عاوز يقيف ، هم يهاجموا وهو يفتح وينبطح ، والانبطاح ذاتو متنوع . * الشوط الثاني ومن دربكة زرقاء الهلال جاب قوون بقت اتنين واحد ، لسه الهلال حينظم العابه والمدرب استعد عشان يكمل تنظيراته وتبديلاته العشوائية ومن هجمة منظمة كعادة صن داونز يفتح الهلال دفاعه مشرعاً وتمريرة جميلة خلف دفاع الهلال يجدها المهاجم امامه يسدد مباشرة وكأن ابوجا غير موجود ، هدف في الزاوية البعيدة ، ابوجا ارتمى بلقطة تلفزيونية لكن ما نفعت ، بعدها واصل الغربال اضاعة الفرص وواصل دفاع الهلال صنع الفرص للخصم وفتح الشوارع وواصل ابوجا مسلسل الانهيار حتى وصلنا للهدف الرابع من ذات التمريرات البينية والتي ضربت وزلزلت دفاع الهلال بقوة وعنفوان عجيب ، واصل عشرة صن داونز الاستعراض امام فريق الهلال المكتمل والتائه تماماً وبرع حارس مرمى صن داونز في مراوغة لاعبي الهلال مما جعل الغربال ينقض عليه ويرتكب معه مخالفة لكن الحكم مرر اللعبة وكادت الكرة تدخل لكن ياسر مزمل اضاعها وتفاجأ الجميع بسعادة الحكم يحتسب ركلة جزاء للهلال ، حقيقة ضحكنا عليها من الاعماق . * الحكم بتاع امبارح بالمناسبة اسوأ من حكم مباراة المريخ ، تحامل على صن داونز بطريقة غير عادية ورفض ان يطرد اي لاعب من الهلال بينما اسرع بطرد لاعب صن داونز من اول دقائق ، في الشوط الثاني مدافع الهلال انقض على رجل لاعب صن داونز امام الحكم في تصرف يستدعي البطاقة الحمراء المباشرة لكن الحكم اكتفى بالانذار فقط مما اثار حفيظة لاعبي صن داونز واحتكوا مع الحكم الضعيف الذي انذر بعضهم بسبب الاحتجاج ، وركلة الجزاء كانت فضيحة اخرى ، لكن يبدو انها مهمة للحكم نفسه ، يعني تاني يعمل شنو . * يعني الحكم من جهة ودفاع الهلال وابوجا من جهة ، دي نظرية فيثاغورث ما بتحلها . * مدرب الهلال في اول مباراة ما شاف بوغبا مع صن داونز لمن جايبو امبارح تاني يرتكز ليهم ، هدايا بوغبا لا تقاوم . * واحد كان حاضر معاي المباراة نص الشوط الثاني قال لي هو صن داونز ده طردوا منو لاعب والا زادوه لاعب ؟ * اختفت نغمة اجاجون ، يا اجاجون قوم جيب القوون . * الغربال نال بطاقة صفراء ثانية بعد الاولى في مباراة المريخ ، خشونة الغربال مع الخصوم باتت صفة مسجلة له ، منحه الحكم فرصة ذهبية لاحراز هدف من ركلة جزاء لكنه اضاعها قبل ان يحرزها عثمان . * لقيت واحد يمدح بعد الكورة المدحة الشهيرة اياها ، ( لاقوك بالعشرة وغلبوك بأربعة .. شالوليلي لفاها من بدري اودعا .. وموكوينا شاتها من بعيد بلبعا… مولينا خطير بالتالت اتبعا … ونفس اللاعب تماها وربعا … وابوجا ناييم في المرمى مربعا .. فاتح للمرمى والشبكة وسعا .. ودفاع متهاااالك مليان شوارعا … اما الغربال تماها مصارعة .. ابراهيما من القوون طلعا .. كل الهجمات خربها وضيعا … روفا اللعاب قال ما عاوز يلعبا ..موتا الخواااجة لا فاهم لا وعى … لاقوك بالعشرة وغلبوك باربعة .. ) . * المحلل الفني هيثم مصطفى في كل مباريات الهلال كانت لديه عبارة ثابتة بين الشوطين ، الهلال محتاج لعبد الرؤوف ، امبارح نسى عبد الرؤوف ذاتو ، قال المحترفين تعبانين واللاعبين المحليين في كشف الهلال مافي قامة الهلال . * حسب كلام موتا انو قال لعبد الرؤوف قوم سخن عشان تدخل وعبد الرؤوف قال ما عاوز أبيت . * هسي دي كورة يدخل فيها عبد الرؤوف يا موتا ، مفترض تدخل الدفاع المدني وقوات حفظ السلام مع التسونامي الهادر ده ، بعدين روفا يعمل شنو تمريرات وصلت للغربال وضيعها ابراهيما داك خليهو ساي . * المهم عبد الرؤوف قال ما داير يلعب ، يعني لو المدرب موتا قعد وواصل تدريب الهلال معناها نجهز فنيلة روفا من هسي ، وخلوه يتدرب في ( ابوجا ) و( ابوعشرين ) . آخر الداعيات * أربعة خلت ارض المقبره حزينة ، هدف من ( شالوليلي ) وهدف من ( موكوينا ) ، وهدفين من ( مولينا ) ، اللهم لا تمحنا لا تبلينا .
