محمد الطيب الأمين المريخ .. خدمة شمال وعرق حُكام !! * المقولة الراسخة هي : (خدمة يمين وعرق جبين). * والله العظيم (عرق الجبين) سمح. * ما في أجمل من عرق الجبين. * البتعود يأكل من عرق جبينو ما بحب الباردة. * والبحب الباردة ما بأكل من عرق جبينو. * وبما أن ذلك كذلك فإن المريخ الشهير ب(الإصيفر) خرج بنقطة غالية أمام الهلال في مباراة لعبها أولاد ابراهومة تحت شعار : (خدمة شمال وعرق حكام). * تعادل بارد. * لا فيهو (عرق) ولا فيهو (جبين) . * هو وينو الجبين ذاتو؟ * الجبين انتهى منو حازم في مصر من زمان. * وهنا السؤال يطرح نفسه : هل خدمة المريخ من قبل جهاز التحكيم رد جميل أم عادات وتقاليد؟ * وما هو شعور لعيبة المريخ عندما يعلمون أن طاقم التحكيم يلعب معهم؟ * بل ما هو شعور لعيبة المريخ عندما علموا أن رئيس الأهلي المصري كابتن الخطيب قد اشترى المريخ في مجموعات أبطال أفريقيا. * كانت بيعة رخيصة. * بيعة أطلقنا عليها نحن وأولاد حلتنا إسم (بيعة سوق العتبة). * (نغلب ليكم صن داونز رايح جاي ، ونغلب ليكم الهلال رايح جاي ونديكم 3 نقاط ، وتأكلوا وتشربوا على حسابنا) . * وجماعتك صدقوا. * والله صحي. * لا في زول استقال ولا في زول تحدث عن القيم. * بيعة وما تمت. * ما هو شعور لعيبة المريخ؟ * هل الموضوع بالنسبة ليهم عادي؟ * حاجة تكسف والله. * أمس الأول فعل الحكم كل ما من شأنه هزيمة الهلال. * الحكم اجتهد أكثر من رمضان عجب. * صحيح نحن لا نبرر للاعبين الهلال ولكن ما حدث مؤسف. * هدف ملغي وضربتي جزاء وما خفى أعظم . * بالأمس أدان مجلس الهلال ورفع مذكرة ضد الحكم. * الإدانة ما كفاية. * الشغل ده داير متابعة وعين حمراء. * لابد للهلال أن يتحرك. * يتحرك بقوة وفي كل الاتجاهات. * نوايا الاتحاد العام والمريخ واضحة. * تحتاج لوقفة قوية وعين حمراء. * دي لقيمات تقيلة. * المهم .. نقيف لحدي هنا ونكمل الباقي عبر حلقة اليوم من خلال قناة (دقايق) علي اليوتيوب. * و.. و.. * والله في.
