محمد عبد الماجد الجماعة ديل الجوهرة الزرقاء والولايات عندهم واحد..!! . أربعة جوة. . وأربعة برة. . في ام درمان. . او عطبرة. . ما فارقة معاهم (الجغرافيا) كتير. . في ود نوباوي او في الامل .. ما بقيفوا كتير في (التاريخ). . كل مباراة فيها اربعة. . أي حاجة بي اربعة. . نغلب اربعة في النجيل الطبيعي .. ونغلب اربعة في النجيل الصناعي. . عشان تاني ما يقوم واحد ينط لينا في السخانة دي ويقول لينا (عدالة المنافسة) و (تكافؤ الفرص). . ومستحقات السلام. . ناس هيثم كابو بقوا لينا زي جبريل ابراهيم. . بالمناسبة (نجيلة حميدتي) وصلت وين؟ . طبيعي وصناعي نحن عندنا واحد. . انتوا وين (تكافؤ الفرص)؟ .. بقينا ما بنسمع (الحنك) دا. . الجماعة ديل قنعوا وإلّا شنو؟ . منتظر ناس المريخ يصينوا ملعبهم .. عشان ناس كوبر والزومة وودنوباوي يقولوا ليهم ما في تكافؤ فرص. . رغم ان كوبر بملعبها وود نوباوي بملعبها. . انتوا هسع ما عندكم ثلاثة رؤساء .. سألنكم من (تكافؤ الفرص) دي. . الموسم الماضي لعبتوا بي كشف فيه (43) لاعبا .. الموسم دا دخلوا لينا بكشف فيه ثلاثة رؤساء. . فريق المريخ بقى زي (الحرية والتغيير) .. فيه ثلاثة رؤساء. . كل سبت بي رئيس جديد. . نحن قاعدين نسمع بي (اعضاء المجلس).. لكن (رؤساء المجلس) دي ما بنسمع بيها إلّا في المريخ. . انت تعال هنا ناس المريخ ذنبهم شنو؟ . تغلبوا الامل اربعة .. وتقبلوا على المريخ. . ناس المريخ كان عندهم (امل). . الجماعة ديل اصلو ما بقنعوا. . بعد مباراة يانج افريكانز مفروض يكونوا قنعوا. . لكن واضح انه كان عندهم (امل). . ناس المريخ الفيهم مكفيهم. . لا أنا بقول ليكم كدا – نظام للمعلومية وبس. . ما عندي أي قصد تاني. . امام ود نوباوي سجلنا اتنين في الشوط الاول واتنين في الشوط الثاني. . بي نظام. . بالنجيلة الطبيعية. . اتنين سجلت بإقدام (وطنية) وهما ياسر مزمل ووليد الشعلة .. واثنين بإقدام (اجنبية) وهما ليليبو وجارجو. . عشان ناس الرشيد المهدية ما يقولوا أي حاجة. . يسجلوا الوطنيون يقولوا وين المحترفين؟ . يسجلوا المحترفون يقولوا وين الوطنيين؟ . قسمناها ليهم. . في عطبرة عملنا نفس النظام. . اتنين في الشوط الاول. . واتنين في الشوط الثاني. . اتنين عبر اللاعب الوطني وليد الشعلة .. واتنين عبر المجنس اجاجون. . عشان ناس الرشيد المهدية ما يتكلموا في التجينس. . نحن عارفنهم. . وبنعمل حسابنا من بدري. . اصلو ما بنخلي حاجة للظروف. . في عطبرة .. عشان ناس الامل ناسنا اديناهم هدف.. والحكم صبري ما قصر معاهم وحسب ليهم ضربة جزاء. . وبرضو النتيجة طلعت 4 / 1. . الهدف الرابع الذي سجله وليد الشعلة .. هو هدف اسمو هدف (القطر). . عشان الكلام يقع لي ناس عطبرة. . القطر (ليليبو) ساق ليه ثلاثة مدافعين من الامل عطبرة وطلع بيهم برة البلد ولعب الكورة لي وليد الشعلة. . كان ما بخاف الكضب .. (الكشافات) الشمالية المشي عليها ليليبو .. اتشهقت.. وفتحت خشمها. . وليد الشعلة عشان يعطي فرصة لمدافعين الامل عشان يرجعو .. انتظر وخلاهم يبقوا قدامو ثلاثة .. ولعب الكورة في جسم الحارس عشان الهلال يسجل الهدف الرابع. . مع ذلك نقول ان فريق الامل قدم مباراة كبيرة .. ويمكن نتيجة المباراة لا تعكس مجريات المباراة. . الاستحواذ كان في صالح فريق الامل .. وشكل الفريق العطبراوي خطورة كبيرة على مرمى الهلال ولعبوا بأسلوب ضاغط .. ساعدهم على ذلك ارجاع لاعبو الهلال الكورة الى الوراء. . عدد الضربات الركنية كانت لصالح الامل. . يمكن نتيجة المباراة كانت سببا في ان يظهر الهلال بهذا الشكل ويلعب من اجل ان (يكتل) الكورة .. رغم ان أي هجمة قادها الهلال على مرمى الفهود سجل منها الهلال هدفا .. مع اضاعة هجوم الهلال لفرص سهلة .. كانت اضمن من الفرص التى سجل منها الهلال. . كذلك اضاع فريق الامل بعض الفرص ..ووصل لمرمى الهلال كثيرا. . مباريات الدوري الممتاز وفي الاجواء المشحونة والتحكيم السوداني والحضور الجماهيري الكبير والضغط الذي يمارسه المنافس خاصة عندما يلعب في ملعبه .. تقدم خدمة كبيرة للهلال قبل انطلاقة مباريات مرحلة المجموعات الافريقية .. وتكشف مباريات الدوري الممتاز الكثير من الثغرات .. وترفع مستويات اللاعبين وتضعهم امام تجارب تنافسية حقيقية. . الهلال مازال يحتاج للكثير من العمل .. وتبدو احتياجات الهلال قبل التسجيلات الشتوية واضحة .. نتمنى ان يصل الجهاز الفني ومجلس الهلال الى صفقات تسد الثغرات التى تظهر في دفاع الهلال تحديدا. . سالمون بانغا كان بعيدا ..وكاد ان يهدي الفهود اكثر من هدف .. ارتكب بانغا مخالفات كثيرة امام مرمى الهلال شكلت عليه خطورة كبيرة. . الهلال في هذه المباراة حالفه التوفيق .. وساعده التكتيك الذي يلعب به فلوران فهو يعرف كيف يخرج من المباراة منتصرا. . تسجيل اربعة اهداف في مرمى الامل عطبرة وهو يلعب في عاصمة الحديد والنار .. امر اظن لم يحققه الهلال قبل ذلك في الدوري .. نتيجة عريضة حققها الهلال امام الامل عطبرة .. علما ان فريق الامل يمتلك خامة ممتازة وهو يمكن ان يكون في هذا الموسم في افضل حالاته .. مقارنة بمستوياته في المواسم السابقة. . فريق الامل عطبرة يقدم كورة جيدة .. ويملك عناصر ممتازة ..ويقوده جهاز فني محترم .. استطاع ان يضع بصمته رغم قصر الفترة التى اشرف فيها على الفريق. . ينتظر ان يكون لفريق الامل كلام تاني في المباريات القادمة .. على جمهور الامل ان يدعم هذا الفريق فهو قادم. . الامر الذي اريد ان اعلق عليه واقف عنده .. هو الطريقة (المملة) التى تم نقل المباراة بها على شاشة النيلين. . لأول مرة اشاهد مباراة تنقل بهذا الاسلوب الغريب .. اذ ينقلنا مخرج المباراة بعد كل تمريرة الى المدرجات ليعرض لينا صور المتفرجين واندهاشهم وهم في المدرجات .. يكاد مخرج المباراة ان يكون عرض لنا كل مشجع شاهد المباراة من استاد عطبرة. . مخرج المباراة عرض لنا اثناء المباراة وليس في اوقات توقفها صور لأطفال ومشجعين بشوارب او بدون شوارب .. بعضهم كان يلقى التحية على الاخرين وبعضهم سارح في المباراة. . الصور والمشاهد التى قدمها مخرج المباراة للجمهور وهم في المدرجات اكثر من الصور والمشاهد التى قدمها المخرج من المستطيل الاخضر للاعبين. . اذا احصت قناة النيلين ومدير القناة الاستاذ عبادي محجوب المشاهد التى قدمها مخرج المباراة من المدرجات سوف يصل الى عدد قياسي .. هذا الامر (التعسفي) افسد حلاوة المباراة واحرق اعصاب المشاهد ، يجب ان يحاسب مخرج المباراة والمسؤول عن النقل التفلزيوني لهذه المباراة على ابتكاراته تلك. . لا يعقل ان ينقلنا المخرج للمباراة اثناء هجمة خطيرة على احدى المرميين او اثناء تنفيذ المخالفة الى المدرجات. . المشاهد لم يشاهد ضربة الجزاء عندما احتسبت لصالح الامل ولم نشاهد الهدف الذي سجله فريق الامل وتم نقضه إلّا في الاعادة. . الكاميرا كانت في وادي تاني. . نحن قاعدين نتابع في المباراة .. كنا بنميل مع الهجمة ظننا مننا ان هذا الميل يمكن ان يجعلنا نشاهد الهجمة برة التلفزيون او بالصفحة او (الجنبه) ..لأن مخرج المباراة كانت كاميراته لا تكمل الهجمة .. كان تصويرهم حده معين .. في مربعات في الملعب لا تستطيع كاميراتهم ان تصل اليها. . المعلق محمد فضل الله كان يحاول ان يغطي بتعليقه على المباراة على هذا الخلل وعلى تلك الاخطاء التى وقع فيها مخرج المباراة. . نحن نعرف ان الامكانيات ضعيفة .. وان القناة تنقل الدوري بدون امكانيات .. لكن برضو يجب ان لا تصل الامور الى هذا الحد الذي يجعل مخرج المباراة يركز كاميراته على المدرجات .. وينسى ما يحدث في المستطيل الاخضر. . الواحد بسبب (الميل) مع الهجمة لمن شعر بعد المباراة ان رقبته اتعسمت من مشاهدة المباراة على قناة النيلين. . ………………….. متاريس . لامين جارجو نقل ابداعته الى عطبرة… قطار الشوق وصل. . اجاجون .. كل مرة يثبت انه لاعب مهم وحاسم. . اجاجون حسم المباراة من الشوط الاول. . الحاوية فكتور والقطر ليليبو ما فارقة معهم يلعبوا في الجوهرة او في عطبرة. . ما شاءالله. . المهمة انتهت بنجاح. . ننتقل الى مباراة الفلاح .. ومهمة اخرى في انتظار الهلال. . بالتوفيق ان شاءالله. . … . ترس اخير : نقفل على كدا.
