محمد عبد الماجد ابوجيبين (جيبو) فاضي!! . كتبنا كثيرا عن مباراة نهائي كأس السودان – وما عاوزين نحمّل الموضوع اكثر مما يحتمل – الكرة الآن في ملعب اللاعبين والكلام كلامهم. . النهائي قائم في موعده ان شاءالله – وجمهور الهلال سوف يكون في الموعد بإذن الله. . هسع لو صبت مطرة؟ . هسع علاقة المطرة بالكلام دا شنو؟ . نحن هنا نشيد بالاتحاد العام ولجنة المسابقات التى اصرت على قيام المباراة ولم تمنح الشركة الراعية فرصة في التدخل فيما لا يعنيها. . لموا ميدالياتكم عليكم. . نكتب اليوم عن عودة المدرب البرازيلي هيرون ريكاردو للمريخ بعد (10) سنوات من اشرافه السابق على المريخ الذي كان في عام 2012م. . دا بالنسبة للمريخ. . ريكاردو على ما اعتقد اشرف على الهلال في سنة 2005م او 2006م وها هو يعود للمريخ بعد (17) سنة من اخر مرة اشرف فيها على الهلال. . الناس ديل برجعوا للوراء بسرعة خرافية. . هسع لو صبت مطرة؟ . يا زول علاقة المطرة بالكلام دا شنو؟ . يعني ريكاردو عندما درب الهلال الجزولي نوح لاعب المريخ الحالي عمره كان سنتين. . شوفوا الدنيا دي كيف؟ . كيلو اللحمة كان ب (14) جنيه. . ورطل اللبن كان تجيب (بستلتك) بس. . والدولار كان بجنيهين ونص. . دنيا. . عودة ريكاردو دي .. زي المغترب البقعد برة البلد (20) سنة وأول ما يرجع .. وأنت في كبري الحديد بتاع النيل الازرق يقول ليك : دا كبري شنو؟ . المشكلة بعد ما تقول ليه دا كبري النيل الازرق بتاع الحديد (جامعة الخرطوم) بقول ليك : بودي وين؟ . دي ما كانت (20) سنة غربة. . في واحد قال لي والله بعد ريكاردو رجع للمريخ بعد هذه السنوات خايف من عودة (الكيزان). . ما في حاجة مستحيلة في الزمن دا. . ريكاردو مدرب محترم وشخصية جميلة … لكن افتكر ان عودته بعد هذه السنوات لن تضيف للمريخ شيئا – خاصة ان ريكاردو ظل السنوات الاخيرة بدون نادي. . طموحات ريكاردو وحماسه قل – وهو الآن بعيد عن الملاعب وبعيد عن التطور الذي حدث في مجال كرة القدم. . أي مدرب سنوات نجاحه في التدريب لا تتجاوز ال (10) سنوات .. او الغالبية العظمى منهم كدا .. بعضهم يمكن ان يظل العمر كله ناجح .. اعتقد ان ريكاردو ليس من بينهم. . قبل تعاقد المريخ مع ريكاردو اعتقدنا ان الرئيس (مشترك) ايمن مبارك ابوجيبين ، رئيس (خطير) وسوف يعمل نقلة في المريخ – خاصة ان ابوجيبين شخصية (مشكورة) و (محترمة) وقد بدأ العمل في المريخ بصورة (مؤسسة) وتحدث بخطاب راق وانطلق بشكل جيد في المريخ. . الاشياء الجميلة نحن ما عندنا معاها مشكلة. . لكن بعد التعاقد مع ريكاردو – انكشف لنا امر ابوجيبين .. لأن التعاقد مع مدرب مجرب وبعيد عن العمل امر لن يضيف شيئا للمريخ. . الفيك اتعرفت يا ابوجيبين. . غايتو البركة في (ابراهومة). . ركزوا يا مريخاب في ابراهومة. . نحن الهلالاب كنا نتوقع ان تكون تطلعات المريخ وطموحاتهم اعلى من ريكاردو. . نغشكم؟ . وقت قالوا لينا المريخ تعاقد مع ريكاردو .. قلنا يبقى لا خوف من المريخ في هذا الموسم. . سوف يفقد المريخ المزيد من النقاط في الفترة القادمة .. وبطولة الممتاز في هذا الموسم ان شاء الله سوف تكون الاسهل للهلال. . اعود الى المريخ وأقول من باب الامانة (المهنية) ان المدرب التونسي غازي الغرايري عمل في ظروف صعبة .. ولم تساعده الاوضاع – مع ذلك استطاع الغرايري ان يحعل المريخ يظهر بشكل رائع في الموسم الماضي بعد ان اصبح مديرا فنيا للمريخ. . الفارق بين الهلال والمريخ عندما اشرف الغرايري على المريخ كان ( نقاط .. استطاع الغرايري ان يقلصه الى (3) نقاط بعد انتصار المريخ على الهلال. . الاهم من ذلك ان المريخ قدم في الموسم الماضي بعد ان اشرف الغرايري على المريخ مستوى ممتاز .. وشكل ضغط كبير على الهلال حتى كاد الازرق ان يفقد الممتاز. . في هذا الموسم لم يكن المريخ موفقا في الدوري الممتاز وظهر الفريق بشكل ضعيف وفقد (5) نقاط من (12) نقطة لعب عليها المريخ. . لكن مع ذلك استطاع الغرايري ان يقود المريخ لمرحلة المجموعات في البطولة الافريقية وهذا امر يحسب له رغم خسارة المريخ من الاهلي الليبي بثلاثية مقابل هدف. . الغرايري من النقاط التى تحسب عليه هو خروجه من دور الثمانية في بطولة كأس السودان – ورغم الاسباب التى ذكرها الغرايري لخروج المريخ بسبب فقدان المريخ (12) لاعبا من قوامه الاساسي بسبب الانضمام للمنتخب الوطني إلّا ان هذا الامر ليس مقنعا لخروج المريخ في وجود (9) محترفين تعاقد معهم المريخ في التسجيلات الاخيرة. . مع ذلك نقول ان الغرايري اجتهد مع المريخ وعمل في ظروف صعبة واشتغل في وقت وجيز مع ثلاث مجالس ..مجلسين برئاسة الرئيس مشترك حازم ومجلس بقيادة الرئيس مشترك ايمن ابوجيبين الذي ابطلت لجنة الاستئنافات في المريخ قرار تشكيل لجنته وجاءت لجنة الانتخابات في المريخ وأعادته من جديد. . هذه الاوضاع من الصعب ان يبدع فيها المدير الفني او يقدم شيئا.. ريكاردو نفسه لن يستطيع ان يعمل في هذه الظروف ونتائجه سوف تكون اسوأ من نتائج سلفه. . اعود الى ريكاردو وأقول من باب الامانة المهنية ايضا ان قرار عودة ريكاردو من جديد للمريخ بعد (10) سنوات قرار لم يكن موفق من لجنة ايمن ابوجيبين. . نغشكم؟ . لن نقول ان ريكاردو (كيسو) فاضي .. لأن ريكاردو (تاريخه) يؤكد انه مدرب كبير .. لكن نقول ان ابوجيبين (جيبو) فاضي. . جمهور المريخ كان ينتظر (مدرب) افضل واعلى من ريكاردو. . طموحات المريخاب ارتفعت بد التلميحات والبشريات الى اعلن عنها ابوجيبين. . نحن الهلالاب احبطنا ذلك – كيف سوف يكون حال المريخاب؟ . بي طريقتكم. . هسع لو صبت مطرة في البرد دا؟ . يا زول علاقة المطر شنو بالموضوع دا؟ . بالمناسبة الرئيس (مشترك) ايمن ابوجيبين .. يبدو ان قرار التعاقد مع ريكاردو ليس قراره .. لذلك سوف نعفي ابوجيبين من حكاية الرئيس (مشترك) وسوف نقول عن ابوجيبين انه الرئيس بالباطن. . وانتوا بعد كدا افهموها براكم. . ما بقول ليكم اكتر من كدا. . نحن فترنا من الشرح. . معقولة بس. . ريكاردو بعد السنوات دي!! . انتوا يا ناس المريخ عاوزين تلعبوا في (التأهيلي)؟ . اقولكم ليكم مشكلة (المدرب) في المريخ الآن بقت اكعب من مشكلة (النجيلة). . من هسع المريخ اصبح في خطر وسوف تواجهه الصعاب والمشاق في مرحلة المجموعات. . كانت الاخبار في المريخ تتحدث عن مدرب هولندي للمريخ سبق ان اشرف على فريق أياكس أمستردام. . وكانوا يتحدثون عن حسام حسن وتؤمه ابراهيم حسن .. وكان التعاقد مع هذا الثنائي سوف يعمل نقلة كبيرة في المريخ. . حتى حسام البدري كان خيارا سوف يكون افضل من ريكاردو. . بي طريقتكم. . انا مالي. . تاني ما في زول يسألني. . لو اعاد المريخ التونسي الزلفاني كان افضل له. . اسوأ ما في ريكاردو انه بعتمد على (14) لاعب فقط … هذا الامر كان واضح في كل تجارب ريكاردو السابقة في السودان. . الآن وبسبب العمر يمكن يكتفي ريكاردو ب (11) لاعب. . ريكاردو مدرب مباراة وليس مدرب موسم. . ريكاردو مدرب اليوم دا وليس ومدرب المستقبل. . كلمناكم. . والأيام سوف تثبت ليكم ذلك. . وريكاردو نفسه لن يكمل هذا الموسم مع المريخ .. تعاقد المريخ مع البرازيلي ريكاردو لمدة موسم واحد يؤكد انهم لا يثقوا فيه. . وحتى الموسم لن يكمله ريكاردو – والشرط الجزائي بسيط. . من حق حي العرب بورتسودان والأهلي شندي والأمل عطبرة والشرطة القضارف ان يطمعوا ويعشموا في المركز الثاني وان يخططوا لذلك – فهو امر يمكن ان يتحقق فهو في المتناول. . كلمتكم. . ما تقعدوا تتغالطوا ساكت. . الليلة النهائي. . عندنا مباراة الكأس مع الاهلي الخرطوم. . تعالوا كلكم استاد الهلال. . ما في زول يقعد في البيت. . تعالوا اتمتعوا بالهلال. . نسأل الله ان ينجح الهلال في تحقيق اول الالقاب بقيادة المدرب الكنغولي فلوران. . بالتوفيق للهلال. . حضوركم اليوم يعني فوز الهلال باللقب. . كلمتكم. . هسع لو صبت مطرة!! . يا زول مالك؟ . العلاقة شنو بين المطرة وكلامك دا؟ . …………… متاريس . والله قالوا ليك الاجتماع التقليدي لمباراة كأس السودان كان فيه حلاوة اجتماع فني للمباراة. . ناس المريخ كان عندهم عشم في الشركة الراعية. . الشركة الراعية غير (البيانات) ما بنعرف ليها حاجة. . اللجنة المنظمة للمسابقات في اتحاد الكرة تستحق التحية والاحترام. . النهائي الليلة يعني الليلة. . ما عاوزين كلام كتير. . الليلة يوم الاولتراس. . الليلة يوم الهلال ان شاءالله. . حجزنا (الفرحة) من هنا لي هناك. . في كرة القدم ما في احلى من البطولات. . ……… . ترس اخير : ريكاردو ممكن يقول للمريخاب سجلوا الشغيل… والشغيل ما فاضي للحاجات دي.
