*العرس العالمي كملت قيدوماتو *فضل الحنة *وبعدها ليلة الدخلة *ولازالت قطر تدهش العالم *وعلي رأي الكبير محمد الياس *البجي بعد جمال مجنون *فان البنظم كأس العالم بعد قطر مجنون وبطقع كمان *دهشة مابعدها دهشة *والناس تنادي بزيادة فرص افريقيا بكأس العالم *وافريقيا هي اكتر القارات تمثيلا في كأس العالم *وعاين للمنتخبات والسحنات *ويكفي افريقيا انها في دور الاربعة كانت ممثلة بمنتخبين *وفي مباراة البرونزية سيمثلها المغرب الشقيق *وفي النهائي تمثلها فرنسا الشقيقة والصديقة *فرنسا السمراء *عفارم اليك افريقيا *وان كنا كافارقة قد احزننا خروج المغرب عن النهائي *الا اننا كأفارقة قد سرنا تأهل افارقة فرنسا للنهائي *المهم *مرة نلعب بالهلال *ومرة بالمدينة الرياضية بتاعتنا *واقول بتاعتنا لان قرار انشائها صدر بمطار الخرطوم عند عودة الزعيم متوجا بمانديلا تكريما للمريخ *ومرة نلعب في مصر *ومرة في جوبا *ومرات بمنتهي المرارات مانلعب خالص *لولا التعصب السالب *لكانت الجوهرة حلا للاشكال *بالذات ونحن قدمنا ليهم السبت *حينما وافق جمال علي منحهم استاد المريخ ليلعبوا عليه افريقيا *وعلي الرغم من ان المتعصبين منهم وقتها *قد قادتهم عصبيتهم لتخريب الاستاد بعمل ممنهج بعد نهاية المباراة *الا اننا كنا نتمني ان لايؤثر ذلك التعصب السالب علي التعصب الايجابي *والآن بعضنا يرفض اللعب بالجوهرة *بدواعي الغيرة والكرامة *وهو مع احتراماتي لرأيهم *الا انه تعبير صريح عن التعصب السالب *يبقي علي حد قولهم مانلعب بالجوهرة *طيب *الملاحظ ان اهم اسباب فشل السودان كدولة *هو اعتماد المواطن علي الحكومة تماما في تقدم البلد *والمواطن قاعد فاتح خشمو *ينتقد اي تصرف حكومي *وينتقد الحكومة ذاتها *وهو قاعد زي عدمو *عملو لايؤديه بامانة وتجرد *لايقوم باي دور ايجابي *فقط ينتظر الحكومة لتقوم بعمل كل شئ *ثم يبدأ في انتقاد ماقامت به الحكومة *ده نفس الحال الفي المريخ *راجيين المجالس تعمل اي شى *ونحنا دورنا كلو محصور في الشنيف *حتي نيل العضوية الساهل ده *لم تقم به الا فئة قليلة منها العضوية مدفوعة الاجر مقدما لدواعي الانتخابات *فان كنا فعلا نغير علي كرامتنا *حقو نعرف انو استادنا ده مجلس الوزراء مابقدر عليهو براهو *ناهيك عن مجلس ادارة *القصة دايرة مساهمة كل المريخاب لتشييد قلعة الكرامة بالصورة التي قال عنها كتاب الهندسة *والموضوع ده بحتاج للدعم المالي من كل الانصار *كاش يقلل النقاش *فان كنا تلتين مليون مريخابي *تتفاوت ظروفنا المادية *فان مساهمتنا جميعا *كل حسب استطاعته *تمكننا من تشييد استاد لا يحتاج لصيانة وترميم بعد كل مباراة *القصة اكبر من اي مجلس *بالذات في ظل غياب الدعم الحكومي الرسمي *والحكومة ذاتها مفروض يكون عندها علي الاقل ملعب مؤهل *للمنتخبات *وللاندية التي تمثل البلد في مثل هيك ظروف *ايها الناس *شوفوا بس ماقام به قروب الديناكوردات *حاتقتنعوا بان العون الذاتي ينتج انجازات *ولو دايرين مجلس يقوم بالكلام ده كلو *حاتطولوا وتاخدوا مدة *وبعد داك ترجعوا لكلامي ده *فالكرامة الحقيقية هي التضحية لاجل هدف يعتبر قيمة حقيقية *ايها الناس *ان تنصروا الله ينصركم *اها *نجي لي شمارات والي الخرتوم *والينا المكلف بينا *قول بعد الاطاري ماحصل تشكيل يجيب مدنية لينا *هل ده بعنى انو الزول ده تاني ينط لينا؟؟؟؟ سلك كهربا ننساك كيف والكلب قال وانتوا مابتتفقوا ليه؟؟؟خلاف خلاف الزول فيكم كان قعد يخلف رجلو…بلا يخمكم والي لقاء سلك
