*اسدل الستار عن قطر الرائعة المدهشة *تظاهرة ان لم تكن من اجمل نهائيات كأس العالم *فانها الاجمل *نحن في السودان دائما نصيبنا الدهشة *لذا استمتعنا كملوك للدهشة بالدهشة *يقولون ان كرة القدم مجنونة *ولكنها بالامس اثبتت انها عاقلة جدا *فلقد انصفت ميسي وهو يلعب آخر كأس عالم بالنسبة له *بعد المستويات المبهرة التي قدمها طيلة مشواره الكروي *كان لابد ان يتوج كل ذلك بكأس العالم *فانصفته العاقلة وكرمته *خلاصة المباراة هي *منتخب الرجل الواحد فاز علي منتخب السمبك *ولو انتهت اتنين صفر *كان نصف باريس ركب السمبك في ليلو داك *لكن العودة والبلاء الحسن شفعت لهم *كنت أخاف علي فرنسا الشقيقة من ضربات الترجيح *فالافارقة اشتهروا وعرفوا بعدم التركيز عند التنفيذ من نقطة الجزاء *قبل ان نبارك للارجنتين ميسي *تعالوا نبارك لقطر الدهشة وحسن التنظيم *وكاس قطر 2022 يحتاج لسنوات من الكتابة *وقبل ان نبارك للارجنتين *تعالوا نبارك للمغرب ذلك المستوي الرائع الذي قدمته *وقبل ان نبارك لميسي *تعالوا نبارك لدي ماريا *ذلك الفنان *لانه فعلا يستحق ان يختم حياته بكأس العالم *وقبل ان نبارك للارجنتين *تعالوا نجتر ذكرياتنا *ونردد عباراتنا البنلوكه لبانه *كنا وكنا وكنا *عايشين علي كنا *وكل كائن من حولنا بقي كائن *ولازال ميدان عقرب العتيق احد ملاعبنا العامة *ياحليلنا *والذكريات نهضت بجيلها *الا نحن بتقعدنا للتنظير والحكي *ثم *نبارك لميسي *وللارجنتين *ونعدهم *نحنا كسودانيين *ان ظل هناك سودان *سنواصل الدهشة *اصلنا خلقنا لنفتح خشومنا ونقهي *ايها الناس *انها ليست مجنونة *فلو كانت مجنونة *كان ادتنا نحنا *وحرمت الناس البديروها صاح *وباستراتيجية *وبعتبروها صناعة *هي مامجنونة *مجانين نحنا الدايرنها تدينا بدون مانديها *مجانين نحنا لما البشير قال 2022 السودان في قطر *وسكتنا ساااااي *ولما قال انا حصل مرة كضبت عليكم *ماقلنا ليهو ايوة *لو عمرك كلو ماكضبت *في دي كضبت يا عمر *وصدقناك *لاننا كلنا كضابين زيك *نحكي في قصص من الخيال *اي واحد فينا يقول لاولادو كنت بجي الاول وبدق الحلة كلها وكنت العب زول في البلد *بس ابوي عشان القراية حلف علي طلاق ما العب كورة *والجامعة ماقريتها عشان اساعد ابوي في تربية اخواني الصغار *ولما نحنا كبرنا ماعرفنا الكان بجي الطيش من كبارنا منو *فواصلنا في الكضبة لاولادنا *ايها الناس *ان تنصروا الله ينصركم *اها *نجي لي شمارات والي الخرتوم *انت يا والينا *الرسوم البتفرضها علينا *ما تجهز بيها ملعب واحد لينا سلك كهربا ننساك كيف والكلب قال عمركم ماحاتصنعوا حدث…تندهشوا بس لاي حدث والي لقاء سلك