* بسم الله الرحمن الرحيم في السلك بابكر سلك انا والدانا والكلب *اللهم انصر السودان *اكتب من……. *كلكم قهيتوا دايرين تعرفوا من وين؟ *تلقوها عند الغافل *اوريكم من وين؟ *بالله!!!! *مع التدوين الكتير ده في زول بقول من وين؟ *المدافع تدون *المسيرات تدون *واخطر التدوين هو تدوين التاريخ *نعم التاريخ يدون *يدون ولا يجمل المواقف ولايزيف الواقع *يدون تدوين شديد *دون رحمة *ولانخاف التدوين *ولكن نخاف ان يصيب الابرياء *لانخاف تدوين المدافع لان ثقتنا بالله كبيرة *ولانخاف تدوين التاريخ لان مواقفنا مشرفة *ونسأل الله ان يعلو صوت السلام والامن والامان علي صوت المدافع *والسلام يصبح قضية السلام ما البندقية *واذا استحال السلام يبقي لافكاك من *يابلد مجروح وتنزف في دمومك *يابلد مهموم ومضرم في همومك *يابلد عريان مسولب رغم خيرك *وغيرك اللابسين هدومك ***************** *بكيت علي ارواح ولادك *ضحكت من شر البلية *بنستبيح حرمات ظلالك *ونزرف الدمعات سخية *ولما زاد فوقنا الهجير *لمانا ضل البندقية *يابلد سامحت ياما *وفي الختام كنت الضحية *ايها الناس *الجاتنا تختانا *فهذا البلد لايستحق ذلك *وهذا الشعب كذلك *جدة *ليه جدة؟ *هل عجزنا عن ادارة شأننا وحل اشكالاتنا؟ *جدة والمسهل *تذكرني بقصة الكديستين والككو والجبنة *احتكمن الكدسة لدي القرد حول قسمة الجبنة *الكديسة (أ) تحتج لان قطعة الكديسة (ب) اكبر من قطعتها *قوم يا الككو اقرم قرمة كبيرة من قطعة الكديسة(ب) تجعل نصيبها اصغر من نصيب الكديسة الاولي *تحتج الكديسة (ب) مؤسسة احتجاجها علي ان قطعتها اضحت الاصغر *يقوم الككو يقرم قرمة كبييييرة قدر ساحل البحر الاحمر من قطعة الكديسة الاولي *وهكذا الي ان يأكل الككو كل الجبنة في الصواني والمواني والقواعد *رجعوا لينا جبنتنا من جدة *وخلوا الكدسة مع الككو قبلن *وبمناسبة جدة *المريخ اليومين دي فاير يغلي *جدة براها مابتحلو *المريخ داير جدة ومكة والمدينة *وقد يحتاج للطائف كمان *وصلنا مرحلة فيها لاتوجد منطقة وسطي مابين مريخي ومريخي *ودخل سوداكال من جديد قبل دخول الشتاء *وعادت سيرة كاس والنظام الاساسي *وياتو نظام؟ *الحته دي لاجدة بتحلها ولا واشنطن بتقدر عليها *الفيفا قالت واااااااااي *دخلناها في اضافرينا *فان لم تطب النفوس لؤاد هذه الاشكالية *نرجع للقانون ونحرج كاس والفيفا والامم المتحدة ذاتها عشان نقفل الباب ده ونشوف ثم ماذا بعد ذلك *الجدل البيزنطي لن يحل المشكلة *والحملة علي المجلس لن تحل المشكلة *واساءة المجالس السابقة لن تحل المشكلة *مايحل المشكلة هو سداد الغرامات والمديونيات (ودي فرض عين علينا كلنا) ليست فرض كفاية تسقط بقيام البعض بالتصدي لها *وليست كسر رقبة علي المجلس الحالي(المنتخب) *اما مسألة الشرعية فمقدور عليها بتطبيق القوانين عشان نقفل قصة اي زول يدعي الشرعية *المريخ الجاتو تختاهو *المهم * انا والكلب عشنا ستة شهور لم نصدق اننا لازلنا علي قيد الحياة *اعاين للكلب جوة عينو *تضمني نظرة الوفاء تلك *فاقتنع باني لسه حي *امسح علي رأس الكلب بيدي او قل اطلال يدي *فيوقن هو انه لازال حيا يرزق *برغم انو رزق ناكلو ماعندنا لا انا لاكلبي *بس مقتنعين باننا نرزق *شدة وتزول *شدة علمني خلالها الكلب الكثير *واكتشفت ان هذا المخلوق رهيب *اول مايرفع اضنينو *ويعاين فوق *ويجري يخش تحت السرير *طوالي بجري اخش معاهو تحت السرير *بتكون في مسيرة *بعرفها طال عمرو وهي طايرة *وقبل ان نتبادل نظرات الريبة تحت السرير *نسمع ليك رووووو *الكلب يقرب يقول لي ماقلت ليك؟ *ونقوم نتنفض ونمرق من تحت السرير *ولكن لن نمرق من البلد *بلدنا وبنحبها *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *في بعض الولايات طردونا من المدارس التي تاوينا *آل ايه *يلا يا اولاد المدارس *مدارس بالما يا والينا؟؟؟ سلك كهربا ننساك كيف والكلب قال جهزتوا المعلمين ومرتباتهم والكتب والكراريس ولا فاتحنها فتحت حبن ساكت؟؟؟؟؟ والي لقاء