طارق محمد عبد الله بكرة نفرح ونبتسم مع سيد البلد والاسم ….!! & قمنا من النوم من دغشا بدري اتلفتنا يمين شايفين هلال قبلنا شمال برضو هلال وفي كل الاتجاهات هلال الحكاية شنو ودي حقيقة ولا خيال نعمل شنو البال مشغول بالهلال و اصلو الهلال روعة وجمال، فريد من نوعو ماليهو نظير ولا مثيل منو زيو كدي وروني …؟؟؟ مافي وما اصلو رقم صعب، في لوح الزمن انكتب، وكل ما يخطر ببالنا سيد البلد والاسم طوالي نفرح ونبتسم وبكرة القريبة دي باذن الله ذلك حيكون كذلك وكلكم هسه طوالي اجمل تحية تقدير واحترام لصاحب المقام الشايل هم الوطن كرويا براهو يقاتل وحده ويناضل وحده وباذن الله سيتاهل وحده وهنا نسأل طيب الباقين وين ؟؟؟؟ سقطوا مبكرا في الامتحان وجالسين القرفصاء هنا وهناك ومع الأسف جلهم لايتمنون الخير للهلال عجبي …!! & خلونا في المهم مع هلالنا شيال التقيلة وضي القبيلة وأبن السودان البار ،والشاهد انه وفي كل المعارك الكبيرة والحاسمة كما مفصلية بكرة دي كان كبيرا كان اميرا ونتوقعه كذلك في ملحمة الغد باذن الكريم والوعد ما بيننا وفرسان الأزرق النضال والكفاح من أجل أن تكون ايامنا الجايه كلها افراح وعشان يدفروا لينا البشائر من تنزانيا الماهنا بالجملة والقطاعي علينا جميعا الإكثار من الدعاء بان يلازم هلال الشموخ والكبرياء التوفيق ويكون لهم في النصر المؤزر نصيب، اللهم نصرا مؤزرا يكون حديث الماما أفريكا جت عليها ..ياهلالاب بصوت عالي قولوا امين …!! & نثق تماما في قدرة مورينهو القارة السمراء فلوران ود ام فلوران على وضع الخطة الكااااااربة التي تجندل النجم وتلحقو أخوهو الترجي ولكن جودة تنفيذها يقع على عاتق رفاق الغربال وايضا ثقتنا فيها بلا حدود عارفين ليه ؟؟؟ لانهم باختصار ابطال اشاوس المثابرة والإقدام في طليعة مزاياهم اذا وضعوا هدفا نصب أعينهم لايهدا لهم بال حتى يصبح واقعا معاشا واذا ختوا في راسهم جغم منافس جندلوه واللليييييييلا يالنجم ….!! & من خلال معرفتنا المسبقة لطريقة أداء التوانسة لمباريات خارج الأرض فان النجم سيأتي هارشا واجفا مدافعا من قولة تيت ويؤدي المباراة بطريقة الخواف ربى عيالو مع الاعتماد على الهجمات المرتدة واي هدف مبكر سيجبرهم على فتح المنطقة الدفاعية وحينها فان عملية رجم النجم بالاقوان ستصبح أكثر سهولة ويسر والازرق يمتلك من الأسلحة الهجومية الفتاكة مايخول له إتمام عملية رجم النجم بامتياز ومانحتاجه كثيرا التركيز العالي واقتناص الفرص لان ضياعها يوتر الأعصاب ويؤدي إلى تشتيت اللياقة الذهنية مما يصعب معها إحراز الأهداف. اهداف سريعة ..اهداف سريعة & الزامبي البرت من المتوقع أن يكون مفاجأة فلوران للفريق التونسي وقطعا فإنه ليس في حساباتهم ولا يعرفون عنه شيئا. & وبطبيعة الحال فإنهم سيتحسبون لسرعة مثلث الرعب ممثلا في الغربال ،كلود ،ياسر مزمل لانهم معروفين لديهم . & اما الزامبي الخطير فهو كرت كرت كرتونة يمكن أن يستخدمه مورينهو في أي وقت من أجل قلب الطاولة ومن هول المفاجأة نتوقع أن يتجرس أفراد خط دفاع النجم بمبررالبرتو ده مادونا ليهو …. & ولا يعني تركيزنا على الزامبي في النقطتين أعلاه بأن الغربال وكلود ومزمل لا لن يكون لهم بصمة واضحة في مفصلية مساء الثلاثاء . & دائما ننتظر من ميدو آخر اهدافو وجديدو وبصفة خاصة في المباريات والمواجهات الكبيرة والحاسمة وباذن الله الغربال الذي نعرف لن يخذلنا . & اما الصاروخ البورندي كلود اسكود فقد عانده الحظ في المباريات السابقة وباذن الله يدشن أولى أهدافه في شباك النجم الساحلي . & وتحت كل الظروف يظل مزمل لا فارس النزال والرهان وفتى مويس دائما ما نجده في أوقات الحارة والزنقه اما أحرز الأهداف أو صنعها . & وهل يعني المذكور أعلاه انه لادور لخطي الوسط والدفاع …؟؟؟ طبعا لا والف لا فخط الوسط هو الرابط بين كل الخطوط. & فإذا أدى أفراده المهة بنجاح صلح حال الفريق بأكمله واذا فشلوا فيها الرماد كال حماد ونثق تماما في أي مثلث يقع عليه الاختيار في المشاركة . & اما خط الدفاع ففي وجود فوفانا السادي الخانة باقتدار وامامه غالبا الرباعي المعروف بقيادة ديوف شباكنا ماعليها خوف. & نتطلع دائما لهلال قيافة فايت العرب والافارقة مسافة . & ازرق وابيض لون الفل هلال القمة حبيب الكل . & ويظل الهلال الرقم الصحيح بالكرة السودانية وغيره الكسور والبواقي . & وياهلالنا يافخر الوطن تسلم انت من الألم والجراحات والنزيف. & وأخيرا احمد الله كثيرا انني حي ازرق .
