*سمعتو بالزول الضرب زول كف. *وجا البوليس فتح بلاغ في الزول المضروب. *قال الزول ده بي جضمو ضرب الزول ده في يدو. *يكون البوليس ده مالو ياربي؟. *قابض؟. *قابض الجريمة؟. *قابض بالقا؟. *المهم. *دي ياها السواها الحكم. *حارس سانت جورج ضرب )الغربال( بي أيدو وشديدو في رجلو . *كل الإتحاد الإفريقي دخل ولعب. *الناس الحضروها في الإذاعة إلا يسمعوا عبدالرؤوف أو النذير حتى يعرفوا الكورة عند الصومال . *أقصد الهلال. *كعادة كلو سنة. *في بداية الموسم لعب على الورق. *ومن يبدأ الموسم. *الحل في البلنت. *لا هو مالو؟. *لاهو داير شنو؟. *الحكم ده مالو؟. *الشفت محمد أبو القاسم قال لي. *الهلال يرفض تصوير المباراة. *كورة ولارقيص عروس؟. *قلت ليهو ياحمادة الستر واجب برضك. *غايتو مشروع العليقي ده لو زرعو أب سبعين أخير. *يزرع من جا مع التسيير. *كان زرع كلي كان قامت. *الحبش قالوا عندنا ملك لايظلم عنده أحد. *وعندكم حكم. *أحد أحد...أحد أحد. *الحكام ديل بتلقوهم وين يامحمد عبدالماجد. *حكام نزيهين وطيبين لكن نظرهم ضعيف. *بالذات داخل خط طمنطاشر بتاع الضيوف. *ومما سهل المهمة على الحكم هو هدف الهلال ببحر دار. *الهدف ده خلى الهلال يأتي لهذه المباراة بدون إنفعال . *الأمر الذي أدى لصبر الجماهير حتى الدقيقة خمسة وتمنين. *وبالتالي الهدوء والسكينة والطمأنينة. *كل ذلك ساعد الحكم على الخروج بالمباراة(لبر) الأمان يامان . *وحتى عند تنفيذ الضربة وتواجد لاعبين من الهلال داخل المنطقة المحرمة قبل التنفيذ. *لا يؤخذ على الحكم لأنو ماشافهم. *طبعاً ماممكن يكون شافهم وعمل (حميل). *المهم . *باي(هوك أور كروك)تأهل الهلال. *ووطنية كده تسعد البلد المجروحة المنهوبة بذلك . *ووطنية كده نوصي الهلال بسودنة الكشف. *لأنو لما الكورة إنتهت. *الحكم ماكان بفرز الهلال إلا بابو صلعة . *أبو صلعة كان ظااااهر وبميز الهلال. *أب صلعة القاعد في الكنبة. *المهم. *جمهور الحبشة الشقيق خرج مبسوط وبهتف. *قنزب قنزب. *واحايتي واحايتي . *لكن ماعرفت المعنى شنو. *المهم. *لو هذا هو المستوى والمحتوى. *وكانت العدالة حاضرة في النتيجة قياساً بالآداء. *كان الجوهرة إتقلبت صالة مناسبات للإيجار موسم كامل. *قلنا ليكم إطمأنينا على سانت جورج زعلتو. *أسي شوفو التأهل على حساب سانت جورج كلفكم كم؟. *دولار وأجانب ومعسكرات ووووو. *صرف كتير . *لو كان سانت جورج ما مطمئن ماكان صرفتوا قدر ده. *أيها الناس. *بصراحة. *إستاد الهلال سمح. *ولو كورة الهلال بقت زي استادو ده . *الأميرة السمراء ماحترفض الإقتران بالخطيب الراجيها تسعة وتسعين سنة. *أيها الناس. *إن تنصروا الله ينصركم . *أها *نجي لي شمارات والي الخرتوم. *كان شفت يا والينا . *قنعنا من أي زول وأي شيء يا أخينا. *فضلت ثقتنا بس في ثورتنا وحق الشهداء الدين علينا. سلك كهربا ننساك كيف والكلب قنزبني وتأمل وزقنني قول لي تفضل. وإلى لقاء. سلك