ما ان خرج السيد مبارك الفاضل رئيس حزب الامة من مأتم (التويتر) قبل ايام قلائل بعد ان غرد مطالباً بمحاسبة منسوبي المؤتمر الوطنى والجهات الامنية التى منحتهم تصاريح اقامة لقاءات مفتوحة طالبوا فيها باطلاق سراح قادة المؤتمر الوطني . الا وعاد اليه مرة اخرى يوم امس الاول مطالباً النائب العام بتكليف (قوة) للقبض على الاستاذ علي كرتي الامين العام للحركة الاسلامية والقيادي بالمؤتمر الوطني المحلول (عشان نريحهم) بالمرة مذكراً النائب العام بان هناك نشرة سابقة صادرة بحقه لاعتقاله او (حاجة بالشكل ده) . حقيقة ما عارف هل (عمنا) ود ناس المهدي ما زال لافى عمتو وقاعد فى بيت البكا واللا رجع و(حا) يعاود بفاتحة تانية ضد الاسلاميين والمؤتمرجية ام لا ! لكن مما لا شك فيه ان موضوع المؤتمرجية ده حالج مع (اخونا) مبارك صامولة مصدية عديل ! يا أخي مالك ومال شغل النائب العام و الشيخ علي كرتي ؟ ياخ لو فيك عمار امشى لملم ناسك واطلعوا مظاهرة ! واللا اعقدوا ندوة باى عنوان إنشاء الله تحت عنوان(ظاهرة عودة الكيزان وخروج الفئران) دراسة اوجه الشبة ! بدل (السكليب) البتسوي فيهو ده ياخ ! ياخ انت رجل (يقال) انك سياسي وليك تاريخك الاسود والابيض والملون فما تجري وراء الفارغة اقبضوا داك . امسكوا داك يا راجل دى ما سياسة . عندك حاجة ؟ (هداااك) القضاء امشي افتح بلاغاتك ضد الكيزان (اولاد اللذينا ديل) بدل ترهق صحتك بمثل هذا الحقد الاسود . وعمرك ياخ ما اظن يسمح بمثل هذه (المتاوقة) والتلصص والنسنسة . وبعدين ياخ تعال هنا ..... مش بناتنا عندهن نظرية كده بتقول(خطيب صديقتك خطيبك) ؟ ياخ المؤتمر الوطني الماكل معاك جمبة خاااالس ده ما كنت انت غرقان معاهو لاضنيك ما انت ذاتك تستوجب محاسبتك على فترتك كوزير للاستثمار و(اظنك) كنت مساعداً للبشير او حاجة كده فى القصر مش متذكرا بالضبط . لكن المؤكد انك كنت احد (الاكيلة) مع الانقاذ واللا انا غلطان ياااا (ابو الفاضل) ؟ بعدين يا عم مبارك ..... حكاية قصف الامريكان لمصنع (الشفاء) للادوية شايفها لافة الايام دى وتصريحك المبارك للخطوة واظنه كان عبر اذاعة (البي بي سي) ! اهااا فى داعي لجنس الكلام ده يا عمنا ؟ لكن قطعاً يا جماعة السيد مبارك معذور ..... فكل مؤشرات المشهد السياسي تقول ان لاحظاً سيكون له لا ضمن مقاعد الصف الاول و لا الثاني ولا حتى الاخير (جنب سماعة الساوند سيستم) . وان الفريق البرهان(حفظه الله وابقاهو) ماض فى تنفيذ ما صرح به والفى راسو فى راسو (قال ليك) حكومة كفاءات غير حزبية ومبارك شنو يا جماعة ؟ ايواااا حزبي حتى النخاع فتح الله عليك يا عب باسط ! عمنا مبارك الفاضل .... النائب العام وعارف شغلو ووزير الداخلية وعارف شغلو ووزير العدل وشايف شغلو بس انت تشوف شغلك كيف ؟ قبل ما انسى: – اتركوا الكيزان ما تركوكم يا هؤلاء
