*يصعدان لدوري المجموعات. *هو طبعاً في حقيقتو دور الستة عشر. *وبس. *الدنيا قامت. *أسوأ عرض قدمه المريخ كان بليبيا. *نعم إنتصر المريخ على جمهور أهوج ومتهور وحكم غريب شديد ومشاكله الداخلية. *لكنه نصر من عند الله. *تلاتة أهداف يدخلن مرمانا من برة الخط. *وحارس مرمانا ينقذنا من هدف من ضربة جزاء. *أها ده حق الله ذاتو. *فنياً لا أفتي لأن الغرايري أعلم مني في تخصصه. *وقد تكون إمكانيات نجومنا هي التي أجبرت الغرايري على اللعب بتلك الطريقة التي قربت تودي المريخ الخور وتودينا نحنا المقابر. *وقد تكون ظروف اللاعبين هي التي فرضت تلك الطريقة. *ولكن المحصلة في فترة الغرايري تصب في صالحه. *وقصة نغير المدرب زي مابنغير التروس أثناء قيادة أي بوكس ماحبابها . *ولكنه نصر يحمد الله عليه. *إخوتنا في الهلال. *على نفس النهج والمنوال. *صعدوا نعمة من الله ده. *ماقدموا مايشفع لهم ويحلل صعودهم للمجموعات. *من سانت جورج وأنت جاي. *ولكنه نصر من عند الله. *الغريبة الأتنين نفس المستوى والمحتوى. *أي واحد فيهم لعب أربعة مباريات. *فاز في إتنين وتعادل في واحدة وخسر واحدة. *حتى صافي أهداف أي واحد فيهما منذ البداية وحتى دخول المجموعات هو هدف موجب. *في ذلك المشوار أي واحد فيهما عندو ضربة جزاء(حلال حرام المهم اتحسبت وجات قون). *واحد فيهم أفضل من التاني مافي. *نفس الخرمجة والخندقة. *في كورة الهلال. *مريخابي قال إن شاء الله الشباب يطير عشان نسجل لاعبهم بتاع النص ده. *قالوا ليهو ياتو؟. *أشر على الشاشة . *ده...باص غلط ماطلع من رجلو ومالي النص براهو. *قالوا ليهو ده حارس الشباب يازول. *تخيلوا حارسهم قاعد في نص الميدان وما إتأهلوا. *وده كلو كوم. *إحتفالات التأهل إختلفت. *وده الإختلاف الوحيد. *ناس المريخ زي الناس العرسهم في صالة. *بعد الحفلة كلو زول شتت علي جهة . *وناس الهلال زي الناس العرسهم في بيتهم . *بعد الحفلة ربوها دكاكيني. *الله يرد غربة الاستاد. *أها *ماقلت ليكم صعود نعمة من الله بس؟. *المريخ والهلال بعد ده بأي آلاء ربكما تكذبان!!!! *المهم *تهنئة للاعبي الفريقين. *ففي ظل غياب إدارة للرياضة رشيدة وشديدة ولضيضة. *التأهل إعجاز. *أخواننا في الجنوب إنفصلوا . *في كورة السلة وصلوا نهائيات كأس العالم. *في القدم صغارهم وصلوا نهائيات أمم إفريقيا *إتفكفكوا مننا بي جاي. *تألقوا بي جاي. *إختلاف الإدارة واضح. *كنا محطمنهم. *إن شاء الله دارفور تنفصل. *وجنوب كردفان تنفصل. *والنيل الأزرق تتفصل. *وحلفا تنفصل. *والشرق ينفصل. *وكوستي تنفصل. *والجزيرة تنفصل. *عطبرة وشندي تنفصل. *الشمالية تنفصل . *أمدرمان تنفصل. *الخرطوم وبحري أصلن منفصلات بالنيل الأزرق. *حلايب وشلاتين والفشقة فاصلات. *عشان أي دولة من الدول الإنفصلت مننا تجيب ليها إنجاز رياضي دولي. *وبعد داك نتلمة تاني . *وعلنا ما أتلمينا . *أيها الناس. *إن تنصروا الله ينصركم. *أها. *نجي لي شمارات والي الخرتوم. *والينا ماتفصلها لينا. سلك كهربا ننساك كيف والكلب قال أفصل يامعلم خلينا نعيش . وإلى لقاء. سلك
