مدير الجامعة الولاية المعروفة عامل مشاكل شديدة مع النقابة ولجنة الأمن والوالى ذاتو والمعتمد ورئيس الحركة الاسلامية بالولاية ما مخلي زول ما عامل معاه مشكلة،اتفتحت فيه مجموعة بلاغات نتيجة لقرارات لم تكن موفقة ،مؤخرا استدعاه المركز وبلغوه بانو خلاص ايامو قربت ،اول مارجع الواسطات اشتغلت ووافق على ان يعود المفصولون من العمل لعملهم ولكن الحكاية انعكست ..الافراد المقربون من المدير بدوأ فى الانسحاب التكيتكى بعد دراسة الوضع مستقبلا،وحتما ما ح يكون فى صالح المدير ومن حوله. شكلة فى كرسي معتمد رئاسة بولاية وسطية دور شكلة فى كرسى مع مستشار،الكرسى مش مقعد حكومى لكن كرسى كل واحد عايز يختوا فى مكتبو،شفتو كيف؟ الاستيلاء على الكرسي للجلوس انفتحت فيه كلمات ما جميلة وصلت الى سمع العاملين بالولاية فى المكاتب الحكومية والذين تأسفوا لذلك ففى كرسي يقعدوا فيهو تتشاكلوا طيب لو شالوكم من كرسي الحكومة تمشوا الغابة! والله غابة ذاتو بقت مافى،المشكلة هى حديث الساعة فى الولاية والوالى سمع الموضوع ولم يفعل شيئا. حدث فى كوستى فى كوستى حملات رش البعوض والذباب مستمرة بعد امطار غزيرة عمت المدينة فصارت مستنقعا للبرك واكوام نفايات،المبيد اتضح ان مدة صلاحيته منتهيه منذ شهر مارس الماضى ،بدل ما يقرض البعوض صار مشبعا لها وعطرا ما بيكتل ليهو شرنقة خليك من بعوضة..بخت البعوض غايتو! عمالة ود الحليو هاتف مواطنون من ود الحليو بولاية كسلا يستحثون واليها بالتدخل فى مسألة الاتجار بالبشر وخوفهم من تعرض البعض لعمليات بيع اعضاء بشرية ما جعل العمالة الوافدة تهرب بالعشرات عبر الحدود مهددة بذلك موسم الحصاد،الاهالى يعرفون من يفعل ذلك بالاسم بس زول من الولاية داير يتقصى فى الموضوع دا مافى.