لنفترض أن أحد (الأجانب) وهو يزور بلادنا سألني واحداً من الأسئلة التالية.. أقول ليهو شنو؟ * لماذا يشتغل المسؤولون بالأعمال الخاصة بينما الإسلام والدستور (ذاااتو) يمنع إشتغال المسؤولين بالأعمال الخاصة.. أقول ليهو شنو؟ * لماذا لا يبت في قضايا النهب المصلح بينما يبت سريعاً في قضايا السرقات المنزلية وأنتم دولة إسلامية.. أقول ليهو شنو؟ * كل الدول في العالم نجد أن الدولة توفر المواصلات الداخلية للمواطنين.. بصات.. ترام.. مترو.. لماذا لا تقوم الدولة بتوفير المواصلات للمواطنين.. أقول ليهو شنو؟ * لماذا تقتصرون الحدود في جلد السكارى ولا تقتصون من سارقي قُوت الشعب.. أقول ليهو شنو؟ * لماذا تقومون بتشييد مسجد داخل مستشفى بآلاف ملايين الجنيهات والمرضى بالمستشفى (ذاااتو) يموتون لأنهم لا يجدون ثمن الدواء أقول ليهو شنو؟ * في كل دول العالم يمكنك أن تحتفل بزواجك حتى صباح اليوم التالي.. لماذا تنتهي حفلات زواجكم عند الحادية عشرة مساءً؟ أقول ليهو شنو؟ * ليه تستغرق صيانة كوبري (كوبر) سنتين ونص؟ الكوبري ذااات نفسو بيتعمل في مدة أقل من كده.. أقول ليهو شنو؟ * المسؤول عندكم بيستقيل لمن يجلط ليهو كم جلطة؟.. أقول ليهو شنو؟ * أي فريق كورة سوداني يتغلب يرميها في حكم المباراة.. هو أصلو عندكم مافي فريق بيتغلب عدييييل كده؟ أقول ليهو شنو؟ * في حالات جرئم الإغتصاب المثبتة على الأطفال تلقى قاضي يحكم (في قضايا متماثلة تماماً) بالجلد وواحد تاني بالسجن وواحد تالت بالإعدام.. هو شنو كل قاضي عندكم عندو قانون براهو؟ أقول ليهو شنو؟ * مع إنو قاعدين تسموا شارع (الخرطوم - مدني) شارع الموت وهو شارع غير مطابق لأبسط مواصفات السلامة وقاعد يكتل فيكم بالعشرات ليه الحكومة ما عاوزة تصلحو؟ * مع إنو عندكم حرس حدود وجمارك ومكافحة تهريب وهيئة مواصفات ومقاييس لكن كل البضاعة الفي أسواقكم مضروبة وتقليد! أقول ليهو شنو؟ * الزول العمل ثورة التعليم العالي وفتح ليهو تلتمية جامعة ده ما كان عارف إنو لازم يوفر فرص عمل للخريجين وللاّ كان عارف.. أقول ليهو شنو؟ * هل الشريعة مُطبّقة في بلدكم دي وللاّ ما مُطبّقة.. أقول ليهو شنو؟ كسرة: هسع لو سألني عن الكسرة التحت دي... أقول ليهو شنو؟ كسرة ثابتة: أخبار ملف خط هيثرو العند النائب العام شنو(ووو وووو ووو)؟
