(الله أكبر) (لا الله إلا الله) بسم الله الرحمن الرحيم الحمد لله رب العالمين والصلاة والسلام على خير خلق الله أجمعين سيدنا محمد وعلى آله وصحبه أجمعين مواطنونا الأعزاء.. أبناء وبنات الشعب السوداني التحية ليكم في هذا اليوم وفي هذه الليلة المباركة.. التحية لكل أبناء الشعب السوداني ولكل بنات الشعب السوداني تحية ليكم خاصة من أبنائكم في القوات المسلحة وكل القوات المساندة من الشرطة والأمن والدفاع الشعبي والمجاهدين والتحية برسلوها ليكم من هناك من «أبو كرشولا».. ونقول ليكم بالصوت العالي ديل نحن يانا نحنا وحنظل نحنا أبناء الشعب السوداني وبنمثل الشعب السوداني والبنعبِّر عن تطلعات الجيش السوداني ما خذلناكم في يوم من الأيام قابضين على الزناد من عام (1955) ما انهزمنا وما انكسرنا بقولوا ليكم عاينوا حوليكم كل الجيوش انهارت تحت ضربات التمرد إلاّ الجيش السوداني.. وقدّموه عهد انو حايحرِّروا كل شبر من أرض الوطن من الخونة الناس الباعوا الوطن باعوه بدراهم، باعوه إلى أعداء السودان. الخونة الإرهابيين البسمُّوا أنفسهم بالجبهة الثورية كلهم عُملاء، كلهم خونة، كلهم بايعين الوطن، كلهم إرهابيون، يكفي أنهم لما دخلوا «أبو كرشولا» ضبّحوا الناس العزل، شرّدوا النساء، شرّدوا الأطفال، ضبّحوا الناس العجائز، دي رجالة دي يا جماعة؟.. ديل خونة وعملاء وإرهابيين، وأنا أعلن اليوم نحنا تاني ما حنتفاوض مع عميل، ما حنتفاوض مع خائن، ما حنتحاور مع مرتزقة، ما حنتحاور مع إرهابيين سموا نفسهم زوراً بالجبهة الثورية.. ديل كلهم عُملاء مرتزقة إرهابيين، مافي تفاوض معاهم، ونقول بالصوت العالي مافي حاجة اسمها قطاع الشمال ولا العدل والمساواة، مافي حاجة اسمها تحرير السودان، العدل والمساواة للقوات المسلحة هي جبهة تحرير السودان القوة الثورية هي القوات المسلحة. الرسالة الثانية لإخوانا في جنوب السودان وبنقول ليهم نحن عندنا اتفاقيات والتزمنا بيها وأي عدم التزام في أيِّ جزء من هذه الاتفاقيات كلها ملغية وبنرسل ليهم إنذار إذا أي دعم جاء من حكومة جنوب السودان للعُملاء والخونة والمرتزقة في دارفور واللاّ جنوب كردفان واللاّ النيل الأزرق حا نقفل الأنبوب ودي رسالة نهائية، يوقفوا دعمهم.. ولو دعمهم ما وقف اشربوا بترولهم. ونقول لإخوانا في القوات المسلحة جزاكم الله خيراً نصركم الله على أعدائكم وتقبّل شهداءكم وربنا يشفي جرحاكم وربنا يفك أسراكم وينصركم على الأعداء. والرسالة الأخيرة لأهلنا في جنوب كردفان بنقول ليهم الناس الشايلين السلاح والخونة ديل ما بمثلوكم وأنا بقولها الآن إنو أهلنا من أبناء النوبة بريئون من الجبهة الثورية.. النوبة أول ناس انظلموا والناس الماتوا هم أبناء النوبة ناس وطنيين ومقاتلين في القوات المسلحة والدفاع الشعبي.. التحية للشعب السوداني والقوات المسلحة ونساء السودان وهم وقفوا معانا وساندوا القوات المسلحة. الله أكبر الله أكبر الله أكبر والسلام عليكم ورحمة الله