حاجتين اتنين بخاف انضم فيهن.... الدين والسياسة... الدين اي دين حتى لو كانت هندوسية.... بخاف اول ما فتح خشمي يجيني زول ويحاكمني ويقول لي انت زنديق، حكمنا عليك تشتغل ابريق، وان دخلت بغال الدنيا دي كلها فيك يا الابريق اصحك تقول بغم...وانت علماني.. وانت فرتكاني... قلت حتى لو كان الدين هندوسي( شوفتو الخوف دا؟)....اما السياسة....دي ما تقولو لي في امريكا في بريطانيا... في زمبامبوي..في ساحل العاج... كلها واحد.. ممكن تنضم فيها يلبدو ليك ويوروك المكشن بلا بصل(مسعولين من الخير؟البصل خبرو شنو مع رمضان الجايي دا؟.... غايتو نحن مأجورين باذن الله..السنة كلها شايلين هم...يجي رمضان نشيل هم البصل.. يفوت رمضان نشيل هم العيد وهديمات الوليدات.. يفوت العيد يجينا العيد الكبير نشيل هم الخروف.. يفوت العيد الكببير نشيل هم ولادة المرا والسماية... المرا تتحلا بالسلامة والسماية تتعدى... شوية كدي نشيل هم طهارة الوليد..الوليد ما يبرا عديل... ما ناخد نفسّنا نلقى رمضان قدامنا ) قلت النضم في السياسية مكجنو في القبل الاربعة....لكن المحيريني الرويسا ديل رويسا العالم التالت.... الواحد يجي ويقيف قدام الناس ويحلف بالتكسرو انو يصون الدستور.... بعد شهرين بس، تلقاهو هو اول زول يقعد يصوط في الدستور..... ولو ما صاطو و خايف، يقعد يتمحن ويجوهو الاخوان ويطلع فيهم زول بتاع قانون تفتيحة وابن فتلة ويقول لو( يا ريس انت حسي ممتحن كدي مالك؟..... مو الدستور دا؟... والحلفت انك تصونو؟... نلغيهو ونسوي دستور جديد..وما بتكون حلفت تصونو.انت ما حلفت تصون القديم..مو ايا؟....خلاص...اصلك الجديد ما تجيب خبرو... نسويهو عشان نواسي بيهو الناس الشليقين الفي السهلة ديل...اما انت عندك حصانة..ونحن عندنا حصانة.... ومافي جنس ادمي يقول لنا تلت التلاتة كم؟... افو..افو... يا ريس قوم غسل وشيك دا واشرب لك كباية شاي.. وخت في بطنك بتيخة صيفي.. باكر دي من الدغش مع شراب الشاي اجيب لك الدستور جااااااهز..وبعد يومين نخلي ليك الشعب دا جت يدستر..). لما مات السادات... شفت واتظكر طشاش طشاش...... جا حسني مبارك يخطب اول خطاب ليهو بعد ما حلف يبقى رئيس..... ينضم كووووويس.. بعد شوية يتقدا بكا... بكا...وبكا... هو يبكي وناس البرلمان يصفقو.... كانت اول مرة اشوف لي زول يبكي والناس يصفقو ليهو..غايتو الدنيا دي فيها جنس محن...لكن والله ما بلومو.... ارجل راجل يصبح يوم ويلقى نفسو بقى رئيس بي يبكي...ان ما بكى قدام الناس بيمشي يبكي عند اهلو....انا غايتو ان عندي ايد في نضم السايسة دا..الحليفة بغيرها.....ان تكون( علي الطلاق بالتلاتة وحرم..اصون الدستور..وان ما صنتو انشاء الله ربنا يقلبني قذافي و يسلط علي الاممالمتحدة..ومجلس الامن.. وحلف الناتو ...وجامعة الدول العربية..ودول الخليج.... وقناة الجزيرة... ويسلط علي الشحاد الفي موقف المواصلات داك والبيضرب في الكتف ولما تقبل عليهو يصر ليك ويقول ليك:- اديني كرامة)! قفل الباب:- قد اطال الوقوف حين دعاني ليلمّ الاشواق عن اجفاني فادن مني وخذ اليك حناني ثم اغمض عينيك حتى تراني