ما بنقبل الدية قلناها ليكم يوم رصاصكم الغادر قتل الشهيد قاصد والشعب ليك راصد شهداءنا نحنا كُتار يا ناس تجارة الدين في شرِقنا عِند البور في البور وفي دارفور سبتمبر وديسمبر ويناير الممهور كجبارنا يوم السدّ ومجدي في الدولار رمضان وضباطو أصلو إحِنا ما نسينا لى بشير وللتاية لى سليم ولى طارق في الأرض في الديرة وجامعتنا الجزيرة وفي نيلنا دا الأزرق وغربنا في كردفان في العيلفون في كمان ناس المعسكر طلبة تجنيدهم إجبارية يا شلة يا كجرية وأطفالنا في المناصِير الماتوا غرقانين في النيل وبالمركب والماتوا بالرصاص والماتوا بالتعذيب خازوق وكان مسمار ما قلنا كُتار البينا إحنا قصاص يا كتايب الرصاص وريسكم الرقاص ربرب ماشين وين لازم نسدّ الدين للشهداء للأحرار وجبالنا في النوية طيارة أنتينوف لمن مشو في كهوف إنتو الحرقتو الجوف قتّلتوا أبواتنا أخوانا والأولاد أطفالنا والنسوان ثكلتوا أُماتنا يا طُغمة ياخازوق يا المبتعرفوا حقوق يا ناس تجارة الدين وحكمتوا بالباطل لا ساسة لا شيتين دي خساسة وخباثة فاتت كمان الحد وقت الحساب قرب جايين لوقت الجرد يا طُغمة يا أنجاس يا فِتنة يا أشراس أُف أُف عليكم أُف يا مِلة الأوساخ يا فسده يا أدناس لكن خلاص الشعب بى هديروا جاييكم دا هدير تلاتة عقود غضبة شعب صابر فات في الصبر أيوب بناتنا ديلا صمود وأولادنا هم أُسود قالوها في الشارع في الشارع الواضح في الشارع الواحد سلمية سلمية ثورية ثورية وسلاحنا مهنية بيهو الوطن ينهض سماعة والكراس عمال وحِرفية صنعة وزراعية فنان كمنجه وعود مسرح ثقافية نبنيهو سودانا ونكنس الأنجاس الشعب قالا خلاص الليلة تسقط بس كلمة وعلم ودرس الليلة تسقط بس. حنان ساتي 16فبراير2019 عنوان البريد الإلكتروني هذا محمي من روبوتات السبام. يجب عليك تفعيل الجافاسكربت لرؤيته. ///////////////
