بسم الله الرحمن الرحيم في السلك • الله يجازيكم • خربتوا طبع مازيمبي زي ماقال صاحب الرقم 0912126247 • عودتوهوا علي الخمسات دي • وطاح في الناس • خمسات ساااااااااااااي • قلنا اول امس كاتخ وكاتخوين • لكن الظاهر مازيمبي حايعملها ساكت وساكتوين • المهم • كل الاعلام الازرق استعجل في قول الحقيقه • كلهم قالوا الصفاقسي احسن استقبال وضيافة ووداع الهلال • لكن ياربي النفطي دحين ماقال لي ناس الصفاقسي ديل في السودان من المطار حاتمشوا الفندق في السوق العربي عن طريق الحصاحيصا ؟ • السنه الفاتت الجماعه كانوا بودوا الفندق في السوق العربي من المطار عن طريق الكلاكله • السنه دي طبعا في تطور • عشان كده من المطار بي الحصاحيصا للفندق • لكن برضو ملحوقه • يعني النفطي ممكن يمسكل ليهم • يرجعوا ليهو • يقول ليهم من المطار كل سته من الصفاقسي يركبوا امجاد • يقولوا لبتاع الامجاد الفندق • ويخلوا البص بتاع الجماعه • والبص ده قصصوا كتيره • مره ( بطل ) في شارع النيل • ناس اسامه التعاون (ملحو ) مواتر • ايام الحافلات مضربه لعدم السداد • ومره في المطار بعثة الضيوف وصلت وركبوا البص • قعدوا تلاته ساعات داخل البص • جمارك السودان كلها تفتش في سواق البص • بعد تلاته ساعات جا براهو • كنت وين يازول ؟ • قال كنت نايم , شالتني نومه • فعلا حسن استقبال • مازيمبي ضرب الجماعه خمسه • والترجي خمسه • والترجي ضرب الجماعه • خمسه خمسه سته خمستين وخمسين • تلفون في ام درمان بس • لو دايرين نعمل الحكايه دي معادله • نخت خمسه بره القوس , علي الترجي فيها الواحد • وعلي الهلال فيها خمسه وسته وخمسه وخمسين • موش كانت خمسه وخمسه وسته وخمستين وخمسين • لما نقسمها علي الخمسه بتروح خمسه من (الخمستين اعلاه ) • ويفضل خمسه وسته وخمسه وخمسين • وهو المطلوب اثباته • موش قلت ليكم انا ضعيف في الرياضيات بالفرنساوي • المهم • عشان الوطن والوطنيه • يجب ان يقوم الجماعه بمعاملة الصفاقسي بالمثل • نحن اهل الكرم • ما تحرجونا بعمايلكم بتاعت السوق العربي بالكلاكله دي • لكن استعجلتوا برضو في تحديد زمن اللعب • كان تعملوها اتنين الضهر • زي بتاعت الترجي الزمااااان ديك • مامتذكرين شنو ؟ • ياخ الكوره البين الشوطين الناس صلوا الضهر • لما كنتوا تجيبوا قون • ناس الترجي يدرنوهوا ويجروا الضل • تجيبوا التاني • ناس الترجي يدرنوهوا ويجروا الضل • تجيبوا التالت • ناس الترجي يدرنوهوا ويجروا الضل • طرتوا • ناس الترجي قاعدين في الضل • تقول لي نسينا • دي كوره بتتنسي ! • المهم • الظروف تخدم الجماعه لتقديم اعذار شهر نوفمبر • يقولوا اتغلبنا مخصوص من المريخ عشان لو شلنا الممتاز بنمشي الابطال • وكان مشينا الابطال ام بعلو الخمساوي ( مازيمبي ) قاعد هناك • وطرنا من الكونفدراليه بمزاجنا • لانها ما ماليه عيننا • ولو شلناها بتودينا السوبر • وام بعلو الخمساوي قاعد هناك • وكاس السودان خسرناهو عشان مابودي حته • ما بودي حته ! • خلاص اركبوا بصات الوالي خليها توصلكم حته • واتعذري • بالمناسبه • مازيمبي شعارو تمساح كبيييييييييييييييير • تمساح خماسي مبرقع • اول مره اعرف التمساح الخماسي اخطر من التمساح العشاري • يعني الزول البلعو مازيمبي خمسه يبقي شليل • شليل وين راح • بلعو التمساح • ياناس • للهلال خطاوي يجب عليه ان يمشيها حتي يلحق بالزعيم • الخطوه الاولي تخطي الصفاقسي عشان يصل نهائي زي ناس العجب 2007 • الخطوه التانيه يشيل الكاس ( ولو انها مستبعده بعد شفنا قبيلة يوسف شمال ويمين دي ) حتي يلحق بالزعيم في لوح الشرف الافريقي • والطريق وعر • والضريسا ماليه الشارع • ومشي الحفي بورم الرجلين • وما بوصل • المهم • الترجي دخل قائمة الفرق البتاخد خمسه في الادوار النهائيه • واحد بقرا في الجريده • فاكيها في روحو شويه كده • بقرأ وبستغرب • يرفع وينزل في حواجبينو • وقفل الجريده • قال لي • وهل يظلم التحكيم الافريقي التوانسه مرتين ؟ • قلت ليهو حاشا وكلا • اكتب قبل لقاء الزعيم • داير اتفرغ للكوره • عشان كده رسلت للجريده بدري بدري سلك كهربا ننسي وين يافرده ! والي لقاء سلك babikir maki [[email protected]]
