إن صاروخا على (الأرجح ) مجهول المصدر أصاب عربة ال(سوناتا) عند الساعة الثامنة من مساء امس على بعد 15 كلم جنوبي مدينة بور تسودان. هه صاروخ! لا بل هما صاروخان قادمان من اتجاه البحر هما من دمرا السوناتا. آآآآآآآآآآ 2!! لا لا بل هي طائرة بدون طيار هي من ضربت السوناتا. سجمنا .. وبدون طيار كمان!!! متل مروحة التربيزة بقينا نتلفت مع تضارب وتخبط روايات المسئولين عن من ضرب سوناتا بورت سودان لذا ما ان قالوا أي المسئولين ان طائرتي اباتشي هما من اصابتا السوناتا الا وجدتني وحالي يحاكي حال من قال وجدتها وجدتها التفت نحوهم قائلة: قلتو طائرتي اباتشي .. بعد ده يا اخوانا ما عندناش حل غير نسأل سونيا. حتى اذا ما قاطعني احدهم بدهشة قائلا: وسونيا دي كمان تطلع منو؟ الا واجبته: سونيا دي عميلة في الموساد وياما خاضت معارك بطائرات الهيلكوبتر بت عم الاباتشي حتى اصبحت في هذه المعارك متخصصة. حتى اذا ما اضاف بُخلعة وإنزعاج: وانتي ما صلتك بسونيا؟!!!! لم الق له بالا بل واصلت كلامي قائلة: لكن ما دام قالوا طائرتي هيلكوبتر معناها الطيارة التانية بيكون فيها آدهم لانو احتمال كبير يكونوا إستأنف هو وسونيا معركتهم تلك حول ابنهم وصواريخ معركتهم دي جات للسودان في صمة خشمه، ما هي اصلو سونيا اتزوجت آدهم صبري في تلك الفترة اللي كان فيها ادهم للذاكرة فاقد و.. وشنو!! انتي ما دام جبتي سيرة المصري ادهم صبري بطل سلسلة روايات رجل المستحيل المصرية يبقى قصدك بسونيا غريمته في السلسلة سونيا جراهام عميلة الموساد الاسرائيلية .. بالله خليك جادة الموقف الوطني لا يحتمل السخرية. سخرية!! هكذا وجدتني ارد عليه بمرارة. بالله هو في سخرية اكتر من انه وطني ينضرب بالاباتشي .. الاباتشي!! انت لو عرفت انه طائرة الاباتشي دي في سرعتها بالنسبة للطائرات المقاتلة زي سرعة الركشة بالنسبة لعربية بات مان ح تدرك مقدار الاهانة اللي اتعرض ليها السودان وطني! حسع عليك امان الله الركشة دي جري ساي ما بتحصلها. خليك من الركشة يا اخي طائرة الاباتشي دي لو فكوها بحجر ما بتقع! انتي ما سمعتي انه مبررهم انهم مع استهدافهم وتصديهم لها لم يلجأوا لتوسيع دائرة الإشتباك لتزامن وقوع الحادث مع وجود طائرة للخطوط الجوية السودانية في المطار لذا كانت تقديرات المواقع الدفاعية عدم توسيع دائرة الإشتباكات. الا وبوجع يقطر دما اجبته: نعلهم قاصدين طائرة سودانير ديك البتنزلق في موية المطرة، والا التانية اللي في فصل الخريف غرقت في مدرج مطار الخرطوم، والا ال3 اللي نقلت الفضائيات مشهد احتراقها بركابها ثانية بثانية ذا المشهد الذي استغرق عدة ساعات!! على الهواء مباشرة لانهم ابتداءً إستخسروا انهم يشتروا المادة الرغوية اللي بتستعمل في اطفاء الحرائق .. يا اخي بالله سيبنا نحنا شدة ما الكيل خلاص فاض بينا شوية كدي ولولا عقال الاسلام وحياضه وذاك الاستشراف الذي جعلنا نلتزم وطنية بالحد الفاصل ما بين الحكومة الزائلة والدولة الباقية شوية كدي ولدعونا شرذمة عصابة فجر الاوديسا بعجلة قائلين: ان عليكم بهم. والا اقول ليك حاجة سودانير دي وزي ما احنا عارفين وهم عارفين ما دام اصلا هي مستشهدة مستشهدة هم ما كانوا يستهدفوهن الاتنين سودانير والاباتشي واكان اصابوهن ووقعن الاتنين حق لهم منتفخي الاوداج ان يصرحوا لنا قائلين: وقد قمنا باسقاط طائرة للعدو الاسرائيلي حاولت تدنيس اجواءنا الوطنية وقد اصابت نيراننا في نفس الوقت طائرة لسودانير نحتسب ركابها شهداء لقاء كرامة وعزة وآنفة الوطن.. انتو ما شفتو كيفن فلاديمير بوتين الرئيس الروسي فضل التضحية ببحارة الغواصة الروسية كورسك ولا إنو يخلي يد غريبة تتختا عليها ولا أي قدم غربية تطأها. بعدين مش ياها الاباتشي دي ياها بت عم الهليكوبتر اللي تمشيطا بتسك قوات المشاة في حرب الشوارع .. وبالمناسبة انني حال انتباهي لحقيقة انو الاباتشي عشان تسك الناس في الشوارع لازم تنزل لمستوى قريب من الارض الا وجدتني ادفع على ملا لمن يهمهم الامر بالاقتراح التالي: يا اخوانا للتصدي لاي اعتداء محتمل من جيش العدو الاسرائيلي علينا بطائرات الاباتشي ما تنسوا كمان تشتروا نبل اللي مفردها.. نبلة. وبعدين كلو كوم وتصريح السيد وزير الداخلية كوم واللي حينما سمعته يقول انو طائرات العدو الاسرائيلي قد قامت بقصف السوناتا السودانية من الخلف. الا وجدتني حنقا ادمدم قائلة: قصفوها من الخلف! يعني تفرق شنو اكان قصفوها من الخلف والا من فوق والا من بين عينيها؟!! قول ان شاء الله اكان بس كدي جضموها والا كفتوها، المهم الجضموها والا كفتوها دول مش اعداء اسرائيليين. آه دقيقة دقيقة بمناسبة تناولنا لتعليق وزير داخليتنا انتو يا جماعة وعلى ضوء حقيقة انه قد تم سحب جملة (صالح لكل الاقطار عدا اسرائيل) من الجواز السوداني ما يمكن بعد سحب ذا الجملة الاسرائيلين الاعداء حسبوا هذه اللفتة اشارة من اشارات بدء عملية التطبيع معاهم آهه وعلى ضوء ذلك الاسرائيلين ديل وكتين اختراقهم لاجواءنا حسبوا انفسهم داخلين بطريقة مشروعة. جائز.. مع مشروع الشرق الاوسط الكبير ده كله.. جائز. و .. و .. وبدل ما نموت بمغصة إستهتار وإستخفاف المسئولين بعقولنا ومن ثم إستحمارنا و.. قلتو طائرتي اباتشي!! بعد ده يا اخوانا ما عندناش حل غير نسأل سونيا. randa suliman [[email protected]]
