داك الطريق باين يا ليس في الإمكان أسوأ من الكاين في الكاين الرَّبَّاط إنفجري كالبركان يا بلدي يا كلك يا شِعبة التَّكَلان .. أم در و يا الخرطوم .. و البعمل الإحباط ؛ الكاين النطاط من كوم ينط لى كوم ؛ و الكاين المطاط ما عندو راياً يدوم ؛ و الكاين الغطاط شلاّهو كُتر النوم. .. يا أمنا الثوره يا جايه ميعادك الليله أو في الغد صحِّي الجميع و الخيل دقي النحاس أجراس خلي الرهيف ينقد .. إن كان سلام .. لابد في الأول التسليم : بعدين محاكم الشعب حكمة عدالة الرب الروح قصاد الروح العين قصاد العين و السن قصاد السن و جروح قصاصها جروح و حساب جنيه بجنيه مليم ورا مليم كل الحساب معلوم. ما بننسى أرباحها و بى حق رِباها نشيد ليها الأبالسه سجون سُحت و ربا و تدليس دا حسابو عن(د) قيوم. .. إن كان سلام .. لابد في الأول التسليم ؛ و إن كان دواس فدواس بى خيلنا و الفراس حرات شديدات باس بهجوم يعقبو هجوم شان تبقى حره جديد (جبيرة الأعراس) يجرن بحورها دموم. .. يا أرضنا الحره حا يبدوا بالأسوأ أسوأ من الحاصل أشباح مشاه و طيران بمنبان سموم إيران غارات .. جحيم نيران و ما ليس في الحسبان إشتدي في الغليان أصليهم النيران ما يهدا ليك بركان شان يمه في الآخر من البكاتلوا فيك و بعضاً من الخانوك و العاش زمن مطشوش خدعوهو بإسم الدين مشروع حضاري فشوش عاداك شان مغشوش قَلَبْ المِجَنَّه عليك ديل كلهم يمه حا يبتدوا الصَّحَيان ليك المدد ببقوا لى شعبك الأعوان و يكبر و يزيد الكوم. .. يا بلادي يا حره ما بتسلم الجَرَّه لو ما جموعنا تقوم من قاع سدى الهامش لى عن(د) علية القوم يبقى الكلام واحد و يبقى الهدف معلوم. تاريخنا يوت شاهد قدر الشعوب مفهوم. .. و إن ما قدرنا .. خلاص نستاهل الذله و تحت النعال ننداس و الحق يظل مهضوم. .. يا سيدي يا شعبي يا : دنيا زي الناس يا : ميته زي الناس زايله ام بناياً قش و العمر ما بيدوم. قول للبهابوا الموت اليوم قدَر محتوم. .. يا شعبي يا باسل قوماك كفانا النوم شن نفلو متكاسل راجنوا غيرنا يقوم خدر السكات طوَّل هدَّ الكلام الصوم . .. يا وطني يا مقسوم يا شعبي يا مضيوم درب الخلاص أهو داك إن قلت يمشيه سواك إن شاالله ما عشنا لا لينا قايمه تقوم. .. لا صحه لا تعليم الجوع أبو الكفار منو الشراره أساس و منو بتولع نار و منو القيامه تقوم. النار علي الأشرار و عصابة التجار اللعبوا بيهو الدين أحصوهم الأنفاس خلوا الكلام مزموم [email protected][email protected]