في السلك قالت لي نجيله ده وكت نجيله ! انتوا لي اسي في النجيله ! الناس في الجميله والخميله انتوا مع النجيله ! نجيله بالنا ؟ نجيله انت ياخ افتتاح 000 ما افتتاح مهرجان 000 مامهرجان احتفال 0000 ما احتفال من الخيال 0000 مافي في الخيال ده شنو الحصل ده ؟ اوصف شنو ولا شنو ولا شنو ؟ الالعاب الناريه المسيره النهاريه الرقصات الشعبيه الصفوه الصفويه الطوابق العلويا اوصف شنو ولا شنو ؟ سمعت تحت تحت قالوا بلاتر لما شاف الافتتاح عندنا قال الافتتاح عندكم بلاتر ما عرفتوهو ؟ بلاتر الجانا في البلد دي يوم رقصة الحمامه بلاتر الحضر قون العجب في لخويا بلاتر السلم الكاس للعجب بس ياهو زاتو المهم بلاتر قال افتتاح كاس القارات في جنوب افريقيا ما كان رائع زي افتتاحنا نحنا يعني احتمال بلاتر يدينا حفل افتتاح كاس العالم مامشكله 00 مرحب بيهو كشافات نور طويل وقصير ومرات تكنتك والسما مليان الوان احمر يا ابو السباع واصفر اسلام قالت لي الالعاب الناريه بعد تولع فوق بتمشي وين ؟ قلت ليها بتقع في السراميك ده قامت ضحكت قلت ليها مالك ؟ قالت لي ناس لخويا لو نظموا سيكافا بعد عمرا طويل الالعاب الناريه لو وقعت في الزريبه ما واطاتهم اصبحت مع القش والخيش والعيش ده قلت ليها عشان كده عمرهم ما ينظموا سي دي خليها سي كافا المهم الكشافات تاني ولعت الخاله قامت علي الضهر الكشافات طفت بس اشوف ليك الخاله جاريه وتلبي لبيك اللهم لبيك وجريت وراها اكتشفت انها معاها حق مئذنه زي بتاعت الزعيم دي طووووويله ومبهرجه بالانوار بالالوان الخاله ما شافتها الا في الحرم ميضنه زي الميضنه الله يديك حجه تاني ياخاله واحد لخويه شغال في المرور الحسد يتطاير من عينيه رفض يدخل الاستاد ولما الكوره انتهت سأل واحد قال ليهو الكوره كم ؟ الصفوه قال للشرطي المريخ شيل التكسي سته الشرطي قال ليهو والله اقطع المريخ ايصال 00 مفروض اربعه ركاب بس واحد لخويه متزوج مصريه ساكنين العرضه سمعت صوت الالعاب الناريه قالت يا لهووووووي راجلها قال ليها يا لهوك براك ؟ يا لهونا كلنا اللخويات واحدين قالوا المهرجان ما جميل ودمو تقيل وواحدين قالوا الكوره ما سمحه والمستوي كعب حساده شديده انتوا بتتفرجوا لييييه ؟ وجا واحد لخويا ماشي جوار الرد كاسيل قال ولا سمح واحد صفوه قال ليهو الطابق التاني ده مشلعيب يا كديس بس كن جميلا تري الوجود جميلا والذي نفسه بغير جمال لايري في الزعيم شئ جميلا والذي مجلسه بغير جمال لا يصنع في الوجود شيئا جميلا وتعاكسه النجيله الاستاذ عبد الله ميرغني لخويا قديم قال لي في الافتتاح انتوا عرضتوا كاساتكم الجويه كلها في الشاشه , لاخليتوا سيكافات ولا خليتوا دبي ولا الشارقه ولا مانديلا 00 نحن كان عملنا سيكافا نعرض في الشاشه شنو ؟ قلت ليهو خلوا الشاشه فاضيه واعرضوا تحتها بالدلوكه بنقبلها منكم العمود انتهي ولي اسي ماوصفت الحصل بكره نواصل بس اللخويات يروقوا والله كان رقتوا انا بوصف الشفتو عشان تستفيدوا تعالوا بكره سلك كهربا مدير المويه اتغير, السخانه دي يشكوها لي منو ؟ والي لقاء
