بسم الله الرحمن الرحيم في السلك المشكله ما زالت قائمه في كل مره نفرط في حقوق الزعيم هل سألت يا والي عن سبب تأخر المحترفين عن المعسكر الاعدادي ؟ المفروض يكون في ناس مسؤلين عن الحته دي ردهم شنو ؟ وهل سألت يا والي عن سبب اعارة ديالوا الذي وصل في المواعيد الوحيد الذي التزم كان الجزاء اعارته زي القالوا ليهو عامل فالح يعني شنو البخلينا نعير ديالوا في وكت فيهو سفاري في اسوأ ايامه ونحن ندخل مرحله مهمه في المجموعات ؟ واذا كانت الاجابه ان ديالوا مصاب , تبقي مصيبه منو الجاب ديالوا للمريخ وهو مصاب نفرط كثيرا وعندما تقع الطامه نجعجع طويلا ولا نجني طحينا دعونا في هذه المره ان نتوقف ونحاسب بشده نفرط في بطولات مستحقه لنا في اللحظات الاخيره ولا نبحث عن الاسباب نموت بالغابات جوعا ولحم البطولات يأكله من لايستحقه راعي الضان في الخلا يعلم بتلك الحقيقه نغضب ينبري لنا الوالي في لقاء جماهيري تموت الاحداث ونموت نحن لاننا لم نستأصل الداء بعد الاتحاد يفتري علي الزعيم ويقرر ماشاء ومجلسنا يرتاد الطرق المهذبه في التعامل مع الاتحاد مجلس مسالم جدا اظن المجلس عاجباهو حكاية النشأه في المسالمه دي وقرر يسالم قرار لعب المباراه من عدمه قرار يخص الحكم وحده وتدخل الاتحاد وامر الحكم والمجلس يتفرج لان الاتحاد مقتنع بصدر المجلس الواسع وحرصه علي نجاح الموسم الرياضي الاتحاد يعامل مجلس المريخ بطريقة لي في المسالمه غزال يجب ان يعلم المجلس وان يعلم الاتحاد ان صبر الصفوه قد نفذ وان الصفوه تستطيع ان تتجاوز المجلس وتنبري للاتحاد حتي يعود للحياد وان يعلم الجميع ان بالمسالمه اسد هصور وديناصور اذا تأججت الحرقه بداخله فانه سينفخ نارا تطال الاخضر واليابس ولن تكن بردا وسلاما علي احد وعندها كل قردا بطلع شجرتو فالتذهب جميع المنافسات الغير شريفه وتبقي المواقف شاهدت المباراه بالامس ملعب ( قعونجه ) ما تلعب فيهو لكن الملاحظ ان اطراف الملعب كانت نسبيا افضل يعني زي النيل الابيض منشره , ووسط الملعب عميق ( حدود مافي ) زي النيل الازرق , ولذا كان علي المدرب ان يوجه باللعب علي الاطراف بل كان علي اي لاعب ان يلاحظ ذلك بدلا من لعب الكره في اماكن كبري ما يقوم فيها والاتحاد يصر علي اقامة المباراه ليضرب عصفورين بحجر الاول ان يتعثر الزعيم فالاهلي بمطره بدون مطره يلعب للتطفيش ويساعده علي ذلك الملعب العائم والزعيم يزداد عليه الوضع سوءا لان من يريد ان يسيطر ويحوز ويمرر بالتأكيد يعوقه ذلك الميدان اما العصفور التاني فهو ارهاق ناس الاهلي لان من يجري في الطين يحتاج لمجهود اكبر وعندها يقابل الاهلي الابن المدلل والاهلي ( متوك ) من القطايع شيلوا الكاس ادوهو لناسكم من بداية الموسم والعبوا بعد داك موسم نضيف علي الرغم من رداءة الملعب لم اجد عذر للاعبين انا اشتري سياره همر بمليار جنيه كاااش تمشي في الزلط زينه تمشي في الرمله الدقاقه زي العجب تفج الطين زي السكين في التورته اما اذا كانت الهمر بتقيف في الطين يبقي مافي داعي للهمر والمليار اي هنتر من المنطقه غرب الزريبه بمليون ونضايق بيها الناس في الشارع لاعبوا المريخ كلهم همر ولذا الطين ليس بعذر معقوله كوره من فوق تقع في الميدان تقول ( طش 00 طش ) تطلع كورنر تقول (جمبلق ) ؟ بوليفيا قالت دايره كرت دي سوزا ياربي كرت دي سوزا بتاع اللجنه الشعبيه ولا شنو ؟ فضائح تري النور اذا كانت الشكوي مرفوضه لاجراء شكلي ناقص بنتموا في مباراة الاياب و وقبلنا بتموهوا نا زيسكو وكانو في اربعه مباريات حد يراهن دي ود الحله ودي سادومبا موش حايشاركوا في دوري المجموعات بدواعي الاصابه طبعا علي مجلس الزعيم ان يتمسك بالشكوي الي آخر مدي ويدعمها بخطاب الاتحاد البوليفي في حالة الادانه يعاقب الاتحاد الوطني والنادي المتورط وكذلك تطال العقوبه كل الانديه التابعه للاتحاد الذي ثبت تورطه يعني الزعيم اذا نجح في الشكوي يعاقب مع المجرمين الشر يعم مامشكله 000 بس التاريخ يسجل الجريمه والمجرمين والجرم حتي يعرف الناس اليوم وتعرف الاجيال القادمه من هو حامي الدستور ومطبق القانون ومحترم اللوائح ياناس الاتحاد امرنا سبحانه وتعالي بان نكون قوامين بالقسط شهداء ولو علي انفسنا يعني الاتحاد الافريقي لو سالكم فتوهوا طوالي والتبقي تبقي دي سوزا لو ثبت انو ماشاف نيجيريا ولا ضاق الدكوه وما بعرف الاقاشي تبقي مصيبه احتمال الاتحاد البوليفي قاصد كرت الحمي الصفرا ؟ ولا يكون ياربي دس سوزا معرج بي كرت وقامت اتدكت ؟ كشحوها واكتب ليهم اربعمائه واحد وخمسين يا مزمل ما تكمل الاتحاد البوليفي برااااااهو بكمبلها كمبلت سلك كهربا لا صلح 000 لاتفاوض 000 لا استسلام والي لقاء
