بسم الله الرحمن الرحيم في السلك • افرض مازيبي شال الكاس • بكسب شنو يعني ؟ • مليون ونص ؟ • ماكتيره • اسي الاتحاد الافريقي ده استشار شطه في حكاية حكام الاممالمتحده دي ؟ • الاتحاد الافريقي ده يا عرفها يا فهمها طايره • ماعارف الليله الذكرني بغلة عبد الخير شنو • طبعا كلكم عارفين قصة بغلة عبد الخير • لكن لايضير اعادة القصه للناس الصغار • قال ليك بغلة عبد الخير دي بتسابق الخيل وتفوتهم • ولما تجي في اللفه القبل الاخيره بتقيف عشان ( تتبول ) • تجي الحصين تفوتها • الحمد لله طرنا قبل اللفه القبل الاخيره • غايتو مازيمبي لو طار من اللفه القبل الاخيره دي حا نسميهو بغلة عبد الخير الكنغولي • يا اخوانا هناك فرق كبير بين ادارة نادي وادارة فريق • وبرغم قيام الريس بكل الاعباء الماليه والاداريه الا اننا يمكننا القول ان ادارة النادي قامت ببعض الانجازات • ولها اخفاقات نعود لها لاحقا • اما ادارة الفريق فكل انجازها اننا لم نشاهد لاعبي المريخ يحضرون للمبارايات عددهم ناقص • وبس • علتنا الحقيقيه في ادارة الفريق • وطرف السوط يصل الي المجلس بحسبان انه هو صاحب الحق في مراقبة ومحاسبة وتفنيش ادارة الفريق • اليوم نملك فريق محبط المعنويات • مفكك العلاقات الاجتماعيه بين لاعبيه • تفتته الشلليات • طموح افراده ينحصر في شيرت كط وبرموده ( ياحليل كروجر ) وكامري • الغيره علي الشعار زمن لم نراها تسكب في الميدان • اصبحوا يفقدون الثقه في قدرات بعضهم الفنيه بسبب سوء التوظيف داخل الملعب والذي يعود للجهاز الفني • نحن ايها الساده نحتاج لجهاز يدير الكره ممتاز ويعرف ماذا يفعل للوصول لاهدافه الاستراتيجيه التي يكون قد رسمها مع مجلس الاداره عند توليه للمسئوليه • ثم نحتاج لمدرب ممتاز • ليس بالضروره ان يكون للمدرب القادم اسم كبير عالمي • ولكن مرحلتنا تحتاج لمدرب صاحب مواصفات معينه • الذكاء • الغيره • الحماس • حسن القياده • النشاط • عدم الملل من العيش في السودان • اهله قريبين لايحتاج لاجازات كثيره • العلات الفنيه اعلاه والمواصفات المذكوره في المدرب المطلوب تنطبق تماما علي المصري حسام حسن • ويتميز حسام بانه نال جائزه افضل لاعب في افريقيا • وهذه تعني ان مافي لاعب بقدر ( يتطنقع ) عليهو سيما وان المريخ يعج بالنجوم • ولانه منضبط جدا اقترح ان يمثل الجانب السوداني في الجهاز الفني جمال ابو عنجه • كلامي ده اعملوهو • وشوفو • لو مالقيتوا الميدان مولع نار • والمريخ حلا وحمار ( بفتح الحاء يا الرشيد ) • والصفوه ماليه الدار • وكاس افيقيا جا بالحلال • عرق في الميدان ما بالدور • واراهن علي ذلك • الزعيم سادتي يحتاج لعين حمراء وفانيله حمراء • اخاف في ظل التخبط الحاصل ان يصبح الزعيم زمالك السودان • نفس التخبط في الزمالك • حشد النجوم بالكشف • اتي بجهاز ضعيف لادارة الكره • اتي بمدرب اسم كبير ولكنه تنقصه قوة الشخصيه وخلق الغيره داخل النفوس • اقال الجهاز الفني بعد ثلاث مباريات • ما فضل ليهو الا ينظم سيكافا ويلبس احمر ويخسرها في بلدو • يا والي خليك من نوالي واقعد برااااااحه مع الناس البتعرف شغل الكوره وقرر • افرض هارت لاند شال الكاس • بدوهو كم يعني ؟ • نفس المبلغ ؟ • طيب لو شالوا مقدم البضرو شنو ؟ • يا ياسر المنا الفكي يهرج سااااي • اكلوهو حقو • لاقيتو يبرطم ساااي • قال شاكوكي عالولي الله الخالوقي • يعني شكيتكم علي الله الخلقكم • وقال رابوبي واروووي ياومي فايوكي زامبوبي • يعني ربنا يوريني فيكم يوم مع شنو كده ماعارف سلك كهربا الناس الفرحانه 000 راجينكم في الحتانه والي لقاء