إنتفض الشعب.. هوب .. هيلا هوب.. وقال يارب.. بعد ما الروح وصلت الحلقوم وبعدما مافضّل زولن إلا وبات مظلوم إنتفض الشعب الثورة نار .. الانتفاضة لهب انتفض الشعب وقال: مرقنا .. مرقنا ضد الأكلو عرقنا مرقنا .. مرقنا ضد الكتلو ولدنا مرقنا .. مرقنا جموع صاحية .. وجموع نعسانة.. وجموع غلبانة.. وشهداء سقطوا بالجبخانة برضو مرقنا .. مرقنا ما خفنا .. ولا اتخوفنا مرقنا ..مرقنا ضد الطغمة الحاكمة ضد السلطة الظالمة ضد حكام شبعانة .. وبطون تخمانة بعد ما أكلوا فطورنا .. وأكلوا غدانا وأكلوا عشانا.. عشنا وشفنا شربوا الموية بالقارورة ونحن شرابنا موية العيكورة!! مرقنا .. مرقنا ناس جيعانة .. وناس تويانة .. وناس عريانة .. وناس تعيّانة .. وناس متعلمة.. وناس جاهلة.. وناس جهلانة .. حلفنا نقاوم الأكلوا شقانا ومصوا دمانا.!! وضربوا بناتنا وسرقوا اللقمة وذلوا الأمة مرقنا ..مرقنا عشان دولتنا المسروقة.. وأعراضنا المهتوكة وصحافتنا الممنوعة و السلع المنهوبة مرقنا .. مرقنا لا خلّوا أسمنت ولا حديد ولا قديم ولا جديد.. لا سمك .. لا حليب.. لا طماطم .. لا دقيق .. ولا دوا .. ولا تطبيب و التعليم بالقرش و الغبش ماليهم فيهو نصيب!! مرقنا .. مرقنا.. عشان باعوا الأخضر واليابس .. عشان حرموا الشعب البسمة واصبح عابس يعافر .. يدافر عشان لقمة عيش في زمنم كل شيء أصبح نادر، إلا العيب!! مرقنا .. مرقنا.. أمي شامة وأخوي عبدالرحمن وأختي حنان وعمي عطا المنان واللسانو عربي ورطان وكل أهل السودان فورة وغليان ضد الطغيان .. ضد السرقة و الحرمان!! Abubakr Yousif Ibrahim [[email protected]] /////////
