بسم الله الرحمن الرحيم في السلك • قال ليك واحد صعيدي سايق تاكسي • كل ما زول يقول ليهو تكس • الصعيدي يقول ايوه تكس • ويمشي • الصعايده صعايده • عندهم حاجات ما بخلوها اصلو • واهم حاجه عندهم التار • واذا عندهم صعيدي انقتل يا هريدي زي ما بقولوا هم • ما بقبلوا العزاء فيهو الا بعد يشيلوا التار • قال ليك واحد صعيدي كتلوهو سنه سبعين • اهلوا فرشوا عليهو سنة الفين وتلاته بعدما شالوا التار • الذكرني موضوع الصعايده ده الجماعه بعد الخمسه • واحدين قالوا ولسه بقولوا انهم مازالوا داخل المنافسه • وانهم قادرين علي اسقاط مازيمبي بالكنغو • بالكنغو ولا بالكونفو ؟ • الجماعه ديل ابو يقبلوا مننا العزاء • قالوا بعد نشيل التار • يعني باختصار لا عزاء نهائي ياهريدي • لو راجين تتقبلوا العزاء بعد التار اخير تسبلوهو • والله يرحم من يرحم • الرائع طارق • لديه عمود بصحيفة الهلال الرائعه • اسم العمود سوبر هاتريك • نحنا بنعرف هاتريك تلاته • وسوبر هاتريك اربعه • عشان كده ياطارق سمي العمود سوبر سوبر هاتريك • او خليهو سوبر هاتريك وتعال معانا السوبر • تبقي سوبر هاتريك في السوبر • يعني سوبر سوبر هاتريك • قالوا قاقرين ماشي • طيب لو ماماشي • ماماشي دي زي لوممباشي • يعني ماشي ولو ماماشي كلو واحد • رائدات الهلال محتفلات بالبرنس ورفاقه • دي حفلة شنو ياربي ؟ • زول ماخد هو ورفاقه خمسه في عقر دارهم محتفلين بيهم لي شنو ؟ • يعني يا يبدن الحفل بي شنو ؟ • باغنية خمسه سنين ياربي ؟ • ذكروني زماااان واحد رسب عمل بارتي • قابلت المريخي الصفوه الاديب الاستاذ صلاح حسن الطيب • وهو من صفوة النهود • ودار حديث طووويل بيننا • سنعود له • لكن صلاح قال لي مريخاب النهود في فتره حسوا بان الوالي مستهدف فقرروا ان يسيروا مسيره تأييد للوالي من مدينة النهود وحتي ام درمان • ابو الهل اخد خمسه في استادو • بحساب الهدف في ارض الخصم بهدفين تبقي عشره • والعشره يعني خمستين • وخمسه هناك تبقي تلاته خمسات • يعني مازيمبي دخلكم العائله والاصدقاء • تخفيض في المكالمات • ولان العائله والاصدقاء اصبحت دوليه • ممكن الخمسه الاعضاء يكونوا دوليين • اجانب • قابلت الرائع صلاح التوم • وبروح الدعابه التي عودنا عليها قال لي السنه دي الهلالاب صاموا الستوت خمسه • البلد كلها تتحدث عن عدم الوطنيه والشماته غير المحدوده • موضوع هااام جدا • ساعود له غدا بالتفصيل • وكذلك ائمة المساجد لهم راي • الناس الاحتجوا علي سعر وارقو وسكتوا عن سعر امبيلي • مع العلم بان امبيلي كلف اكثر من وارقو • راجعين ليكم يامولانات سلك كهربا الهمبريب في الحتانه كييييييف ؟ والي لقاء
