بسم الله الرحمن الرحيم في السلك • امس كنت غائب • عافيه ساااي • مافي عوجه • بس كانت اجازه • العيد • عيد نزع الاعتبار الكان قبل رد الاعتبار • يوم اربعه • العيد الاول • عيد شهري ماسنوي • صحيت من الصباح • لمعت ليك الصلعه ولبست الكنغولي • ومشينا رحله • معيدين • الرحله كانت في الحتانه • سبحان الله صدفه • شايلين معانا مسجل • اول حاجه شغلنا شريط ندي القلعه • اغنية البكي مابجيبو ليا • وهججنا • حتيناهو جنس حت • وتاني ختينا شريط ابو الامين • اغنية خمسه سنين • بعد داك وقفنا المسجل • ختينا الفطور • خمسه اصناف من اللحوم • وعصير لكن مابلف الراس • وشطه كنغوليه زي الشطه • ودمعه • اي دمعة حزن لأ • وبعد فطرنا عيدنا علي بعضنا • وبدينا نتذكر يوم اربعه عشره • واحد قال قبل شهر زي المواعيد دي الجماعه كانوا جوه المقبره • يغنوا ويمنوا النفس • والرياضيه شاقه حلقها • والنور لسه ما قطع • التاني قال وزي المواعيد دي كان في ناس بلموا في حق الكوره • وكان في ناس بتغالطوا البرنس في النهائي حاريفع الكاس براهو ولا بنادي المعز يشيل معاهو • وفي ناس اختلفوا قالوا بنادي عمر بخيت • وناس قالوا كاس افريقيا تقييييييل • لو ماشطبوا مرق كان شالوا ليهم براهو • وناس قالوا ياربي الهلال بشيل الكاس اول ولا بمشي ابو ظبي اول • المهم • سألوني قالوا لي اكتر حاجه متذكرها من اليوم داك شنو ؟ • قلت ليهم مابتصدقوا • قالوا لي قطعة النور • قلت ليهم لا والف لأ • قالوا لي شنو ؟ • قلت ليهم القون الخامس 000 المعز اتلفت علي الشفع البجيبوا الكوره • قال ليهم جيب سريع ياود • الولد قال ليهو اجيب شنو يا كابتن ؟ • المعز قال ليهو جيب الكوره • الولد قال للمعز الكوره عندك جوه الجك جيب من جوه يا اخوي • المهم قضينا رحله جميله • كلكم معزومين الرحله الجايه • يوم اربعه شهر اطناشر • المره دي الرحله للحدائق الجديده • اسمها حدائق الكنغو الترفيهيه • مليانه طير وحمام وحاجات • الجماعه قالوا في خصوص شكوي العرب ان اللاعب المنذر في مباراة كمبالا هو سامي عبدالله وليس عمر بخيت • يعني زي ماقلبوا 2 الي 12 دايرين يقلبوا 2 الي 18 • قلاب ياكافي البلا ! • مريخابي قال لي افيد محترف الي الان هو ايداهو • وايداهو حقق لنا النصر كثيرا • واخرجنا من المطبات كثيرا • قلت ليهو طيب مالو ؟ • قال لي صاحبك اتلح كروجر لما مرقو في بلدا طيرها عجمي , كمان قبل علي ايداهو ؟ • قلت ليهو صاحبي منو ؟ • قال لي احمد محمد احمد • الزول ده مالوا مع ايداهو ! • قلت ليهو احمد ما بحب السفر • ولا شنو يا ابو حميد ! • الشكوي الجايه تبقي في سامي يقولوا الكرت في كورة كمبالا كان لعمر بخيت • بنسوا • ديل ناس اشركوا عاكف عطا وهو مطرود عديييييييل وقالوا يجوز • غايتو حكايتكم حكايه • العجب الثالث افريقيا والسابع عشر عالما من حيث الشهره • كيف الامير يعادل الملك يا زول ! • سألوا قالوا العب العجب ولا البرنس • قلت ليهم باليمين ولا بالشمال ! • تسكتوا • ماقلتوا 00 • قلتوا شنوا ؟ • قلتوا سيدا • باقي اعتبار الجزائر لسه ضايع • حد شاف ليهو اعتبار رايح في الجزائر • المرجوا ممن يتعرف عليه الاتصال باقرب مركز شرطه سلك كهربا كمبالا دي موش الاجلوا ليها كورة هلال بورتسودان ؟ والي لقاء
