بسم الله الرحمن الرحيم في السلك *امس كان عرس بكري المدينه *فرح المدينه *حدث في المدينه *وكدأب اهل الرياضه *كلهم حضروا بمختلف الوانهم وانتماءاتهم *مريخاب حمر شديد جينا *ومريخاب صفر يسر صفارهم الناظرين *واهله برضو جوا *اداريين ومدربين ولاعبين ومشجعين واهل العريس واهل العروسه *كيف لا وهذا فرح المدينه *وقبل يومين كان عرس بشه *برضو اهل الرياضه جوا بمختلف ميولهم يشاركون بشه *والناس الحضروا عرس بشه وحضروا عرس بكري *سمعناهم بقولوا تحت تحت *عرس بكري احلي من عرس بشه *وعندها عرفت ليه بكري زاغ وبشه اتمقلب ووقع *كردنه بخت العقد ويتفق معاك *ويكورك *جيب تمنمية وعشرين مليون يا آدم *ويقول ليك وقع *لما آدم يجي تكون وقعت *لكن انت وحظك *آدم يجي بالميه وعشرين *يجي بالعشرين ينسي التمنميه *يجيب تمنية وعشرين يقول سمع غلط *يجي ساي *يقول ما لقيتهم *المفتاح راح *البقت بقت *عشان كده عرس بكري طلع احلي *آدم مين يا عم *بمناسبة كردنه *استمتعت مع كردنه من خلال شاشة النيل الازرق *والحلقه اعيد بثها بالامس *ونطالب قناة النيل الازرق ان تعيد بثها يوميا تلاته مرات *حلقه حدث *حلقه ما بتكرر *ضحكت مع كردنه من الاعماق *الراجل ده لذيذ *الراجل ده مبدع *زعيم امة الهلال ونص وخمسه *اهلنا المصريين لما يغلبهم الوصف *بقولوا حبيبي يا فلان *وانا اقولها *حبيبي يا كردنه *الراجل جاي يغير واقع الهلال *وحايأدب جمهور الهلال حسب قوله *ليكم اللحم يا كردنه وللهلال العضم *ادبهم واحد واحد *ابدأ بروشا وخالد عزالدين *انت زعيم امة الهلال *يبقي تأدب زي ما عايز اذا كنت تري انهم يحتاجون للتأديب *واحنا حا نعرف اكتر من الحكومه !!! *انت زعيم امة الهلال واكيد بتعرف امة الهلال دايره ادب ولا ما دايره *لكن تبقي الحقيقه *حبيبي يا كردنه *جيبهم البيت يا كردنه *ودخلهم واحد واحد *وكورك لي آدم *جيب السوط يا آدم *انت الزعيم برضو *ابدأ بآدم *اذا كان آدم واحد من الجمهور ويحتاج لتأديب *لكن ما قلت لي يا كردنه *الصحفيين البتدخلوا في التشكيله *دحين مادايرين ادب مع الجماهير ؟؟؟ *اذا كانت اجابتك بنعم *رفقا بالقوارير يا كردنه *فطومه دي اختنا وما بنرضي فيها *بعدين حنينه وما بتتحمل *انهرها ساي *لكن حبيبي يا كردنه *قال ماداير بكري المدينه ودفعت ليهو مليار وتمنمية مليون *امال لو دايرو كان دفعت كم يا كرنه ؟؟؟؟؟ *ايها الناس *رؤساء الهلال فعلا فلتات *كلو يوم بدهشونا اكتر *نحنا لسه مافهمنا سداد البرير لتلاته اتلات والباقي بسيط *يجينا كردنه !!! *طلع لنا من فين ده !!! *حبيبي يا كردنه انت والله *المهم *تتضارب الاقوال حول محترفي المريخ الاجانب *لانلوم المجلس لان الامر قد يكون شائعات *ولكن الخوف ان يكون الناس لسه في محطة البحث *تبقي شينه في حق المجلس وفي حق المريخ *كردنه ياخ جاب *معقوله ؟؟؟ *الافارقه الجابهم كردنه اكتر من الافارقه الفي جامعة افريقيا العالميه *شيخ موروكو مالو عيبوهوا لي ؟؟؟؟ *مغمور ده ما سبب *النفطي كان مامغمور *كان مشهور *ماذا قدم لنا ؟؟؟ *هوووووووي يا *يا العارفني بتكلم عنك *السنه دي اختانا عليك الله ينوبك ثواب *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *كان في بتاع بحر ماشي البحر وبجينا *قابل حافله مكتوب فيها يا والينا *بكرة الركوب مجاني *واقفه عطلانه مسكينه *قطع الزلط يا والينا *اشتري جريده قال يقراها ويلمها لينا *قرأ المانشيت يا والينا *وزراة الصحه قالت عمليات زراعة الكلي والغسيل قريبا مجاني لينا *خلي البحر ورجع لينا يا والينا * عاين للحافله وقرا الخبر تاني وقال لينا *انتوا وزير الصحه اشتري حافله جديده لينا ؟؟؟؟ سلك كهربا ننساك كيف وكلمة مجاني بتتعارض مع رسوم الدفن والي لقاء سلك