بسم الله الرحمن الرحيم في السلك *تحضرني اليوم قصه قديييييمه *كنا بنحكيها زمااااان *كلما نحكيها نضحك فيها *تحكيها للناس تضحك مع الناس *يحكوها ليك الناس تموت من الضحك معاهم *كلو يوم نعيدها ونضحك *زمان الزول بضحك في النكته لو قالوها ليهو مية مره *زي الطفل اليادابو قعد *تقول ليهو يااااااااك *يضحك *تقول ليهو يااااااك تاني *تاني يضحك *المهم *القصه بتقول *في واحد بلدياتنا زمان *اخوهو جاهو في الخرطوم من البلد *قال ليهو انت سغال وين ؟ *قال ليهو سغال في تلفونات *اخوهو قال ليهو *وتلفونات دي بستغل كيف ؟؟؟ *قال ليهو انت برفع سماعا هنا *زول في جوبا بكلم معاك *اخوهو قال ليهو لكن كيف انت بكلم هنا مع زول في جوبا ؟؟؟ *قال ليهو سوف *تلفون خرطوم مربوط طوووووويل بتلفون جوبا *اخوهو برضو مافهم *قال ليهو اسي لو اندك كديسه *ضنب في خرطوم وراس في جوبا *انت عفصت ضنب بتاعو في خرطوم *كديس بقول نجاو وين ؟؟؟ *اخوهو قال ليهو بقول نجاو في جوبا *قال ليهو وتيب *الحكاية دي ذكرني ليها كروز البرازيلي *عفصوا ضنبو في خرطوم *قال نجاو في تونس *كانت قنبلة ولا مكنه يا كردنه !!!! *الكاردينال ما كضاب *لكن مرات بتشيلو الهاشميه *يقوم يعفص الكديسه هنا *تقول نجاو في جوبا *اعمل حسابك يا كردنه من الهاشميه *يوم بتشيلك بره ادارة الهلال *الغنبله طلعت فشنك فضلت الجوهره *وصرح كردنه في البرد ده قائلا *الهلال سيمتلك اجمل ملعب في افريقيا سنة 2016 *الزول ده قال ملعب ماقال استاد *عشان بعدين ما يطلعوا لينا ناس ماجد اسماعيل يقولوا ليهو وين الاستاد القلتو *قال ملعب *شخصيا ما سمعتها كويس *قد يكون قال مقلب *الهلال سيمتلك اجمل مقلب في افريقيا سنة 2016 *مقلب اكتر من كروز يا حبيب *الغريبه انو كروز وقع للترجي اثناء احتفال الهلال في كورال *الحفلة دي قال ليك قالت جممممممم *وليتني كنت في الاحتفال *لاري الناطقه مبومه من هول الكرزنه الاحرجت كردنه *كردنه ده زماااان قال قودوين بجي *كدي ارجوا قودوين اليجي في الاول *بعدين ارجوا كروز البشوت بالبوز *قال ايه *فريقو رفض يفكوا *اتفكه عكس الهواء لمن وصل تونس *الفكه بتخلي اللاعب من فريقو يتفكه *نزار حامد *قول يا فكييييييييييييك *وكروز حق الركشه للفيفا ماعندو *يعني يمشي كدر ويقاضيكم *يجيب الرسوم من وين والدمغات من وين *كمان جات دمغه جديده اسمها شنو كده الوطن *يقاضيكم بدون رسوم!!!!! *ولا اخير ليهو يزوغ ويتقاضي حقوقه من التوانسه مقدم ؟؟؟ *ايها الناس *في حوار لمساوي في صحيفة الرشيد قال *نشكر الكاردينال علي معاملتو لينا وبدينا في المواعيد مواهينا *وامس فاجأنا عمر بخيت بالمطالبه بحقوقو عند الهلال ؟؟؟ *المهم *انا لسه مصر شديد *داير اشرب جبنه في نادي الهلال مع روشا *فطومه ,,,,سوي الجبنه يا بنيه *بشرط في نادي الهلال يا فطومه *غايتو ياروشا *نادي الهلال بي جوه الا يرسلوهوا ليك في الواتس *حركة عبدالواحد مسيطرة علي الوضع *والقائد الميداني ماجد اسماعيل مربعن هناك *مربعن دي ياروشا بتاعت الاسد *الاسد لما يربعن خطر *محل مربعن ده لو جات النار بياكلها بياكلها *جيبي الجبنه يا بنيه *المهم *اعدادنا يسير *نتمني ان يسير كما نريد *كما هو مكتوب في كتاب الكورة *دايرين نمشي المطار *اتعودنا علي حكاية المطار دي *خرمانيييييييييييييييييييييين *مدمنين مطار *والله مرتاحين الناس الربنا ما ابتلاهم بالادمان *ادمان المطار *عمرهم ما ختوهوا في خشمهم اقصد في بالهم *ولا بعرفوا طعمو *المهم *لي شهر خمسه يا جماعه *جمال يقول كلام *ونحنا نقول كلام *والمريخ يقول كلام *وربك رب الخير يقول كلام *ويا حلاوة لو ربك قال امشوا المطار *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *واحد عزيز علينا *يوم حكي لينا *قال في محافظ بره السودان يا والينا *كان جاي مع السواق من الخرطوم قاصد بلدا لينا *المغرب اذن ليهو بين المسيد وكاملينا *قال للسواق اقيف نصلي يا اخينا *المحافظ بشيل معاهو مصلايه وابريق طوالي يا والينا *السواق من التعب اتكي علي الدركسون وتحت تحت يلعن العيشه وسنينا *الكلام ده ماهنا يا والينا *المحافظ شال ابريقو ومصلايتو ونزل يصلي قاصرا يا والينا *بعد اتوضي خت الابريق وقفل الباب وكبر لركعتين سنينه *السواق سمع قفلة الباب افتكر المحافظ ركب يا والينا *ودور لما وصل قرية صداقه قديمه لينا *فقد المحافظ يا والينا *وماعرف كيف التصرف في الوكت داك مافي موبايل لدينا *بدري الكلام ده وبره السودان يا والينا *اتوكل ومشي لتلك المدينه *لقي الامه مجتمعه ممنتظرة المحافظ اللينا *المحافظ لقي ليهو جماعه ركبوهوا من الخلا داك وجابوهوا المدينه *قبل وصولوا الجماعه وكسارين التلج سألأوا السواق *وين وديت المحافظ يا اخينا *السواق عشان يتخارج جاتو فكرة سمينه *والوكت داك اي شئ يتقال بتصدق يا والينا *قال ليهم المحافظ نزل يصلي اماما لينا *وفي الباقيات الصالحات شفناهو بي عينينا *المصلايه طارت بيهو زي سفينه *في اللحظه دي المحافظ وصل شايل مصلايتو في ايدو يا والينا *الجماعه شافوا المشهد صدقوا رواية السواق *المؤمن صديق يا والينا *كبروا وهللوا وهتفوا ونتفوا ريشا لينا *المحافظ استغرب ومافهم الحاصل الفينا *الجماعه قصوا ليهو القصه بتاعت المصلايه الطارت يا والينا *قال ليهم منو الكلمكم ؟ *قالوا ليهو سواقك يا محافظا فينا *اتلفت علي السواق والسواق يرجف يا والينا *قال ليهو انت فولة ما بتتبله في خشمك يا اخينا ؟؟؟ سلك كهربا ننساك كيف وبنصدق اي كلام يتقال لينا والي لقاء سلك [email protected]