بسم الله الرحمن الرحيم في السلك *طبعا الاهله مع كلو اخفاق كروي *بطلعوا لينا بي شكوي المدينه *او فحص التربه *او امكانات المدرب اللمبي شربوت قيقا *او الجوهره الزرقاء فيصل *ومرات بجونا بي الاشبال واعتمادهم علي الاعمار الصغيره *وفي الختام يطلع الكلام *حديد أهو *مختبرات شندي طلعت لينا نتيجة فحص التربه *قالت التربه تربه سااااااااي *تراب ميت *لابصلح ردميه *ولا ببقي طريق للعالميه *وبعد التزريع بالمعامل الشنداويه *اتضح ان التربه لا تصلح لانبات نباتات شنداويه *وانها تربه قاعده سااااي *وعمرها في شندي لا نجحت زراعه ولا حاتنجح زراعه *ده تقرير معمل ماعندنا فيهو كلام *ومباراة شندي اثبتت ان الجوهره الزرقاء فيصل موسي *طلع حديد أهو *اشرك المدرب اطهر ووليد (الميتان ) ولم يشرك الجوهره *جوهره طلعت حديد أهو *وقصة صغار ذاتها طلعت حديد أهو *وليد اكمل السن في اشبالنا سنة الفين وعشره *يعني قبل خمسه سنين اكمل تمنطاشر سنه *طيب طمنطاشر زائد خمسه تبقي كم يا فطومه يا اختي ؟؟؟ *تلاته وعشرين ؟؟؟ *طيب الصغره وين ؟؟؟ *نميري لما كان قدر وليد ده كان نقيب *وكان متزوج كمان *بعدها بي ترقيه واحده بقي رئيس للسودان *يبقي صغير كيف ؟؟؟ *انتوا تلاته وعشرين عندكم صغير ؟؟؟ *دبايب انتوا *يعني الكبير ده عندكم بكون عمرو كم ؟؟؟ *الفين سنه ؟؟؟ *حتي سن وليد طلع حديد أهو *واثبتت معامل شندي وكلام روشا *انو وليد الكبير في السن الصغير في الحجم لن يقوي علي الممتاز *موش قلنا ليكم افريقيا لا وليد بنفع ولا فيصل موسي ؟؟؟ *بعدين قصة الاسماء دي بتكون موضه في كلو زمن *يعني لو لقيت زول اسمو نميري بكون مواليد بداية السبعينات *ولو لقيت زول اسمو هيثم بكون بتاع منتصف السبعينات *ولو لقيت زول اسمو فيصل *يا دفعة فيصل العجب *يا دفعة الملك فيصل *يا قريب من فيصل السيد *فيصلكم طلع حديد أهو *لكن اسم فاطمه ما مقيد بي زمن محدد *حسب هيجة الاسره في التبرك بفاطمه الزهراء *في ناس هيجتم جاتهم في الستينات *قاموا سموا بناتهم فاطمه في الوكت داك *وفي ناس جاتهم في التمنينات *زي جيراننا *وفي ناس جاتهم في الالفينات دي *زي اسرة صديقي حامد بدوي *حامد بتو اسمها فاطمه وعمرها سبعه سنين *بنقول ليها فطومه *لكن ممكن تلقي زول مولود الفين واربعطاشر اسمو سيداحمد *ده طبعا خروجا عن القاعده العامه *بكونوا مسمنوا علي جدو *لذلك يلقب بي جدو *فيصل موسي ده *اسمو فيصل موسي فيصل ؟؟؟ *لو ماكده يبقي دفعة الملك فيصل *واختاروا ياتوا ملك انتوا *الملك فيصل بتاع السعوديه *ولا الملك فيصل بتاع السودان *طبعا بتاع السعوديه مابتختاروهوا *الارباب عاد ماقاعد هناك *المهم *اليوم نلتقي بالابن مريخ كوستي *ما دايرين ليهو الهزيمه *لكن ان شاء الله تبقي هزيمة مريخ كوستي الوحيده في الدورة الاولي *والعقرب حالف يتشقلب *وعنكبه حا يتعنكب *وامل عطبره لو ياهو الامل البنعرفوا *من يوم الاحد الدوري بنتهي *الدوري حا يتكرتن *الخوف يتكردن *باقي الزنقه ممكن تعمل اي شئ *ايها الناس *نأمل في مشاهدة ابراهومه وحسن سفاري ( الصغار جد جد ) في مباراة اليوم *لكن صدقوني *لو ودوا سن وليد للفحص مع فحص التربه *المعمل حايقول ليهم *ده منو الاكبر من التربه ده ؟؟؟ *المهم *الزول ممكن تعرف عمرو من اسم امو *مثلا زول اسم امو التايه *اكيد بكون عمرو في الخمسينات *لانو آخر جيل سموهن التايه قطعن في نهاية الخمسينات وبداية الستينات *فالزول الامو اسمها التايه بكون مولود اواخر الخمسينات وبداية الستينات *طيب زول ابوهو اسمو الطاهر بكون مولود متين ؟؟؟ *اطهر الطاهر *قال اشبال قال *المهم *نتيجة الفحص طلعتها جماهير شندي *حين هتفت *اشاعه جرايد واذاعه *المهم *الهلال السنه دي حديد أهو يا فطومه *بطلوا مكابره واعترفوا *القصه ماقصة غلاط سااااااااي *ايها الناس *في معرض الولايات *بارض المعارض ببري *جناح المريخ وجناح الهلال مقبلات علي بعض *ساحكي لكم قصة المعرض لاحقا *ولكن ما لفت نظري الاحترام المتبادل بين اسرة المعرضين *والفهم الراقي الذي جمعهما سويا طيلة ايام المعرض *وصدقوني ان كان هذا هو الفهم *فالمجتمع الرياضي موعود باجيال راقيه ومهذبه *تعشق انديتها وتدمنها *ولكنها تحترم بعضها البعض احتراما يفوق الوصف *التحيه لكل الاستاف الذي عمل بالجناحين في المعرض *والتحيه لادارة المعرض *وللاخ هاشم الزبير *هاشم والله كان يتعامل مع جناح الهلال باريحيه اكتر مما يتعامل بها مع جناح المريخ *لان هاشم رياضي في المقام الاول قبل ان يكون مريخي *وقفة هاشم وجدت الاشادة من استاف جناح الهلال *ووجدت الاكبار من ناس المريخ *ايها الناس *تسير لجنة التعبئه المريخيه اليوم من دار النادي *تسير بصات للسفر لكوستي لدعم الزعيم *بصات موديل الفين وخمسطاشر *آخر موديل ما زي بص الهلال (استعمال بره ) *وتوفر وجبه *التواجد الثامنه صباحا بدار النادي *التحرك تسعه صباحا *والعوده بعد المباراه *القياده العامه ليك تحيه *ومية الميه قياده قويه *ايها الناس *احر التعازي للاسره المريخيه في وفاة مشجع المريخ حاتم الجاك *نسأل له الرحمه والمغفره وان يجعل الله قبره روضه من رياض الجنه *ايها الناس *ان تنصروا الله ينصركم *اها *نجي لي شمارات والي الخرتوم *كان شفت يا والينا *واحد بتاع بحر كان ماشي معانا مناسبة حزينا *جمب القصر جينا *شاف القديم *ده شنو ده قال لينا *قلنا ليهو ده القصر الجمهوري يا اخينا *شاف الجديد يا والينا *وده شنو كمان قال لينا *قلنا ليهو ده القصر الجديد يا اخينا *قال لينا يا والينا *قصور الحكومه كترت وبانت لينا سلك كهربا ننساك كيف وقصور الحكومه تتطاقش مرة ويتطاقش مرات ويبان لينا والي لقاء سلك [email protected]
